[1] Jesucristuman yärakuq mayinsikuna shumaq mana tantiyakuyaptinpis ama jamuräyaysu. Tantiyayashqaykino mana tantiyayaptinpis paykunawan ama churakäyaysu.
[2] Wakinkuna yarpaykäyan aysata mikur mana jusalikuyashqanta y wakinkunanami yarpaykäyan aysata mikur jusalikuyashqanta.
[3] Aysata mikuqkunapis Tayta Diospa wamranmi kaykäyan. Sayno kaptinqa aysata mana mikuq kaqqa ama jamuräsunsu aysata mikuq kaqta. Aysata mikuq kaqpis ama jamuräsunsu aysata mana mikuq kaqta.
[4] Qam ¿pitaq kanki Jesucristupa ashmayninta juzganaykipaq? Jusalikuptinqa patronnin Jesucristumi juzganqa. Imano kaptinpis mana jusalikunanpaq Jesucristumi yanapaykan.
[5] Saynölami wakin yärakuq mayinsikuna yarpäyan Tayta Diosta alabanansipaq reqish junaqla shuntakänansipaq kashqanta. Wakinnami yarpäyan Diosta alabanansipaq lapan junaqpis ali kashqanta. Reqish junaq shuntakarpis o wakin junaq shuntakarpis shumaq yarpachakuyay mayqan junaq shuntakäyänaykipaq kashqantapis.
[6] Shuntakaykur Tayta Diosta alabayänaykipaq juk junaq mas ali kashqanta yarpaq runapis Tayta Diosta cäsukuyta munarmi sayno yarpan. [Diosta alabayänaykipaq lapan junaq ali kashqanta yarpaq runapis Tayta Diosta cäsukuyta munarmi sayno yarpan.] Aysata mikuqpis Tayta Diosta agradëcikuykur paypa jutinchömi mikun. Aysata mana mikuqpis Tayta Diosta agradëcikurmi aysaynaq mikuykunatana paypa jutincho mikun.
[7] Manami kikilansipaqsu kawansi y manami kikilansipaqsu wanunsi.
[8] Kawarpis Tayta Diospaqmi kawaykansi. Wanurpis Tayta Diospaqmi wanushun. Saymi kawarpis wanukurpis Jesucristupa makincho kaykansi.
[9] Kawaykaqkunapapis y wanukuqkunapapis Señornin kananpaqmi Jesucristo wanush y wanushqanpita kawarimush.
[10] Lapansipis paypa makincho kaykarqa ¿imanirtaq yärakuq mayinsikunata juzgaykäyanki? Tayta Diospa nawpanman chaptinsi lapansitami juzgamäshun.
[11] Tayta Diospa palabranchöpis kaynömi qelqaraykan: “Noqa Tayta Diosmi jurar nï: Lapanmi nawpäman qonqurpakayämunqa. Lapanmi cäsukayämänanpaq niyämanqa”.
[12] Sayno kaptinqa lapansimi Tayta Diosta cuentata qoshun.
[13] Tayta Dios juzgamänansipaq kaykaptinqa yärakuq mayinsikunawan amana juzganakushunnasu. Yärakuq mayinsi imatapis rurashqansita rikar qepaman kutikunanpaq kaptinqa sayta ama rurashunsu.
[14] Jesucristo discïpulunkunata yachasish kaptinmi lapan mikuypis aysapis ali kashqanta musyä. Sayno kaptinpis wakin yärakuq mayinsikuna mana tantiyarmi aysata mikur jusalikuykäyashqanta yarpäyan. Sayno yarparmi aysata mikur jusalikuyan.
[15] Yärakuq mayiki lakikuyänanpaq kashqanta musyaykar aysata mikurqa manami paykunata kuyaykäyankisu. Paykunatapis salvananpaq Jesucristo wanush kaykaptinqa aysata ama mikuyaysu. Mikuyaptikiqa qajakäyashpan manami Jesucristuman yärakuyanqanasu.
[16] Saynöpis yärakuq mayiki contrayki rimananpaq kaptinqa aysata ama mikuyaysu.
[17] Tayta Dios mandaykashqancho kawayqa manami munashqansita mikunansipaqsu ni upunansipaqsu kaykan, saypa trukanqa alilata ruranansipaq, pïmaywanpis ali kawanansipaq y Espíritu Santu yanapämash kushish kawanansipaqmi.
[18] Jesucristuta sirvir sayno kawarqa Tayta Dios munashqannömi kawaykansi. Sayno kawashqaqa manami pipis jamurämäshunsu.
[19] Sayno kaptinqa shumaq yarpachakushun yärakuq mayinsikunawan ali kawanansipaq y shakyäsinakur Tayta Dios munashqanno kawanansipaq.
[20] Tayta Dios kamashqan lapan mikuy ali kaptinpis salvashqan kaqkuna qepaman kutikuyänanpaq kaptinqa say mikuyta ama mikuyaysu. Mikurqa mana alitami rurayanki.
[21] Yärakuq mayinsi [lakikunanpaq] o qepaman kutikunanpaq kaptinqa aysatapis ama mikuyaysu ni vïnutapis ama upuyaysu. Saynöla imapis jusa kashqanta yarpäyaptinqa ama rurayaysu.
[22] Imatapis mikur mana jusalikuyashqaykita tantiyarqa mana wilakuylapa shonqulaykicho sararäyay. Mikuyänaykipaq ali kashqanta tantiyarqa kushishqami kayanki.
[23] Aysapis o ima mikuypis mana ali kashqanta yarparqa ama mikuyaysu. Mana ali kashqanta yarpaykar mikurqa jusalikuykäyankimi. Saynölami mana ali kashqanta yarpaykar imatapis rurarqa jusalikuykäyanki.