[1] Waakh ichoow Yeesso Kiriistohi Kamureenenye maanti us soonokhti dakhiis chuukho toro 'doo'di tuume ichoow ki jiro ba hukkumo, orcho ka wihi an kiadeeh kallaayo.
[2] Tab gi'de tannabo Yeedi Waakh kolal dakkhan 'doo'd icheek. 'Doo'd saggi us uskeel iyeele icheeke, leejaakh, toro uur miigooy. Geeddi at waha yeesso la weyti samacchaare, mujjum la enenyet walah abi.
[3] A mehe ibeen a yamiit ki enenyet wori Waakhe laabcho nabah isudiwwaayo. Wihi icho imoonaan on yeelaan. Jeentetuu la, 'doo'di buurenye wihi beenaat enenyet abcho wihi dogticho 'doonto idowo, iche urursataan.
[4] Icho la yeedi rummaat adah a kakhabtaane, hawweesseti beenaat nabah isudaan.
[5] I'daasenyi at tabe walah tuumman ka isjeyiche, sinabaaw kisoobahte ka la garrahso. Hili eti Wori Haaggan taa'hicho haaggiche, hili Waakh kikorche tuumman buuhi.
[6] I'di tahe ani ka jiroteey a labahcha, i'di sadakhati Waakh liikokkoddichuu. Ibeenki Waakh ikhaato la a yitah.
[7] Dihoti an kijire mujjume kijire, oriisihi an kijire la a massiche, wori Kiriisto miinsan la mujjume kakhuufe.
[8] Toolla 'duubi eti enenyet sooricho 'helo a isuga jeenteti an Waakh kalday on ikajiruu. Kamuri fissane enenyet mujjum hukkumo, 'duuba ibeenki us soonokhti a isiicha. Ani kalday 'duuba ma 'helo, i'daasenyi 'doo'di tuummane emeettiis imoono laka a 'hela.
[9] Geeddi at tabuu'd hol dowe, dowwa isooeleel.
[10] I'di tahe Deema jeenteti us wahanyeyyohi harrata ikaloo'duu adah a ikakhabte, ilkerengeetti 'Dessaloonika irte. Kireeske la boroofenhi Galaatiya irte, Tiito la boroofenhi Dalmaatiya irte.
[11] Luuka kaldaye toolla ileejira. Maanti at tamiit Marko sookhaate issooraaha, a mehe us hili Waakh ka gargaari buurenye ikhaba.
[12] Tuuchiko la ilkerengeetti Efeesso a ierge.
[13] Maanti at tamiit kabuu'deeyki ilkerengeetti Tuurowa ka an min Kaarbu kasootabe sookhaat. Khadaabbeteeyti layuubo ikeen, kach ka la wihi uktohi hoolaat lakahaaggiche ikeen.
[14] Eti tumaaleete Alekisaanda layadeeh suujoonki buurenye iyeele. Kamur jeenteti wihi us iyeeluu usu a hukkuma.
[15] Atin laka etaas yuubsada. A mehe us Yeedi Waakhe inno cheekno weyti tirrime.
[16] Maanti oraate kootiin ka liihukkume et igargaare mele. Enenyet adah a ikakhabte. Kamur ba waha icho iyeeleen ikakuta.
[17] I'daasenyi Kamur a ileejire, miig isiiche, 'dee anna farniin tuum cheeka, 'dee yaafohi Waakh igaran tuumman daagaan. Ulla kootiinki Rooma ka omoot a ikaribe.
[18] Kamur suujoon tuumman a ikariba ichoowka nebey goobiiski saraate us dakhti igeecha. Us ba jirtuu tuummamba lasaa'da. Aamiin.
[19] Bariitoteey Birisiila ichoow Akiila ichoow min Oneesiferas ba eleeli.
[20] Eraasta ilkerengeetti Koriinto ka'hade, Turofiimo la jeenteti us ikhannanyahuu ilkerengeetti Mileeto kasootabe.
[21] Geeddi at tabuu'd hol dowe, geeddi il iroffowin inta sooeleel. Yuubolo ichoow Buunten ichoow Liino ichoow Kilaawudiya ichoow 'doo'di addane tuummane Kiriisto rummeeste a atin soobariitiche.
[22] Kamur ba rubeyohiin leejira. Waakh ba atin imaala.