[1] Maantaka weelaaw, haaggi Waakhe buurenye Yeesso Kiriisto laka'helo ka miig khab.
[2] Wahanyeyyohi at ikadaagte an 'doo'di ittaawenye garteey laabo ortiis ka idah la, 'doo'di lakakhuufo 'dee 'doo'di addan abin yabuu'd kori.
[3] At laka i'di eti iskar Yeesso Kiriisteenye haaggan u sinayyohi lakoomhicho ka garrahso.
[4] Eti iskarenye diho kajiro hilassoo addane ballaaddan ma gelo. Usuhi eti iskareete usu iween kahamaadicho 'doonaa.
[5] I'daasu la chi' etoo oriisi ka 'doo'di addan iskabahsataan, 'duubi eti oraat 'helo ma 'helo sammata us amurreti oriisi tuumman iraahin.
[6] Toro la eti gos khabo hol dowo, eti oraate gurnaanki gos yaham a eheetti.
[7] Wahanyeyyoha an kidowo kamalo. A mehe Kamur wahanyeyyohaas tuumman a kisoobabbakkaahicha abatta.
[8] Saggi Yeesso Kiriistohi hiiy Dawuude omoot liikasookahche akadabin. Wori Haaggane an cheeko a kaas.
[9] Jeenteti an icheekuu la sina a ikawaarta, i'di eti wohoo uskul yeeluu a hidanahe. I'daasenyi Yeedi Waakh ma hidan.
[10] Maantaka jeenteti 'doo'di Waakh soobahsatuu an walah tuumman a igarrahsada, 'dee icho laka ribnaan ichoow weynaanti jirtuu imassanne Yeesso Kiriisto laka'helo 'helaan.
[11] Yeeda i'da yadeeh a lakakhuufa, Chi'inno usu leenamuut, usu a leejirra.
[12] Chi'inno garrahsanni, usu walah a leedakhanna. Chi'inno usu 'dii'dne, ullaka a inno 'dii'da.
[13] Chi'inno usu raahin 'dii'dne, usu uliba a eti lakakhuufo on. A mehe us is'dii'din ma yabuu'd.
[14] Enenyet wahaas tuumman kasoo'he'hheli. Waakh ortiis ka 'doo'da tootooche iicho yeedad ka isleeiriirin. Iriirti i'dee gargaar iche khabto mele, 'doo'di dagansati la a baabiissa.
[15] Geeddi at tabuu'd hol dowe eti Waakh kahamaadicho, hili us haaggicho ikuuryaawine, wori rummaat mujjum cheeko ateeh.
[16] Hawweesseti 'dalame Waakh ikahamaadin buj. A mehe hawweesseti i'dee enenyet on Waakh kaseehichaan.
[17] Wihi icho enenyet abchaan i'di jiissi bebbeyattuu, a taa'haan. Reeri waha 'doo'd abcho la a Hamenaaya ichoow Fileeta.
[18] Icho rum a katabeene, 'doo'di tuume orey on omoot kasookahe essaan. Icho la 'doo'd Kiriisto gaasoo kakhuufnaanki icho Kiriisto kakhuufaan a kheeroocheen.
[19] I'daasenyi ururi rummaate koo Kiriistee i'di tirrinki Waakh u uliba mujjume chuukhanyahe. Wihi kachiiran la kallaayo, “Kamur 'doo'di kiise a garta.” Wihi addane kachiiran a mehe ya, “Eti tuummane an Kamure raaha essi, uskeel a 'diicho.”
[20] Toro la minki eti kamure ka karmohi fil ittaawenye jira. Gaasoo a wihi 'dahab lakahaaggiche, gaasoo laka a wihi lahaag lakahaaggiche, gaasoo laka a wihi kho'doomme lakahaaggiche, gaasoo laka a wihi doobbo lakahaaggiche. Karmo gaasoo a wihi khummane, icho ibeenki daaweet on hil lakahaaggicha, gaasoo la a wihi ikhummaneynane, icho la kol dakkhan on hil lakahaaggicha.
[21] 'Doo'di uskeeli us yeelo iskadikhe a i'di karmohi khummane, lamunyaache, latannabiche hili haaggan lakahaagsati.
[22] Tabe suujoonki tuummane eti nugul imoono kafirid. Hol dowe, jiroti fissan yowo, Waakh kakhuufe, 'doo'di addan 'doone, eti nebey dowo ateehe, ururi 'doo'di uuri haaggan ka magahi Kamur waho goya kijir.
[23] Iriirti 'dalame khara laa goya agelin. A mehe saggi at igarattuu, wahaas jaakh on delaan.
[24] Eti Kamur ifalo ma jaakho, uure 'dabakhyahe, enenyet walah abin a yabuu'de, toro la garrahsi leeyahe.
[25] 'Doo'di usu tirrimo laka samacchaar on walah abcha, kolossoo Waakh 'doo'daas rubeyohi uskeel kasoonokhti a siicha, runtaas rummeestaane ulla icho woya.
[26] Toro la matah bakkaaha, angeyi Seytaanki icho hide wihi us 'doono yeelaan kasoobahaan.