[1] Chay hinaqa, Cristopi sonqochaykuy, hinallataq munakuywan kallpanchaykuyqa kashanmi. Chay hinallataq, Espiritupi huk sonqolla kawsaypas, sonqomanta munakuypas, hinallataq yanapaykuypas kashanmi.
[2] Sichus chaykunayoq kashankichis chayqa, huk yuyayllayoq, huk munakuyllayoq, huk sonqolla, hinallataq ch'ulla yuyayllayoqpuni kashaychis. Chay hinapitaq, kusikuyniyta hunt'apaychis.
[3] Ama imatapas qankunaq munasqallaykichistachu, nitaq uma hoqarinaykichispaqchu ruwaychis. Aswanpas huch'uyaykukuywan, qankuna kikiykichismanta, kurakta hinatapuni hukkunatapas allinpaq qhawariychis.
[4] Ama sapanka hukpas paykuna kikinkuq allinnillankuta maskhaspallachu kashachunku. Aswanpas sapanka huk wakinkunaq allinninkuta qhawarispallapuni kashachunku.
[5] Imaynan Cristo Jesuspa yuyaykuynin karqan, chay hinallataq qankunaq yuyaykuyniykichispas kachun.
[6] Payqa, Diospuni kashaspapas, Dios kayninmanqa manan hap'ipakurqanchu.
[7] Aswanmi pay kikillanmantapuni, atiyniyoq kayninta saqeykamuspa, aycha kuerpowan p'achaykukuspa, kamachiman tukurqan.
[8] Aycha runa kayninpitaq, pay kikin huch'uyaykukuspa, ¡krus patapi wañunankamaraq kasukurqan!
[9] Chaymi Diosqa, aswan altokamaraq hoqarirqan. Hinan huk sutita llapan sutikunamantapas aswan allin kaq sutitaraq churarqan.
[10] Chay hinapin, llapallan hanaq pachapi kaqkunapas, hallp'a pachapi kaqkunapas, hinallataq hallp'a pachaq ukhunpi kaqkunapas Jesuspa sutinpi qonqorikunqaku.
[11] Hinan Dios Yaya hatunchasqa kananpaq, hinallataq Jesucristopas Señorpuni kasqanta llapa runakuna willakunankupaq, chay sutitaqa churarqan.
[12] Chay hinaqa, munakusqay wawqe-panaykuna, imaynan qankunaqa kasukullawarqankichis, chay hinallatapuni kunan mana chaypi kashaqtiypas, aswantaraq kasukuwaychis. Qespikuyniykichistapas manchakuywan, hinallataq khatatataywan ñawpaqman apaychis.
[13] Ichaqa, Diosmi qankunapi imapas ruway munaq kayta, hinallataq ruwanaykichispaqpas churan. Chaytaqa, munayninman hinan ruwan.
[14] Tukuy imatapas ama rimapakuspalla, nitaq churanakuspalla ruwaychis.
[15] Mana imamantapas huchachana, hinallataq sut'i sonqoyoqmi kanaykichis. Chay hinapin kay q'ewisqa, hinallataq waqllisqa runa-miray chawpipi, mana qhelliyoq Diospa wawankuna kankichis. Chaypitaqmi, qankunaqa kay pachapi, qoyllurkuna hinaraq k'anchashankichis.
[16] Hinallataq, kawsachiq simimanpas hap'ipakuspa kawsaychis. Chay hinapin kallpachakusqay, hinallataq llank'asqaypas mana yanqapaqchu kasqanta yachaspay, Cristoq p'unchayninpi rimarikusaqpuni.
[17] Sakrifisio haywakuypa patanman, hinallataq qankunaq iñiypi llank'ayniykichispa patanman libasión hina hich'aykusqaqa kaymanmi. Sichus chay hina kayman chayqa, chaywanmi kusikuni, hinallataq llapaykichiswan q'ochukuni.
[18] Chay hinallataq, qankunapas ñoqawan kusikuychis, hinallataq q'ochukullaychispuni.
[19] Señor Jesús munaqtinqa, usqhaylla Timoteota kachamuytan suyashani. Imaynachus qankuna kashasqaykichista yachaspay, kallpachasqa kanaypaqmi kachamusqaykichis.
[20] Manan pipas Timoteo hina, yuyaykuqmasiy, hinallataq cheqaq sonqowan qankunamanta llakikuqqa kapuwanchu.
[21] Llapallankun, kikinkuq allinnillankuta maskhanku, manataq Cristo Jesuspa kaqninkunatachu maskhanku.
[22] Ichaqa, Timoteoq allin kawsayniyoq kasqantaqa, yachankichismi. Paymi, imaynan huk wawa taytanta llank'aysin, chay hinata allin willakuypi llank'aysiwarqan. Chaytapas yachallankichistaqmi.
[23] Chayrayku, imaynachus kasaq chayta yachakuspayña, paytaqa usqhaylla qankunaman kachamuyta suyashani.
[24] Ichaqa, ñoqapas qankunaman usqhaylla hamunaypaq, Señorpi sonqo churayniyoqpunin kashani.
[25] Chaywanpas, wawqey Epafroditota kachamuyniyqa nesesariopuni kasqantan yuyaykurqani. Payqa llank'aypi yanapawaqniy, hinallataq soldadomasiymi. Payqa qankunamanta willawaqniy, hinallataq imakunachus pisiwasqanpi yanapaykuwaqniymi.
[26] Epafroditoq onqosqa kasqantaqa uyarirqankichismi. Chaymi payqa, llakisqa kashan. Hinan llapallaykichista rikuykuytapuni munashasunkichis.
[27] Cheqaqtapunin sinchi onqosqa yaqa wañunanpaq hinaraq kasharqan. Ichaqa, Diosmi payta yanapaykurqan. Manan payllatachu, aswanpas mana sinchi llakikuywan ñit'iykusqa kanaypaqmi onqoyniymanta ñoqatapas yanapaykullawarqantaq.
[28] Chaymi, yapamanta payta rikuspa kusikunaykichispaq, hinallataq ñoqapas manaña qankunamanta llakikushanaypaq, tukuy sonqoymanta paytaqa kachamushaykichis.
[29] Tukuy kusikuyniykichiswan Epafroditotaqa Señorpi chaskiykuychis. Hinallataq pay hina runakunatapas allinpaqpuni qhawariychis.
[30] Cristoq llank'ananta munakusqanraykun payqa, onqoyuspan yaqa wañuka purqan. Qankunaqa, ñoqapaq ruwanaykichista manan tukurqankichischu. Epafroditotaqmi ichaqa, qankunaq rantiykichispi chay mana tukusqaykichista tukuparqan. Chayta ruwaspantaqmi kawsaynintapas sasachayman churarqan.