[1] Wawqi panikuna, Tayta Diostami lapan shonqüwan ruwakü Israel mayïkuna salvakuyänanpaq.
[2] Paykuna Tayta Diosta wiyakuyta munarpis manami tantiyayansu
[3] imano perdonamashqansitapis. Saymi yarpäyan Diospa leyninkunata cumplirraq perdonash kayänanpaq kashqanta. Perdonash kayta munarpis manami Jesucristuta chaskikuyansu.
[4] Jesucristo shamushna kaptin manami Diospa leyninkunata cumplirsu perdonash kaykansi, saypa trukanqa Jesucristuman yärakurmi. Payman yärakuq kaqtaqa lapantami Tayta Dios perdonan.
[5] Leykunata cumplirraq Tayta Dios munashqanno kawayta munaqkunapaqqa Moisés kaynömi qelqarqan: “Leynïkunata cumpliq kaq runaqa lapantami cumplinman”.
[6] Jesucristuman yärakurraq perdonash kashqansita tantiyarmi kayno ninsi: “Shonqunsicho ama yarpäshunsu: ‘¿Piraq jana pasaman wisanman?’ nir”. (Say nishqannölami pipis jana pasamanraqsu aywanman Jesucristuta kay pasaman pushamunanpaq.)
[7] “Saynöpis ama yarpäshunsu ‘¿piraq pasa rurinman yaykuykunman?’ nir”. (Say nishqannölami pipis wilakuyninta musyayta munar pasa rurinmanraqsu yaykunman Jesucristuta kawarisimunanpaq.)
[8] Saypa trukanqa kaynömi ninsi: “Tayta Diospa wilakuynin shimikikunacho y shonquykikunachömi kaykan”. Saymi wilakuyninta wilakur kayno ninsi:
[9] Jesucristo ämuyki kashqanta nirqa y wanushqanpita Tayta Dios kawarisimushqanta lapan shonquykikunawan criyirqa salvashqami kayanki.
[10] Lapan shonquykiwan criyiyaptikiqa Tayta Dios perdonayäshunkimi. “Señor Jesucristuqa ämümi kaykan” niyaptikiqa Tayta Dios salvayäshunkimi.
[11] Tayta Diospa palabranpis kaynömi nikan: “Pipis payman yärakuq kaqqa manami manakaqlapaqsu yärakunqa”.
[12] Saymi Israel runatapis mana Israel runatapis yärakuptinqa Tayta Dios perdonan. Lapansipapis japalan Diosninsi karmi manakuq kaqtaqa pïmaytapis salvan.
[13] Tayta Diosmi palabrancho nikan: “Noqata manakamaq kaqtaqa pïmaytapis salvashaqmi”.
[14] ¿Imanöparaq salvananpaq manakuyanqa Jesucristo salvamaqninsi kashqanta manaraq criyirqa? ¿Imanöparaq criyiyanqa wilakuyninta manaraq wiyarqa? ¿Imanöparaq wiyayanqa pipis mana wilapaptinqa?
[15] ¿Imanöparaq wilapanqa wilakunanpaq pipis mana kachaptinqa? Tayta Diospa palabranchöpis kaynömi qelqaraykan: “Ali wilakuyta apamuqkuna seqaypa kushikuypaqmi kaykäyan”.
[16] Isanqa wilakuyaptinpis manami lapan runakunasu Jesucristupa ali wilakuyninta cäsukuyan. Isaías qelqashqanchöpis kaynömi nikan: “Tayta Dios, wilakuyashqäta ¿piraq chaskikush?”
[17] Imano kaptinpis Jesucristupa ali wilakuyninta wiyarraqmi payman pipis yärakun.
[18] Sayno kaptinpis ¿manasuraq wilakuyninta Israel runakuna wiyayash? Paykuna maynami wiyayash. Tayta Diospa palabranchöpis kaynömi qelqaraykan: “Wilakuyninqa maysaychömi musyakaykan. Palabrankunaqa pasa kuchunyaqmi chaykan”.
[19] Say wilashqankunata musyaykarpis ¿manasuraq Israel runakuna tantiyayash? Paykunaqa tantiyayarqanmi. Moiséspis kaynömi qelqarqan: “Jäpa marka runakunatana yanaparmi qamkunata rabyanäsishayki. Mana tantiyakuq runakunata chaskikurmi qamkunata lakikasishayki”.
[20] Saynölami Isaíaspis kayno qelqarqan: “Mana ashimaqkunatami parlapashkä. Mana ruwakamaq runakunatami yanapashkä”.
[21] Israel runakunapaqmi isanqa kayno qelqarqan: “Mana cäsukamaq runakunaman qoyay qoyaymi rikräta makyarashkä”.