[1] Lapan autoridäkunata Tayta Dios churash kaykaptinqa paykunata cäsukuyay.
[2] Autoridäkunata mana cäsukurqa Tayta Diostapis manami cäsukuyansu. Autoridäkunata mana cäsukuq kaqtaqa Tayta Diosmi juzganqa.
[3] Autoridäkunata cäsukuqkunaqa manami mansa mansalasu puriyan. Mana cäsukuqkunami isanqa mansayan. Sayno mana puriyänaykipaq autoridäkunata cäsukuyay. Cäsukuyaptikiqa paykuna alimi rikayäshunki.
[4] Lutanta rurashqaqa autoridäkuna castigamäshunmi. Paykunataqa Tayta Dios churash ali ruraqkunapa favornin sharkuyänanpaq y lutan ruraqkunata castigayänanpaqmi. Manami manakaqlapaqsu autoridä kaykäyan.
[5] Sayno kaykaptinqa autoridäkuna nishqankunata cäsukushun. Manami castigamänansipaq kaptilansu cäsukushun, saypa trukanqa Tayta Diosta respitarmi.
[6] Runakunata shumaq rikarqa Tayta Diostami autoridäkuna sirviykäyan. Paykunata Tayta Dios churash kaykaptinqa impuestukunatapis pägashun.
[7] Cumpliyänaykipaq kaqkunata lapanta cumpliyay. Impuestuta pägayänayki kaptinqa pägayay. Pitapis respitayänayki kaptinqa respitayay. Pitapis alabayänayki kaptinqa alabayay.
[8] Pipapis jaqan karqa pägayay. Jaqa kaynikita pägayänaykipaq yarpachakuyashqaykinöla kuyanakuyänaykipaqpis yarpachakuyay. Runa mayinsita kuyarqa Tayta Diospa lapan leyninkunatami cumpliykansi.
[9] Say leykunacho kayno nirmi qelqaraykan: “Majaykita ama jarukunkisu. Runa mayikita ama wanusinkisu. Ama suwakunkisu. [Manakaqta pitapis ama tumpankisu.] Runa mayikipa imaykankunatapis ama munapankisu”. “Kikiki kuyakushqaykino runa mayikita kuyanki” nishqan mandamientuta cumplirqa lapan mandamientukunatami cumpliykansi.
[10] Runa mayinsita kuyarqa manami contran sharkunsisu. Saynöpami Tayta Diospa lapan leyninkunata cumpliykansi.
[11] Jesucristo kutimur salvamänansipaq kaq junaq cercachönami kaykan. Sayno kaykaptinqa punukashno kashqansipita rikchashun.
[12] Pasa waränanpaqnöna kaykaptinqa jusalikuykunata kacharir Tayta Dios munashqannöna kawanansipaq shumaq yarpachakushun. Sakäpakushno kawanansipa trukanqa aksichönöna kawashun. Espädan kamarikush soldädu kaykaqno noqansipis kaykäshun.
[13] Aksichöno kawaykarqa mana jusalikuypana kawashun. Wakin runakuna shuntakaykur mikur upyar kakuyaptinpis noqansiqa ama sayno kashunsu. Saynöpis majansita ama jarukushunsu ni majaynaq karpis jukwan jukwan kakushunsu. Ama qayapänakushunsu ni chikinakushunsu.
[14] Saypa trukanqa qanra mödanata loqtikur kachariyashqaykino jusalikuykunata kacharir Jesucristupa makincho kawayay. Lutanta rurayta munarpis ama rurayaysu.