[1] 'Doo'd Kiriistokaaw, wihi 'da'ddaboot, atin ichoow Kamur ba a wohoo kalday gone, taba weyti hamaada. Wihi goorat an atin icheeke iche toro atin isoochiira, i'daasenyi ma ikurmichaane toro la a atin toorribaan.
[2] Taba, 'doo'daas uskeel lehe, i'di kararre u sussuujenye, khandihi uskul enenyet ihosso yuubsada.
[3] A mehe innohi Rubeyti Waakh ka weysanni, wihi Yeesso Kiriisto inno iyeele keeylajno toro wihi enenyet sartiis ka yeelo ikakhuufin, iche khandihi rummaate.
[4] Eheet a, ani rubeyteey wihi an sarteey ka yeelo keeylajin a abuu'd. Chirri etoo wihi us sartiis ka yeelo wihi us keeylajo koogyahe, an weyti kuta.
[5] Inkoo an delde, an ibeen siyyeet barye, iche liikhandiye. 'Doo'di idele a Issiraayele, yaaf Beenjameene kayimiy. Hiiyyeey tuumman la Ibiraaniya kasoouummame. An rabitti Farissaayo weyti amurreti Ya'huud raahto kijire.
[6] Toro jeenteti an weyti Waakh ikafalin i'doone, urur Kiriisto sina omhiche. Chirri amurreti laraaho enenyet eti Waakh ortiis ka fissan kayeesso ani wohoo rucchul laka ma liikacheekti.
[7] I'daasenyi wihi tuummane an kol icho indigir ikhabaan koogeet, an kola iroono Kiriistuu, khasaara iekkaacha.
[8] Wihi wahaas kuto, cha'an walah tuumman ichoow indigirti buurenye an Yeesso Kiriistohi Kamureeye an abdi isiyeyo, walah tuumman kola jeente Kiriistuu tuum khasaara iekkaacha. Icho u'du iekkaacha 'dee Kiriisto 'hela,
[9] ani ichoow Yeesso Kiriisto ba wohoo kalday nateeh. Waakh ani eti ortiis ka fissane iekkaacha, waha la jeenteti an amurre iraaho menye, a jeenteti an Kiriisto ikakhuufo.
[10] Wihi an 'doono kallaayo, a Kiriistohi an abdi, ichoow miigti usu omoot kasookahisse jiroteey miigoosso, toro la sinati usu lakawaariche usu leegismo toro i'diis u amuut.
[11] 'Deerka i'doo ka an 'doo'di omoot lakasookahcho goya kijira.
[12] An laka uliba wahanyeyyohaas an eldi i'di goorat Waakh ika'doonuu tuum a itah ma eldi. I'daasenyi Yeesso Kiriisto ikhuccha. An kol tuumman hole dowa, wahaas Yeesso Kiriisto 'hor ikhabte ani laka khabda.
[13] 'Doo'd Kiriistokaaw, wihi an kase a mehe ya, annaka alah wahaas uliba ma 'helin. I'daasenyi an wohoo kaldach on yeela. Wihi kute a kadaba, toro la wihi orteey jiro weyti hol idowa.
[14] Maantaka, inti an kamassicho hol idowa, 'dee siinti Waakh Yeesso Kiriisto ka goobi Waakh ka iwahe 'hela.
[15] Innohi tuummane wahanyeyyohi Waakh ka ii'downe, malaas khabno gi'de. I'daasenyi, chirri gaasiinkoo maloo addane yeere khabo, Waakh wahaas a atin isoobabbakkaahicha.
[16] Wihi weyti khumman kallaayo, orey on isohanni, yeedi rummaate inno orey abanne, uliba laka a raahno gi'de.
[17] 'Doo'd Kiriistokaaw taba dabateey raaha. 'Doo'di jiroti icho jiraan ka dabateey raaho fiiricha.
[18] A mehe i'di an orey kolassi ittaawe atin isoocheekuu, toolla toro oytim ka a atin isoocheekaa, 'doo'di ittaawe jiroti icho jiraan ka a chiiyti massalaaba ichoow omoot Kiriisto.
[19] Waakh 'doo'da berri a baabiicha. I'di tahe waakkhicho a uurichooda. Wihi lakhaanyo ikeeno keeylajaane, toro la mali icho khabaan, a ki wahanyeyyohi harrata on.
[20] I'daasenyi inno a 'doo'di goobi Waakh. Toro la weyti 'Doorribehoo sugna, ulla a Yeesso Kiriistohi Kamureenenye goobaas kayamiit.
[21] Ulla miigtiisti us walah tuumman isikeeno anan yabuu'd ka, sarteenta 'darane tamuut a urgiyicha, i'di sartiisti weyti haaggan kayeela.