[1] Señor Jesucriston rikhurimuyninpi, hinallataq qhapaq suyunpi wañuqkunatawan kawsaqkunatawan chaninchanqa. Chaymi Diospa ñawpaqenpi, hinallataq Señor Jesucristoq ñawpaqenpipas kaytaqa balikuykipuni.
[2] Listollapuni kaspa, tiemponpipas, hinallataq mana tiemponpipas Diospa simintaqa willashallaypuni. Tukuy llamp'u sonqo, hinallataq pasiensiayoq kaywan yachachiy, uyachiy, phiñarikuy, hinallataq kallpanchaykuy.
[3] Allin yachachikuyta runakunaq mana chaskiy munananku tiempoqa chayamunqan. Aswanmi paykunaqa, imatachus uyariy munasqallankuta uyarinqaku. Kikinkuq mana allin kaqta munapayasqankuman hinataqmi, yachachiqkunata huñumunqaku.
[4] Chaymantapas, cheqaq kaqmanta t'aqakuspankun, ninrinkuta wisq'aykunqaku. Hinan kuentokunallataña uyariyta munanqaku.
[5] Qan ichaqa, ama chay mana allin yachachiqkuna hinaqa kaychu. Aswanpas tukuy ima ruwasqaykipipas kuidakuy, hinallataq ñak'ariykunatapas muchukullaypuni. Diospa simin willanaykitaqa, willashallaypuni, hinallataq Diospa llank'ana qosqasunkitapas hunt'ashallaypuni.
[6] Ñoqaqa p'uchukay ofrenda sakrifikasqa kanaypaqñan kashani. Hinallataq ripunay p'unchayqa chayamunñan.
[7] Allin maqanakuytapas maqanakuniñan, phawasqaytapas tukuniñan. Hinallataq iñiytapas waqaycharqanin.
[8] Chaymi chanin korona waqaychasqa kapushawan. Chaytan chaninchaq chanin Señorqa, haqay p'unchaypi qowanqa. Manan ñoqallamanchu qowanqa. Aswanpas llapallan paypa hamunanta munakuqkunamanpas qollanqataqmi.
[9] Imaynallanmantapas usqhayllapuni watukuqniy hamuway.
[10] Demasqa, kay pacha kaqta munakuspanmi saqerpariwaspa, Tesalónika llaqtaman pasakapun. Crescentepas Galasia probinsiaman, hinallataq Titopas Dalmasia suyuman pasakapunku.
[11] Lukasllañataqmi ñoqawanqa kashan. Markosqa Diospa llank'ananpi llank'aysiwananpaqmi allinpuni. Chayrayku maskhaspa pusamuwanki.
[12] Tikikotataqmi Éfeso llaqtaman kacharqani.
[13] Hamuspaykiqa, Troas llaqtapi Karpoq wasinpi saqemusqay kapotiyta apamuwanki. Hinallataq qelqa k'uyutapas, aswantaraqqa qarakunapi qelqasqa qelqa k'uyukunata apamuwanki.
[14] Fierro takaq Alejandron imaymana mana allinkunata ruwawarqan. Chay ruwasqanman hina Señorllapuni kutichipuchun.
[15] Payqa, rimasqanchiskunamanmi sinchitapuni kontrallikurqan. Chayrayku, qanpas paymantaqa kuidakunkipuni.
[16] Ñawpaq kaq defiendekuyniypiqa, manan pipas ñoqawanqa kasharqanchu, aswanmi llapallanku saqerpariwarqanku. Amayá chay ruwasqankuqa yupasqachu kachun.
[17] Señortaqmi ichaqa, ñoqawan kuskapuni kasharqan. Hinan llapallan mana-judío runakunaq uyarinankupaq, hinallataq ñoqaq chawpiyta willakuypas hunt'akunanpaq, Señorqa kallpata qowarqan. Chay hinapitaqmi leonpa siminmantapas qespichiwarqan.
[18] Señortaqmi, tukuy mana allin ruwaykunamantapas, hinallataq hanaq pacha qhapaq suyunpaqpas waqaychaykuwanqa. Payllaman yupaychaypas wiñay-wiñaypaq kachun. Ahinapuni kachun.
[19] Priskatawan, Aquilastawan, hinallataq Onesíforoq wasinpi kaqkunatawan napaykapuwanki.
[20] Erastoqa, Korinto llaqtapin qhepakamun. Trofimotataqmi ichaqa, Mileto llaqtapi onqosqata saqeykamurqani.
[21] Manaraq paray tiempo chayamushaqtinyá, hamunaykipaq kallpachakamuy. Eubulopas, Pudentepas, Linopas, Claudiapas, hinallataq llapan wawqe-panakunapas napaykamusunkikun.
[22] Señor Jesucristopuni, espirituykiwan kashachun. Diospa allinpaq qokuyninpas qankunawanpuni kachun. Ahinapuni kachun.