[1] Chay hinaqa, qankunarayku, Laodisea llaqtapi kaqkunarayku, llapan mana hayk'aq kikin uyayta rikuwaqniykunarayku iman, ñak'arirqani. Chaytan yachanaykichista munani.
[2] Yachaypa llapan qhapaq kaynintapas, chaskinaykichistan munallanitaq. Chaypitaqmi hunt'asqa sonqo churayniyoq kayqa kapusunkichis. Chay hinapin, Dios Yayaq, hinallataq Cristoq pakasqa yachaynintaqa, entiendinkichis.
[3] Yachaypa llapan qhapaq kayninpas, hinallataq yuyaypa qhapaq kayninpas Cristopin pakasqa kashan.
[4] Ama pipas pantachiq imaymana simikunawan q'otunasunkichispaqmi chaytaqa niykichis.
[5] Aycha kuerpopiña mana qankunawanchu kashani chaypas, espiritupiqa qankunawanmi kashani. Qankunaq chanin kawsasqaykichista, hinallataq Cristopi allin takyasqa iñiyniykichista qhawarispaymi q'ochukushani.
[6] Chay hinaqa, imaynatachus Señorninchis Cristo Jesusta chaskikurqankichis, chayman hinapuni paypi puriychis.
[7] Cristopi allin saphichasqa, paypi wiñachisqa, hinallataq iñiypi qaqa sayachisqan karqankichis. Chay hinaqa, imayna yachachisqachus karqankichis, chay hinata Diosman anchatapuni grasiasta qoychis.
[8] Ama pipas yachayniyoqman tukuspa, hinallataq q'otukuq yanqa simikunawanpas apanasunkichispaq qhawakuychis. Chay simikunaqa, manan Cristomantachu hamun. Aswanpas runakunaq ruwayninkuman hinallan kanku. Kay pachaq mana baleq kamachikuyninman hinallataqmi kankupas.
[9] Cristoq aycha kuerponpitaqmi Diospa tukuy Dios kayninqa tiyakun.
[10] Qankunaqa Cristopin hunt'asqa kashankichis. Llapan umalliqkunaq, hinallataq kamachikuqkunaq umalliqninqa paymi.
[11] Manan runaq makinwanchu sirkunsidasqa karqankichis. Aswanpas Cristopin sirkunsidasqa karqankichis. Cristomanta hamuq chay sirkunsisionmi, aycha kuerpoykichispi huchapakuq kayniykichistaqa wikch'uchirqasunkichis.
[12] Cristowan kuskan bautismopi p'ampasqa karqankichis. Chay bautismollapitaqmi, wañusqakunapuramanta Cristota kawsarichimpuq Diospa atiyninpi iñisqaykichisrayku, Cristotawan kuskata kawsarichimpurqasunkichis.
[13] Qankunaqa, huchapi, hinallataq aycha kuerpoykichis mana sirkunsidasqa kaypin wañusqa kasharqankichis. Chay hina kashaqtiykichismi Diosqa, Cristowan kuska kawsayta qorqasunkichis. Hinallataq llapan huchaykichiskunatapas pampacharqasunkichis.
[14] Kontranchispi qelqasqa kamachikuykunataqa Diosmi yanqayachipurqan. Chay ñoqanchispa kontranchispi qelqakunatataq krusman klabaykuchisqanwan qechupurqan.
[15] Payllataqmi umalliqkunaq, hinallataq kamachikuqkunaq atiynintapas qechupurqan. Kruspi paykunata atipaspantaq, llapa runaq rikushasqan, chay runakunata p'enqayman churarqan.
[16] Chayrayku ama pipas mikhunamantapas, nitaq ukyanamantapas chaninchasunkichischu. Amallataq pipas fiesta p'unchaykunamanta, nitaq mosoq killamanta, nillataq sábado p'unchaykunamatapas chaninchasunkichischu.
[17] Lliw chaykunaqa, hamuq kaqkunaq llanthullanmi kanku. Kuerpon ichaqa, Cristoqpuni kashan.
[18] Wakinkunaqa, aycha kay yuyayllankupin yanqata hatunchakunku. Hinan paykunaqa, huch'uyaykukuqman tukuspanku, angelkunata yupaychanku. Hinallataq mana rikusqanku kaqkunamanmi haykushanku. Chay hina runakunawanqa ama premioykichistaqa qechuchikuychischu.
[19] Paykunaqa, manan umaman hap'ipakuspachu kashanku. Chay umaqa, llapan kuerpota wiñachiqmi. Hinan kuerpotapas, moqochukunaq, hinallataq hank'ukunaq chawpinta, kallpachan, hinallataq hap'inachinpas. Chay hinapin, tukuy chaykunaqa Diospa wiñariy qosqanwan wiñashanku.
[20] Cristowan kuskan, kay pachaq mana baleq kaqninkunapaq wañupurqankichis. Sichus chay hina karqan chayqa, ¿imanaqtintaq kay pachapaqpas kawsashawaqchis hinari, kamachikuykunata kasukuspaykichis kawsashankichis?
[21] Chay kamachikuykunaqa kaykunan: Ama hap'iychu, nitaq malliychu, nillataq tupaykullaypaschu.
[22] Chay kamachikuykunaqa, runakunallaqmi. Hinan, tukuy runakunaq kamachikuyninkuman hina, hinallataq yachachikuyninkuman hina, tiempo pasasqanwanqa tukukapullanqakupuni.
[23] Cheqapaqmi, chay imaymanakunaqa, yachayniyoqman rikch'akunku. Chay hina ruwaq runakunaqa, yuyaykusqankuman hinan yupaychanku. Hinallataq yanqa huch'uyaykukuqman tukunku. Hinallataqmi kikinkuq aycha kuerponkuta muchuchikunku. Aycha kuerpoq millay munasqankunata atipaytataqmi ichaqa, manapuni atinkuchu.