[1] Atinhi saggi an iroonotiin ichoow iroonoti urur Kiriistoki ilkerengeetti Lawodeechiya yaal ichoow iroonoti 'doo'di Kiriisto kakhuufo tuummane ani fooleey igaran u, an hol idowe atin icheeko iche 'doona.
[2] I'dane yeela, 'dee icho uur miigoocha, is'doonaane wohoo kalday yateehiin. Toro la ichohi Wori Waakh tuum abtaane rumanka liibuuhicho iche 'doona. Wora Waakhe dagsan la Kiriisto rubeytiissa miinsanyahe,
[3] usu on kamurroonki kharati Waakh ichoow garanti Waakh lagarti dagsan lakeela.
[4] I'dane atin iadeeh uus 'dee etoo kalday laka woroo wohoo haaggan iyoog ka atin ekkeysan.
[5] A mehe an goytiin ma toollo. Eheetteey laka, ani rubey ka a atin leejira. Toro la an weyti hamaada, jeenteti atin jiroti atin jirtaan ka ifissantahiine toro la kakhuufnaanki atin Kiriisto kakhuuftaan ka ichuukhantahiin u.
[6] Maantaka atin Yeesso Kiriisto Kamur a kayeelatteen gone, taba gi'de kol dakkhan usu leejira.
[7] 'Deerka orey isohda goytiis ka mujjum hiiyyay bahcha, jirotiin la usu kadisa. Saggi atin liiabchuu, kakhuufnaanki atin usu kakhuuftaan ka miigowa, kol dakkhan la weyti usu kala'd ilaaba.
[8] Taba gi'de uus etoo kalday laka malassi beenaate indigir laa ka atin ekkeysanne i'di bow'duu atin labooliyin. Malassa la wihi Kiriisto essi ma kanoole, hugumme ichoow miigti suujenye harratane kanoolyahiin.
[9] A mehe tuunki Waakh sarti enenyete Kiriisto kayaal.
[10] Jeenteti atin ichoow Kiriisto ba wohoo kalday itahiin u la, walah atin laatahiin mele. Usu herti Waakh ichoow ginnayyo tuumman ichoow wihi tuummane anto khabo a iweenyahe.
[11] Toro la atin ichoow Kiriisto a wohoo kalday gone, a atin lakhandiye. I'daasenyi waha khandihi dahanti weeli enenyet haaggisso menye, a ki Yeesso Kiriisto haaggicho. I'da ka Kiriisto wihi uurassiin goya kijiro uskeel imoono a atin kabahche.
[12] I'di tahe maanti atin labaattissiye Kiriisto a atin laleehawwaale, toro miigti Waakhe Kiriisto omoot kasookahisse atin kakhuufteen ka, a atin laleesookahche.
[13] Atin 'hor jeenteti uskeeliin ichoow wihi uurassiin goya kijiro uskeel imoono atin liikabihin u wahanyeyyohi Waakh ka a tuunteen. I'daasenyi Waakh Kiriisto jiro a atin leesiiche. A mehe Waakh uskeeleen tuumman a inno ikakute.
[14] Waakh khadaabi mogti uskeeleen kachiiranyahe a hiyyaaye. Khadaabaas wihi tuummane amurre inno ka'doonto inno yeelin iubaa'dane kijira. Waakh wahaas a inno kabahche, massalaaba kahide.
[15] I'daas ka Kiriisto ginnayyohi miig ichoow anto khabo miigticho a kakhaate. Toro la massalaaba ka icho sooriche, 'doo'd ortiis ka lakhaanyo kadowe.
[16] Maantaka, uus etoo kalday laka wihi atin tamhiin ka ommos wihi atin dantaan ka ommos daawo ka ommos ibeenneti munyee ommos maanti haye delatte ommos Seeri Lanaso ka uskeel atin igoon.
[17] Amurreta a oosinti wihi yamiit on tusso, i'daasenyi wahaas rummaat a Kiriisto rubeytiissa.
[18] Uus etoo kalday laka herti Waakhe lawahti icho 'doonaan ka ichoow isnuglaanti beenaat ka atin hukkumine kala'ddiin atin tirin. Eti i'daase wihi us weyti kaayyeedo a fooltabchoti us kolossoo arge. Jeenteti mali us khabo ki 'dabakkhi weeli enenyet iyahuu, us wihi ilmarhaatteete keeylaja.
[19] Us Kiriistohi matakki urur Kiriistee ma khuccho. Matakka ka, sar Kiriistoti tuummane hubno ichoow maanjeerre khucchisso a isleeweynaataan saggi Waakh iweynaachuu.
[20] Atin Kiriisto a leetumaateene toro miigti suujenye harrata a atin lakasoofure. A i'doh toro saggi 'doo'di harrata ikajirtaane amurreta i'dee iraahtaan?
[21] “Waha dahano akakhabanna, waha af aka'daarina, waha a'daarina.”
[22] Waha tuumman enenyet raahaayi saahta on kheerowaan, a mehe a amurre ichoow wihi enenyet laabcho on.
[23] Jiroti amurreta dakhatti jitoo khareenye iyoogtahe. Jitassi 'hoolenye enenyet isihosso iche Waakh lakawahta, isnuglaanti beenaat ichoow wihi sarticho 'doonto weyti la'dii'do khabaan. Eheetteey laka, indigir icho wihi uur goya kijiro uskeel imoono islakajeycho ikhabaan mele.