[1] Chay hinaqa wawqe-panaykuna, Señorpi q'ochukullaychispuni. Ñoqapaqqa, qankunaman sapa kuti kasqallantataq qelqamuyniyqa manan sasachu. Aswanpas, qankunaq allillanpuni kanaykichispaqmi qelqamuniqa.
[2] Alqokunamanta, mana allin ruwaqkunamanta, hinallataq aycha kuerpo wit'uqkunamantapas kuidakuychis.
[3] Ñoqanchismi sirkunsisionqa kanchis. Ñoqanchismi espiritupi Diosta hatunchaqkunaqa kanchis. Manataqmi sonqo churayninchisqa aycha kuerpopichu kashan. Chaymi Cristo Jesusmantaqa rimarikunchispuni.
[4] Ñoqa kikiypapas aycha kuerpopi sonqo churayniyqa kanmanraqmi. Sichus mayqenpas aycha kuerpopi sonqo churayta yuyaykun chayqa, ñoqaqpas chay yuyaykuyniyqa, aswanraqmi kashan.
[5] Pusaq p'unchayniyoq kashaqtiymi sirkusidawarqanku. Israelpa miraynin Benjamín ayllumanta hebreo runaq churin hebreopunin kani. Kamachikuy Simiman hina fariseotaqmi kani.
[6] Kamachikuy Simiman allin hap'ipasqa kaspaymi, iñiq t'aqataqa qatiykacharqani. Chay Kamachikuy Simiman hinataqmi, chanin kawsayniypi, mana imamanta huchachana karqani.
[7] Chay imaymanakunataqmi ñoqapaqqa ganansia kapuwarqan. Ichaqa tukuy chay imaymanakunatataqmi, Cristorayku mana baleqpaq qhawaripuni.
[8] Aswantaraqqa tukuy imaymanakunatawanpas, mana baleqpaqmi qhawaripuni. Señorniy Cristo Jesusta allin reqsisqayraykun tukuyta wikch'upuni. Hinallataq Cristota tarisqayraykun tukuy chaykunata q'opata hinaña qhawaripuni.
[9] Hinallataq, ñoqaqa manan Kamachikuy Simipi kikiypa chanin kayniywan tarisqa kaytachu munani. Aswanpas, Cristopi iñisqayraykun, chanin tarisqa kaytaqa munani. Chay chanin kaytaqmi, iñiypa chawpinta Diosmanta hamun.
[10] Pay kikinta, hinallataq kawsarimpuyninpa atiynin reqsiytan munashanipuni. Hinallataq, ñak'arisqanpi ñak'ariysikuqmasin kaytapas yuyaykuniñan. Chay hinapin, kawsayniypipas, Cristo imaynan wañuyninpi karqan, chay hina kallasaqtaq.
[11] Chay hinapin, wañukapuqkunaq kawsarimpuyninpiqa, imaynanmantapas tarikusaqpuni.
[12] Manan chaymanqa ayparuniñan niymanchu. Nitaq k'apakmi kani niymanpaschu. Aswanmi, imapaqchus Cristo Jesusqa hap'iruwarqan, chayman ichapas aypayman nispay kallpachakushani.
[13] Wawqe-panaykuna, ñoqa kikiypas manan chaymanqa aypaniraqchu. Ichaqa kayllatan ruwashani: Llapan ñawpa kawsayniyta qonqapuspaymi, ñawpaqeypi kaqkunaman aypanaypaq kallpachakushani.
[14] Chay hinapin maymanchus chayana Diospa qosqan premioman aypanaypaq qatikushani. Chay hinapin Diospa hanaqmanta Cristo Jesuspi waqyawasqan premioman aypanaypaq kallpachakushani.
[15] Chay hinaqa, llapallanchis iñiypi allin takyasqa kaqkunaqa, chay hinallatapuni yuyaykusunchis. Sitaqchus huk hinata yuyaykunkichis chayqa, Diosmi chaytaqa qankunaman sut'inchallasunkichistaq.
[16] Chay tukuywanpas maykamachus aypasqanchisman hina, huk kamachikuyllayoq kawsasunchis. Hinallataq ch'ulla yuyayllawan qatikusunchis.
[17] Wawqe-panaykuna, ñoqata qatichikuqkuna kaychis. Hinallataq chay hina allin puriqkunaq imaynatachus kawsasqankuta allintapuni qhawaychis. Ñoqaykuq kawsasqaykuta hinataq kawsaychispas.
[18] Askhan, Cristoq krusninpa kontranpi kaqkunaqa purimushanku. Chay runakunamantaqa, askha kutitañan nirqaykichis. Kunantaqmi waqaspayraq nillaykichistaq.
[19] Paykunaq p'uchukayninqa, wañuy ñak'ariymi kanqa. Paykunaqa, wiksanku diosniyoqmi kanku. Hinallataq p'enqay ruwasqankumanta hatunchakuqmi kanku. Hallp'a pacha kaqkunallapitaqmi yuyayninkupas kashan.
[20] Ñoqanchispa llaqtanchismi ichaqa, hanaq pachapi kashan. Chayllamantataqmi Qespichiq Señor Jesucristopas hamunqa. Chaytaqa, suyakushanchispunin.
[21] Paymi, paypa k'ancharishaq kuerponman rikch'akuq kananpaq, kay huch'uyaykuchisqa kuerponchista t'ikranqa. Payllataqmi, kamachikuq atiyninman hina, tukuy imaymanakunatapas hap'ishan.