[1] Ñoqa Pabloqa, Diospa munayninman hinan, Jesucristoq apostolnin kani. Ñoqawanmi wawqenchis Timoteopas kashan.
[2] Kolosas llaqtapi kashaq Cristopi wawqe-panakunamanmi qelqamuykichis. Qankunaqa, t'aqasqakuna, hinallataq hunt'aqkunan kankichis. Dios Yayanchispa, hinallataq Señorninchis Jesucristoq allinpaq qokuyninpas, thak kayninpas qankunawanpuni kachun.
[3] Diosman parlayniykupin, qankunamanta Señorninchis Jesucristoq Yayan Diosman grasiasta qoshallaykupuni.
[4] Cristo Jesuspi iñiyniykichismanta, hinallataq llapan t'aqasqakunapaq munakuyniykichismantapas uyarirqaykun.
[5] Hanaq pachapi waqaychasqa kashaq, suyakuyniykichisraykun Diosmanqa grasiasta qoshallaykupuni. Chay suyakuyqa, cheqaq allin willakuy simiq chawpintan hamun. Chaytan qankunaqa, ñawpaqmantaraq uyarirqankichisña.
[6] Chay allin willakuyqa, imaynatachus teqsimuyuntinman chayamurqan, chay hinallatataqmi qankunamanpas chayamullarqantaq. Hinan, Diospa allinpaq qokuyninta uyarisqaykichis, hinallataq cheqaqmantapuni entiendisqaykichis p'unchaymantapacha wiñaspa ruruta rurushan.
[7] Hinallataq, munakusqanchis kamachimasinchis Epafrasmanta yachaqakur- qankichis. Qankunaq allinniykichispaq Cristoq hunt'aqpuni llank'aqninqa paymi.
[8] Payllataqmi Espiritupi munakuyniykichismantapas sit'inchawarqanku.
[9] Chayraykun, uyarisqayku p'unchaymantapacha, qankunapaq mana sayk'uspa, Diosman parlayniykupi mañapushaykiku. Llapan yachaypipas, llapan espiritual kaq entiendiypipas Diospa munayninta yachaywan hunt'aykusqa kanaykichispaqmi mañapushaykiku.
[10] Chay hinapin, Señorpa kaqkuna hinapuni, tukuy imapi payta kusichispa purinaykichispaq mañapushaykiku. Hinan tukuy allin ruwaykunata rurunaykichispaq, hinallataq Diosta reqsiypi wiñanaykichispaq mañapushaykiku.
[11] Tukuypi qaqata sayanaykichispaq, hinallataq pasiensiayoq kanaykichispaqmi mañapushaykiku. Diospa k'ancharishaq atiyninman hina, tukuy kallpawan kallpachasqa kanaykichispaqwanmi mañapushaykiku.
[12] Yayanchismi ñoqanchista k'anchaypi t'aqasqakunawan erensiata chaskinanchispaq hina ruwawarqanchis. Chaymi kusikuywan grasiasta qonchis.
[13] Paymi, laqha-tutayaqpa kamachikuyninmanta kacharichiwarqanchis. Hinaspataq munasqan Churinpa qhapaq suyunman pusawarqanchis.
[14] Hinan Churinpa yawarninwan rantipapuwarqanchis. Hinaspataq huchanchiskunatapas pampachawarqanchis.
[15] Cristoqa mana rikusqanchis Diospa rikch'ayninmi. Hinallataq llapan kamasqa kaqkunaq patanpi kaq phiwitaqmi kanpas.
[16] Tukuy imaymanakunataqa, Criston kamarqan. Hanaq pachapi kaqkunatapas, hallp'a pachapi kaqkunatapas, tukuy rikusqanchiskunatapas, tukuy mana rikusqanchiskunatapas, kamachikuy tiyanakunatapas, munayniyoqkunatapas, umalliqkunatapas, kamachikuyniyoqkunatapas, llapallantan Cristoqa pay kikinpa chawpinta, hinallataq payllapaqtaq kamarqan.
[17] Tukuy imamantapas ñawpaq kaqqa, paymi. Hinallataq tukuy chay imaymanakunatapas paypunin hap'ishan.
[18] Cristoqa, kuerpoq umanmi. Chay kuerpoqa, iñiq t'aqan. Wañusqakunamanta ñawpaq kaq phiwi kawsarimpuq kaqpas payllataqmi. Tukuy imaymanakunapi hatun kananpaq, umapas payllataqmi.
[19] Cristopin Diospa tukuy Dios kayninqa hunt'asqa tiyakun. Chayraykun Yayaqa kusikurqan.
[20] Diosqa, llapan imaymanakunatapas, hallp'a pachapi kaqkunatapas, hinallataq hanaq pachapi kaqkunatapas, pay kikinwanmi Cristoq chawpinta allipunachipun. Hinan Churinpa kruspi hich'asqan yawarpa chawpinta Diosqa thak kayta ruwarqan.
[21] Ñawpaqqa, qankunapas Diospa mana reqsisqanmi karqankichis. Hinallataq mana allin ruwasqaykichiskunawanmi, yuyayniykichispi Diospa awqankuna karqankichis. Kunantaq ichaqa qankunata allipunachisunkichis.
[22] Aycha kuerponpi wañusqanwanmi chaytaqa ruwarqan. Hinallataq, t'aqasqata, mana qhelliyoqta, mana imamanta huchachanata ima Diospa ñawpaqenpi rikhurichinasunkichispaqmi chaytaqa ruwarqan.
[23] Cheqaqmantapunichus iñiypi allin teqsichasqa qaqata sayashankichis chayqa, chay uyarisqaykichis allin willakuy suyakuymantaqa, aman kuyurinkichischu. Chay allin willakuytaqmi, kay pachapi tukuy kamasqa kaqkunaman willasqa karqan. Chaypaqtaqmi ñoqa Pablopas allin willakuyta willanaypaq, Diospa llank'aqnin kaymanqa chayarqani.
[24] Kunanqa qankunarayku ñak'arisqaypin q'ochukuni. Hinallataq Cristoq sinchi ñak'ariyninkunaq pisisqanta, kikin aycha kuerpoypi hunt'apapushani. Hinan Cristoq kuerpon, iñiq t'aqarayku ñak'arishani.
[25] Diosmi yuyaykusqanman hina, chay iñiq t'aqapi llank'anaypaq churawarqan. Chay hinapi, Diospa siminta hunt'asqata willanaypaqmi qankunaq allinniykichispaq churawarqan.
[26] Chay simiqa, pakasqa yachaymi karqan. Chaytan wiñay-wiñaymantapacharaq, Diosqa ñawpaq runamiraymantapas pakarqan. Kunantaq ichaqa, t'aqasqankunaman rikhurichin.
[27] Diosqa, mana-judío runakuna ukhupi pakasqa yachaypa imakunachus qhapaq k'ancharishaq kaynintan, chay t'aqasqa kaqkunaman rikuchiyta munarqan. Chay pakasqa yachayqa, qankunapi kashaq Cristollapunin. K'ancharishaq suyakuyqa payllataqmi.
[28] Cristomantataqmi willakuyku. Hinan llapa runakunata anyaykuyku. Chay hinallataqmi llapan runakunata, tukuy allin yachaywan yachachiyku. Chay hinapin, llapa runakunata Cristo Jesuspi k'apakta Diosman qayllaykuchisaqku.
[29] Chaypaqtaqmi ñoqapas llank'ashani. Diosmi, ñoqapi hatun atiyninwan llank'ashan. Chaymi ñoqapas, ñoqapi kashaq Diospa atiyninman hina, kallpachakushani.