[1] Eti khadaaba kisoochiiro a ani Baawulohi ilbooyi Waakhenye, toro la ergaano Yeesso Kiriistee. Anna a liisoobahche, 'dee 'doo'di Waakh soobahsate gargaara Waakh mujjum kakhuufa, toro la wori rummaate Kiriisto miinsane jiroti Waakh 'doono lajiro icho woya.
[2] Wora rummaat ichoow kakhuufnaankaas la khajjeeli saggi icho jiroti jirtuu imassanne goorat Waakkhi been igoon geeddi harra liisoouumin iayyiche ikhabaane siicha.
[3] Ulla ibeenki usu rubeytiis gooche ka woriis inno tuse. Wora Haaggan la a ki Waakkhi 'Doorribeheene amuriis ka dahanteey soogesse, cheek iyidah.
[4] Eti an khadaab ichiiro la a ati Tiitohi kakhuufnaanki inno Kiriisto kakhuufno ka i'di weeleeye. Waakkhi Aabbaheene ichoow Yeesso Kiriistohi 'Doorribeheene ba kimaalaane nebey kaakaalaan.
[5] Kireete kaatabe, 'dee hili goorat dabare khumissa, toro la i'di goorat an kiidah u, ilkerengeeto tuumman ka ewweenki urur Kiriisto woyo soobihissa.
[6] Wihi Waakh gooche, eti urur Kiriisto woyo, a eti wohoo rucchul laka liikacheekan, a makhaabali makhaabassoo kalday on khabo, nyaakhutiis Kiriisto rummeeste, nyaakhutiis uskeeli buurenye i'daanu layeelo ichoow yeeddaagiwwaayyo liikacheekan.
[7] Toro la eti urur Kiriisto yaakhicho, hili Waakhe dahanohiis lagesse gone, a eti wohoo rucchul laka liikacheekan. A eti rannyaat ikhabine, holholo ieheynane, meleefu ieheynane, enenyet ijahine, jiti baabule ka chilim iyowan.
[8] Toro la a eti goobiis ka enenyet martiisti, haag on 'doono, samacchaarenye, fissane, munyeenye, isjeycho.
[9] Toro la a eti wori rummaate lakakhuufo laabche mujjum khuccho, 'dee eti wora ka 'doo'di addan uur miigoon yabuu'de toro 'doo'di wora tirrimo uskeelicho icheekin yabuu'd.
[10] I'di tahe 'doo'di ittaawenye weynaan iinkaanyitine, worassi indigir laa ka 'doo'd ekkeesti jira. Kach ka la a 'doo'doo Ya'huude Kiriisto rummeesti, 'doo'd Kiriisto a lakhandiyo essi.
[11] Tabe 'doo'da aficho hid. I'di tahe wahanyeyyoha kootte ikamaline icho enenyet abchaan ka, goobassi kulman wori rummaat a buucheen. Waha la jeenteti icho chilim i'doonaan on iyeelaan.
[12] Gorsatoo tichee goorat wihi iche tidah a mehe ya “'Doo'di Kireete, a 'doo'di lagarti been leh, a i'di binahi sussuujenye enenyet bakkicho toro la sey'ho lehe 'damaammee.”
[13] Ayta eta cheeke a rum. Maantaka tabe 'doo'da weyti leejaakhe, 'dee wihi rummaat mujjum a kakhuufeene,
[14] hawweesseti Ya'huude indigir ikhabin la iicho nabah isudine, amurreti 'doo'di yeedi rummaat 'dii'do la iicho raahin.
[15] 'Doo'di rubeyohicho ka eloo rucchul laka ikhabin, wahanyeyyohi jirota tuumman a leemunya. I'daasenyi 'doo'di bi'direnye Kiriisto irummeysan ka, walah tuumman a bi'dir. A mehe malassicho ichoow rubeyohichoki haag ichoow suujoon seley saaho a lakheerooche.
[16] 'Doo'da Waakh a garanna essa, i'daasenyi jiroti icho jiraan ka Waakh a 'dii'ddanyahiin. Weyti la'dii'ddanyahe, yeed ma daagaane, haaggoo rucchul laka yeelin ma yabuu'diin.