[1] Chay hinaqa, ancha munakusqay, hinallataq yuyarinay wawqe-panaykuna, qankunan kusikunayqa, hinallataq koronayqa kapuwankichis. Ñoqaqa anchatapunin munakuykichis. Señorllapipunitaq qaqata sayaychis.
[2] Ebodiatawan, Sintikitawanmi Señorpi ch'ulla yuyaylla kayman allipunanankupaq balikuni.
[3] Cheqaq llank'aqmasíy, chay warmikunata yanapaykunaykipaq balikuyki. Paykunaqa, allin willakuyta willanaypaqmi yanapawarqanku. Hinallataq, Clementetapas, wakin llank'aqmisiykunatapas yanapallarqankutaqmi. Chay llank'aqmasiykunaq sutinkuqa, kawsay libropi qelqasqañan kashan.
[4] ¡Señorpi q'ochukullaychispuni! Huktawanmi nini: ‘¡Q'ochukullaychispuni!’ nispay.
[5] Munakuq kasqaykichista, llapa runakuna yachachunku. ¡Señorqa qayllaykamushanñan!
[6] Amapuni imamantapas llakipakuychischu. Aswanpas, grasiasta qospaykichis, Diosman tukuy parlayniykichispi, hinallataq balikuyniykichispi mañakuyniykichista Diosman reqsichiychis.
[7] Diospa thak kayninqa, llapa runaq yuyayninkumanta aswan hatunmi. Diospa chay thak kaynintaq sonqoykichista, hinallataq yuyayniykichista Cristo Jesuspi waqaychanqa.
[8] Chay hinaqa wawqe-panaykuna, tukuy cheqaq kaypi, tukuy respetana kaypi, tukuy chanin kaypi, tukuy ch'uya kaypi, tukuy munakuq kaypi, hinallataq tukuy allin reqsisqa kaqkunapi yuyaymanaychis. Sichus imakunapas balorniyoq kan, otaq runakunaq hatunchananpaq hina kan chayqa, chaykunapiyá yuyaymanaychis.
[9] Imatachus ñoqamanta yachasqaykichistapas, chaskisqaykichistapas, uyarisqaykichistapas, hinallataq ñoqapi rikusqaykichistapas, ruwashallaychispuni. Thak kay qokuq Diostaq qankunawan kashanqa.
[10] Wakmantapas yuyarikullawankichistaqmi. Chayraykun anchatapuni Señorpi q'ochukurqani. Ñoqamantaqa yuyasharqankichispunin, ichaqa manan imaynanmanta yanapawayta atisharqankichischu.
[11] Ñoqaqa, imachus kapuwasqanwan kusisqa kayta yachaniñan. Chaytaqa, manan pisichikusqayraykuchu nini.
[12] Ñoqaqa, wakcha hina kawsaytapas, hinallataq kaqniyoq hina kawsaytapas yachanin. Tukuy cheqaspiña kaspaypas, hinallataq tukuy imaynapiña tarikuspaypas, saksaykusqa kanaypaqpas, hinallataq yarqasqaña kanaypaqpas yachasqañan kani. Kaqniyoq kanaypaqpas, hinallataq pisichikuypi kanaypaqpas yachasqan kani.
[13] Kallpachaqniy Cristopin tukuy ruwaytaqa atini.
[14] Chaywanpas ñoqaq ñak'ariyniypi ñak'ariysiwaspaykichisqa, allintan ruwarqankichis.
[15] Filipos llaqtayoq runakuna, qankunapurapi allin willakuy qallariqtin imakunachus pasawasqantaqa, qankunapas yachallankichistaqmi. Masedonia probinsiamanta lloqsimuqtiyqa, manan mayqen iñiq t'aqapas qoypipas, nitaq chaskiypipas yanapawarqankuchu. Aswanpas qankunallan yanapawarqankichis.
[16] Tesalónika llaqtapi kashaqtiypas, imachus pisiwasqankunataqa iskay kutitan apachimuwarqankichis.
[17] Manan qokuykunatachu maskashani. Aswanpas Señorpaq ruwasqaykichispa ruruynin qankunaq kuentaykichispi askhayanantan maskhashani.
[18] Ichaqa, llapantañan chaskini, hinan askha kapuwan. Epafroditoq chawpinta apachimuwasqaykichistapas chaskirqanin. Hinan mana imapas pisiwanchu. Chaytaqa, sumaq q'apashaqta hina, Diospa chaskinanpaq sakrifisiota hina, hinallataq Diospa sonqonman chayaqta hinan chaskirqani.
[19] Diosniymi, Cristo Jesuspi k'ancharishaq cheqaspi, qhapaq kayninman hina, tukuy imachus pisisqasunkichistaqa qosunkichis.
[20] Dios Yayanchis wiñay-wiñaypaq hatunchasqa kachun. Ahinapuni kachun.
[21] Llapallan Cristo Jesuspi t'aqasqakunata napaykapuwankichis. Ñoqawan kashaq wawqe-panakunan napaykamusunkichis.
[22] Llapallan t'aqasqakunan napaykamusunkichis. Aswantaraqqa, rey Cesarpa wasinpi kaqkunan napaykamusunkichis.
[23] Señorninchis Jesucristoq allinpaq qokuynin llapallaykichiswanpuni kachun. Ahinapuni kachun.