[1] Maanti Waakh Kiriisto omoot kasookahche, anki Waakh ka atin laka omoot a atin laleesookahche. Maantaka wahanyeyyohi saraate inti Kiriisto komborti antoote Waakh miigtiise kafiddiyo 'dondoona gi'de.
[2] Taba wahanyeyyohi harrata menye, wahanyeyyohi intaas saraat kijiro kol dakkhan orey isohda kamalda.
[3] I'di tahe atin a tuunteene, toolla la jirotiin ichoow Kiriisto ba Waakh goya kadagsanyahiin.
[4] Maanti Kiriistohi jiroteenti rummaat khuccho harra tuumman isoobaho atin laka a leesoobahtaane, i'diis u ababtaan.
[5] Maantaka sartiinti harratane uskeel 'doonto wahanyeyyohi i'dee ka agiisa. 'Doo'di isidisanne isleeur'do ichoow wihi bi'dire ichoow 'doo'di eti icho argaan ichohi leeur'do 'doono ichoow uskeeli liimoono ichoow 'damaam 'diicha. 'Damaam la a i'di iyookkoyyohi waakkhakh lakayeessi.
[6] Jeenteti waha u, holi Waakhe kuleele 'doo'da yeediis iraahin a iyamiit.
[7] Atin rubeytiin laka jirotiinti raagan ka wahanyeyyoha a kaassahatteen.
[8] I'daasenyi toolla wahanyeyyoha i'dee laka 'diicha, hol ichoow isinyannyaamin ichoow 'dii'ddo ichoow ham ichoow afi 'daran.
[9] Been iisigoonna a mehe jirotiinti oraate suuje ichoow fataliche a kasootabteene.
[10] Toro la jiroti husube gessatteene, jirotaas ka la kol dakkhan Waakhe atin husubnaacha, 'dee usu rumanka abattaane, iyookkoti Waakkhi atin soouume raahtaan.
[11] Jirota husub ka enenyet seley ma gaan, i'di maanta Ya'huud ichoow yaafohi Ya'huud ieheynan, 'doo'di khandiiti ichoow ki ikhandiyan, 'doo'di isoomin ichoow ki lakarooro, ki ilbooyyee ichoow ki furan seley ma gaan. I'daasenyi eti khumman a Kiriisto, inno ichoow us la a wohoo kalday.
[12] Waakh a atin soobahsate, 'doo'diiski munyeenye us weyti 'doono, atin kayeesse. Maantaka, taba gi'de waha yeela, 'doo'di uur nugul ateeha, 'doo'di uur 'dabakhe ateeha, isnuglaacha, 'doo'di samacchaare ateeha, 'doo'di garrahsi khabo la ateeha.
[13] Taba gi'de chi' etoo atin kaholloocho laka igarrahsada on. Chirri etoo ki addan wohoo kakhabo laka, etaas a ikakuto. Saggi Kamur uskeel atin ikakutuu, saggaas on u atin laka 'doo'di addan uskeel ikakuta.
[14] Haaggaas tuumman 'dirihicho la 'doo'di is'doono ateeha. 'Dooninti isla'doono la, 'doo'd Kiriisto tuum wohoo kaldaye kayeessa.
[15] Nebey Kiriisto uurassiin a dakhatti. I'di tahe i'di 'doo'di sartoo kalday u, nebeytane Waakh atin iwahe. Waakh la kala'd ilaaba.
[16] Walah tuumman ka wori Kiriisto miinsan mujjum nabah isuda, jirotiin ka tuum raaha. Khara tuumman ka, wora isabcha, toro la wora on ka issoohossa. Sabuuri Yeedi Waakh goya kayimiy ichoow geeyohi Waakh lakasaa'do ichoow geeyohi Rubeyti Munyee atin siisso, Waakh idowa. Kol dakkhan Waakh kala'd ilaaba, geeyo idowa. Geeddaas tuumman la rubeyohiin ka Waakh kala'd ilaaba.
[17] Walahbaaw atin yeessaan ka, harrabiin ommos wihi atin haaggissaan eheetteey ka ba, jeenteti atin koo Yeessohi Kamure itahiin iyeela, toro la Yeesso ka Waakkhi Aabbaheene kala'd ilaaba.
[18] Deyyeho, i'di 'doo'di Kamur kakhuufo imassuu, taba gi'de makhaaballetiin aficho akutina.
[19] Makhaaballe, taba deyyehotiin 'doona, saggi suuje la iiwoyina.
[20] Nyaakhut, taba atin laka wihi atin yeessaan tuumman ka, wihi 'doo'di atin dele atin idowo raaha. A mehe waha a wihi Kamúr kahamaadicho.
[21] Ooyenye, taba nyaakhutiin a'da'ddaaranna, uus rubeye jebine.
[22] Ilbooyye, taba wihi kamurretiinti harrata atin idowto tuumman raaha. Jeenteti atin Kamur ikaroortaan u, chirri icho atin 'dey'doochaan kaldach on menye, kol tuumman uuri haaggan ka icho kahamaadicha.
[23] Walahbaaw atin haaggissaan ka, rubeytiin tuumman kahaaggicha, i'doo atin weeli enenyet menye i'doo atin Kamur ikahaaggissaan iyeela.
[24] A mehe saggi atin igarattaan u, Kamur wihi atin mu'dan i'di kala'deet u a atin guta. Kiriistohi Kamure ihila.
[25] Eti khuf yeelo kala'ddi khufaas a igunnanta. Waakh la enenyet tuumman ekka yeya.