[1] Fiyupa lakikushqätapis kanan wilayäshayki. Lakikushqätaqa Jesucristupis y Espíritu Santupis musyanmi.
[2] Israel mayïkunapaq fiyupami lakikü. Paykunapaq yarpaptï shonqüpis seqaypami nanan.
[3] Israel mayïkuna Jesucristuman yärakur salvakuyänantami munä. Salvakuyänanpaq kaptinqa alimi kanman paykunapa trukan infiernuman qaykush kaptïpis.
[4] Israel runakunataqa Tayta Dios akrarqan wamrankuna kayänanpaqmi. Munayyuq kashqantapis paykunatami musyasirqan. Paykunawan pactuta rurarmi leyninkunatapis entregarqan. Imano adorayänanpaqpis yachasirqanmi. Promitishqankunapis paykunapaqmi kaykan.
[5] Paykunaqa Abrahampita, Isaacpita y Jacobpita miraqkunami kaykäyan. Jesucristupis Israel aylluchömi yurirqan. ¡Payqa lapanpaq munayyuq Diosmi kaykan! ¡Imayyaqpis alabash kaykuläsun! Amén.
[6] Jesucristuta Israel runakuna mana chaskikuyaptinpis ama yarpäshunsu Tayta Dios promitirkur mana cumpliykashqanta. Manami lapansu Israel runakuna Tayta Dios promitishqankunata chaskikuyanqa.
[7] Saynöpis manami lapansu Abrahampita miraqkuna wamran kaykäyan. Abrahamtami Tayta Dios nirqan: “Qamta promitishqäqa suriki Isaacpaq y paypita miraqkunapaqmi kaykan”.
[8] Sayno niptin manami lapansu Abrahampita miraqkuna Tayta Diospa wamrankuna kaykäyan, saypa trukanqa promitishqanta chaskikuyänanpaq Tayta Dios akrashqan kaqkunalami.
[9] Abrahamta promitirmi Tayta Dios nirqan: “Watan kutimuptï olqu wawayuqnami Sara kaykanqa”.
[10] Tayta Dios nishqanno yuriq wamräqa unay ayllunsi Isaacmi kash. Isaacwan Rebeca majasakäyaptinmi wawan milish yuriyarqan.
[11] Manaraq yuriyaptinmi Rebecata Tayta Dios nirqan: “Punta yuriq kaqmi qepa yuriq kaqpa munaynincho kanqa”. Payta sayno nirqan say milishkuna alita y mana alita manaraq rurayaptinmi. Manami alita rurashqanpitasu Tayta Dios pitapis akran, saypa trukanqa kikin munashqan kaqtami.
[13] Tayta Diospa palabranchöpis kaynömi qelqaraykan: “Jacobtami kuyarqä y Esaútanami chikirqä”.
[14] Sayno karqa Tayta Dios ¿lutantasuraq rurarqan? ¡Manami!
[15] Moiséstapis Tayta Dios kayno nirmi tantiyasirqan: “Kuyapashqä kaqtami kuyapä. Perdonayta munashqä kaqtami perdonä”.
[16] Sayno kaptin manami kikin runa munashqanpitasu o imatapis alita rurashqanpitasu Tayta Dios akran, saypa trukanqa kuyapashqan kaqtami pitapis akran.
[17] Egiptupa mandaqnin Faraónpaqpis Tayta Diospa palabran kaynömi nikan: “Maysaychöpis taq runakuna munayyuq kashqäta musyayänanpaqmi mandaq kanaykipaq qamta churashkä”.
[18] Saynömi Tayta Dios wakin runakunata kuyapan y wakintanami shonqunta chukruyäsin.
[19] Sayno niptï capaz niyämankiman: “Runakunapa shonqunta kikin chukruyaykäsirqa ¿imanirtaq jusayuq kayashqanta Tayta Dios nikan? Kikin sayno ruraptinqa ¿piraq michanman?”
[20] Sayno nirqa qam ¿pitaq kanki Tayta Dios imata rurashqantapis jamuränaykipaq? Mitu mankapis ruraqninta manami ninsu: “¿Imanirtaq saynöqa ruramashkanki?”
[21] Manka ruraqqa munashqannömi mitupita ruran. Say mitupitami juk pucilluta ruran fiestacho manijananpaq y juk pucillutana waran waran manijananpaq.
[22] Saynölami Tayta Diospis wakin runakunata castigananpaq destinarqan. Jusalikuyashqanpita rabyakur castigananpaq karpis manami juklasu castigan, sinöqa pacienciakurmi shuyaran.
[23] Wakin runakunatanami gloriaman pushananpaq destinarqan. Sayno destinarqan kuyapäkuq kashqanta musyasimänansipaqmi.
[24] Say kuyapashqan runakunaqa noqansimi kaykansi. Paymi akramashkansi Israel runa kashqapis y mana Israel runa kashqapis.
[25] Profëta Oseas qelqashqanchöpis kaynömi nikan: “Jäpa marka runakuna kayaptikipis wamräkuna kayashqaykitami niyäshayki. Mana kuyashqä runakuna kayaptikipis kananqa kuyapäyäshaykimi”.
[26] Kaynöpis qelqaraykanmi: “ ‘Qamkunaqa manami noqapasu kayanki’ niyäshushqayki partichöpis runakunami niyanqa: ‘Paykunaqa imayyaqpis kawaq Tayta Diospa wamrankunami kaykäyan’ ”.
[27] Wakin Israel runakunala salvash kayänanpaq kashqantami Isaías kayno qelqarqan: “Lamar kuchuncho aqushanöraq Israel runakuna saysika kayaptinpis walkaqlatami Tayta Dios salvanqa.
[28] Manapis aykälatanami Tayta Dios lapan runakunata juzganqa”.
[29] Isaías mastapis kaynömi qelqarqan: “Lapanta mandaq Tayta Dios juk ishkaylatapis kawaykaqta mana kacharimashqaqa Sodomano y Gomorranömi ushakashwan karqan”.
[30] Tantiyakushun. Mana Israel runakuna Diospa leyninkunata cumpliyänanpaq mana yarpachakuykarpis Jesucristuman yärakurmi salvakuyan.
[31] Israel runakunami isanqa Tayta Diospa leyninkunata cumpliypa salvakuyta munarpis salvakuyansu.
[32] ¿Imanirmi sayno salvakuyansu? Jesucristuman mana yärakurmi. Payman yärakuyänanpa trukanqa say leykunata cumpliyashqanmanmi yärakuyan. Saynöpami tunisikuq rumiman takakar ishkiyan.
[33] Tayta Diospa palabranchöpis kaynömi qelqaraykan: “ Siónmanmi takakäsikuq y tunisikuq rumita churä. Sayman takakarmi aska runakuna ishkiyanqa. Pipis payman yärakuq kaqqa manami manakaqlapaqsu yärakunqa”.