[1] Yarpäshun unay ayllunsi Abrahamta Tayta Dios imano perdonashqantapis.
[2] Alikunata rurashqanpita Tayta Dios perdonaptinqa Abraham alabakunmanmi karqan. Isanqa manami alikunata rurashqanpitasu payta perdonarqan, saypa trukanqa pay nishqanta criyishqanpitami.
[3] Tayta Diospa palabranpis kaynömi nikan: “Nishqanta criyiptinmi jusaynaqtana Abrahamta Tayta Dios chaskirqan”.
[4] Musyashqansinöpis arupakuq runa arushqanpita pägunta chaskinmi. Mana aruykar imatapis chaskirqa qaraytukuykanlami.
[5] Say japuymi jusansikunata Tayta Dios dembaldila perdonamansi. Manami alikunata rurashqansipitasu perdonamansi, sinöqa payman yärakushqansipitami.
[6] Tayta Dios dembaldila perdonashqan runa kushish kashqanpitami rey Davidpis kayno qelqarqan:
[7] “Kushishqami kawan Tayta Dios perdonashqan runaqa. Paypa jusankunataqa Tayta Dios manami yarparannasu.
[8] Kushishqami kawan jusaynaqtana Tayta Dios rikashqan runa”.
[9] ¿ Señalakush Israel runakunalasuraq perdonash kaykäyan? ¿Manasuraq señalaküni mana Israel runakunapis perdonash kaykäyan? Yarpachakushun Abrahamta Tayta Dios perdonaptin imano kashqanta. Nishqänöpis yärakuptinmi Abrahamta Tayta Dios jusaynaqtana chaskirqan.
[10] ¿Señalakuskiptinraqsuraq Abrahamta perdonarqan? Manami. Manaraq señalakuptinmi perdonarqan.
[11] Perdonaskirraqmi Tayta Dios Abrahamta nirqan señalakunanpaq. Sayno señalakurqan Tayta Diosman yärakushqanpita perdonashqanta mana qonqänanpaqmi. Saymi señalaküni kaqkunapis Abrahamno yärakur paypa ayllun kaykäyan. Saynöpami Tayta Dios paykunatapis perdonaykan.
[12] Saynölami señalakush kaqkunapis Abrahamno yärakur Abraham ayllu kaykäyan. Abraham ayllu kaykäyan manami señalakush kayashqanpitasu, saypa trukanqa Abrahamno manaraq señalakur yärakuyashqanpitami.
[13] Manami leykunata cumpliyashqanpitasu Abrahamta y paypita miraqkunatapis kay pasata qoykunanpaq Tayta Dios promitirqan, saypa trukanqa Tayta Diosman yärakuyashqanpitami.
[14] Leykunata cumpliqkunala Tayta Dios promitishqanta chaskiyänanpaq kaptinqa walälami kanman karqan Tayta Diosman yärakuyashqanpis. Tayta Dios promitishqanpis manami välinmansu karqan.
[15] Leyninkunata mana cumpliqkunataqa Tayta Dios castiganmi. Sayno kaptinpis say leykunata musyaykarpis manami cumplinsisu.
[16] Saymi leyninkunata cumplishqansipitasu Tayta Dios promitimashqansi salvacionta chaskinsi, sinöqa payman yärakushqansipitami. Saynöpami Israel runa karpis mana Israel runa karpis Abrahamno yärakushqaqa Tayta Dios kuyapämashpansi salvamansi. Abraham yärakushqanno Tayta Diosman yärakurqa Abraham ayllumi kaykansi.
[17] Abrahampaqqa Tayta Diospa palabranchöpis kaynömi qelqaraykan: “Aska nación runakunapa taytan kanaykipaqmi qamta churashkä”. Tayta Dios sayno nirqan payman Abraham yärakush kaptinmi. Tayta Diosmi wanushkunata kawarisimun y imapis mana kashqanpita imatapis kaman.
[18] Abrahamta promitirmi Tayta Dios nirqan: “Aska nación runakunapa taytan kaptikimi qampita miraqkuna yupaytapis mana atipaypaq kayanqa”. Say promitishqanta Tayta Dios imano cumplinanpaq kashqanta mana tantiyarpis Abrahamqa criyirqanmi.
[19] Sayno promitishqan wisanqa pachak (100) watayuqnami Abraham kaykarqan. Wamrayuq kananpaqpis awkinnami karqan. Warmin Sarapa killa qeshyanpis chawashnami karqan. Sayno kaptinpis Abrahamqa Tayta Diosmanmi yärakurqan.
[20] Manami janan shonqulasu yärakurqan, saypa trukanqa agradëcikurmi promitishqanman lapan shonqunwan yärakurqan.
[21] Payqa criyirqan promitishqanta Tayta Dios cumplinanpaq munayyuq kashqantami.
[22] Sayno yärakushqanpitami Tayta Dios jusaynaqtana chaskirqan.
[23] Qelqaraykashqancho nishqanno manami Abrahamlatasu Tayta Dios perdonarqan,
[24] sinöqa noqansitapis perdonamansi Señorninsi Jesucristuta kawarisimuq Tayta Diosman yärakushqami.
[25] Jusalikushqansipita noqansi rayku wanunanpaqmi Jesucristuta Tayta Dios kachamurqan. Perdonamänansipaqmi Tayta Dios kawarisimurqan.