[1] Chay hinaqa, sichus Cristowan kuska kawsarimpurqankichis chayqa, hanaq pachapi kaqkunata maskhaychis. Chaypin Cristoqa, Diospa paña ladonpi tiyashan.
[2] Yuyayniykichisqa, hanaq pacha kaqkunapi kashachun. Amataq hallp'a pacha kaqkunapichu kashachun.
[3] Qankunaqa, wañupurqankichismi. Hinan kawsayniykichisqa Cristowan kikin Diospi pakasqa kashan.
[4] Cristoqa, ñoqanchispa kawsayninchismi. Maypachachus pay rikhurimunqa chaymi, qankunapas paywan kuska k'anchaypi rikhurimullankichistaq.
[5] Chay hinaqa, kuerpoykichispi kay pacha kaqkunata wañuchiychis. Chaykunataqmi kaykuna: Qhellipi puriykuna, qhellipi kawsaykuna, aycha kuerpoq munasqanman aysachikuykuna, mana allin yuyaykuykuna, hinallataq qolqe sonqo kaykuna. Chay qolqe sonqo kayqa, idolo yupaychaywan ninakunmi.
[6] Chaykunahawan, mana kasukuq runakunaman Diospa k'arak phiñakuyninqa hamun.
[7] Maypachachus chaykunapi kawsashaspaykichisqa, qankunapas chay hinatan purirqankichis.
[8] Kunantaq ichaqa, qankunapas llapan kaykunata saqepuychis: K'arak phiñakuyta, phiñakuyta, mana allin kaqta, k'arak k'amikuyta, hinallataq qhelli simi rimayniykichiskunatapas saqepuychis.
[9] Mawk'a runa kayniykichistaqa, ruwayninkunantintan wikch'upunkichisña. Chayrayku hukkuna-hukkunawan amaña llullakuychischu.
[10] Mosoq runa kaywan p'achallisqataqmi karqankichis. Chay mosoq runa kaymi, kamaqninpa rikch'ayninman hina, hunt'asqa yachayman chayanankama mosoqyashan.
[11] Chay hinapin, judío runapas, mana-judío runapas, sirkunsidasqapas, mana sirkunsidasqapas, wak simi rimaqkunapas, esitakunapas, kamachikunapas, mana kamachikunapas, manan kanñachu. Aswanqa Cristollañan llapanpi kashan. Hinallataq llapapipas kashan.
[12] Qankunaqa, Diospa akllasqankuna, t'aqasqankuna, hinallataq munakusqankuna hinapuni p'achallikuychis. Hinallataq sonqomanta yanapaykukuywan, sumaq sonqo kaywan, huch'uyaykukuywan, llamp'u kaywan, pasiensiawan ima p'achallikuychis.
[13] Sichus mayqenniykichispapas hukpa kontranpi kihakuynin kanman chayqa, pasiensiaykunakuspa pampachanakuychis. Imaynan Cristopas pampacharqasunkichis, chay hinallatataq qankunapas pampachanakuychis.
[14] Ichaqa, tukuy chay imaymanakunamantapas, munakuywan p'achallikuychis. K'apak kayman wataqqa chaymi.
[15] Diospa thak kaynintaq sonqoykichispi kamachikuchun. Chaymanmi ch'ulla kuerpolla kanaykichispaq, waqyasqa karqankichis. Hinallataq Diosman grasiasta qoshallaychispuni.
[16] Hukkuna-hukkunawantaq, tukuy yachaypi yachachinakuychis, hinallataq kallpanchanakuychis. Sonqoykichispitaq salmokunawan, imnokunawan, hinallataq espiritual takikunawan, Señorman sumaq misk'ita takiychis. Chay hinapin Cristoq siminqa, qankunapi ancha askhapuni kashanqa.
[17] Tukuy ima ruwayniykichiskunatataq, rimaypiña, otaq ruwaypiña kaqtinpas, tukuyta Señor Jesuspa sutinpi ruwaychis. Hinallataq paypa chawpinta, Dios Yayaman grasiasta qoshallaychispuni.
[18] Esposakuna, Señorpi iñiqkuna hinapuni qosaykichista kasukuychis.
[19] Qosakuna, esposaykichista munakuychis. Amataq paykunawan phiñasqallachu kashaychis.
[20] Wawakuna, tayta-mamaykichista tukuy imapi kasukuychis. Chaywanmi Señorqa kusikun.
[21] Tayta-mamakuna, wawaykichis mana umphuyananpaq, ama paykunataqa phiñachiychischu.
[22] Kamachikuna, aychaman hina patronniykichiskunata tukuypi kasuychis. Wakin kamachikunaqa, patronninkuta kusichinallankupaqmi ruwanku. Qankunan ichaqa, ama patronniykichispa rikusqallanchu ruwaychis. Aswanpas cheqaq sonqomanta, Diosta manchakuspa ruwaychis.
[23] Tukuy imataña ruwankichis chaypas, ama runakunapaq hinachu, aswanpas Señorpaq hinapuni sonqomanta ruwaychis.
[24] Qankunaqa, tupaqniykichispa pagonta Señormanta chaskinaykichista yachankichisñan. ¡Cristo Señortan serbishankichis!
[25] Diosqa, manan runakunaq rikch'aynintachu qhawan. Aswanpas, mana chanin ruwaqmanmi, mana chanin ruwasqanmanta pagonta qopunqa.