[1] I'daasenyi waha abda, ibeenneti 'da'ddaboot il weyti 'howlowa.
[2] Ebba awtiissa on 'doona, chilim 'doona, serey isgeecha, eylaja, enenyet me'de'ddeela, 'doo'di dele ma daago, kala'd mele, Waakh ma inkaanyito.
[3] Toro la 'doonin ma khabo, uskeel ma isikakuto, 'doo'di addan me'de'ddeela, ma isjeycho, binaawa, wihi haaggan aw ma ikhabo.
[4] Toro la aalassiis 'dub goocha, walah tuumman ka walah ma ibaalaane, weyti serey isgeechaane, wihi harrata Waakh 'dirihiis 'doonaan.
[5] 'Doo'di Waakh tuum raaho iskaayyeela, i'daasenyi miigti Wori Haaggan jiroticho ka a 'dii'daan. 'Doo'di i'dee buj.
[6] 'Doo'da gaasiiskoo goobab goya isgessa, deyyehoti 'da'ddaran booliya. Deyyehota uskeel a 'harche, suujoonki fil ittaawenye liimoono iche icho anta.
[7] Icho kol dakkhan wori Waakh a laabcha, i'daasenyi jirtuu rum aban ma yabuu'diin.
[8] 'Doo'da i'di goorat Yaanes ichoow Yaameres ba Muusa tirrimeen u runti Waakhe tirrima. Mali kheerenye khabaane, kakhuufnaanki icho Kiriisto kakhuufaan ka la a sookufeen.
[9] I'daasenyi tirrinnaankichoka foga ma leeleelaan. A mehe i'di goorat Yaanes ichoow Yaameres u, enenyet tuumman i'daanu 'dalankicho arga.
[10] I'daasenyi at rumanka wihi an 'doo'd abche ichoow dabateey ichoow mali an khabe a raahte. I'deey u Waakh a kakhuufte, samacchaare eheete enenyet tuumman a 'doonte, a garrahsatte,
[11] sina a lakoomhiche bolokh goya tabte. At sinayyohi ilkerengeetti Antiyookhiya ichoow Ikooniyo ichoow Luussira ka liiomhiche an garrahsade a garatta. I'daasenyi Waakh sinayyohaas tuumman a ikaribe.
[12] Rumanka la eti tuummane jeenteti usu ichoow Yeesso Kiriisto ba wohoo kalday yahiin u jiroti Waakh 'doono jirin 'doono sina a loomhicha.
[13] 'Doo'di uskeel kaassohti ichoow ki enenyet ekkeesti la weyti suujowaane, 'doo'd ekkeestaane icho la leekkeesta.
[14] I'daasenyi at orey on isoho, wihi goorat lakaabche at rummeysatti mujjum jurkhi. A mehe 'doo'di at runta kaabatte a garatta,
[15] toro la saggi uus at weel keeheet Chiirnaanneti munyee lakaabche a garatta. Chiirnaanneta la kikharaan a tabuu'de, 'dee ribnaan kiwoyta. Ribnaanka la kakhuufnaanki Yeesso Kiriisto lakakhuufo iche lakeela.
[16] Chiirnaanneti Waakh tuumman a ti neebsihi Waakh kasoouummante. Chiirnaanneta enenyet a iroontahe, a mehe enenyet walahe abissa, enenyet uskeeliis icheekta, enenyet khumissa, saggi enenyet jiroti fissan ijiro la abissa.
[17] I'da ka eti Waakh hili haaggan tuumman tuume haaggin yabuu'de, toro liitannabicha.