[1] P'uchukay p'uchaykunapin sasa tiempokuna chayamunqa. Chaytapas yachallaytaq.
[2] Kikillankuta munakuq, hinallataq qolqe sonqo runakunan kanqaku. Hatunchakuspa rimaykachaqkuna, anchaykachaqkuna, k'arakta k'amikuqkuna, taytamamankuta mana kasukuqkuna, mana reqsikuqkuna, hinallataq mana Diosniyoq runakunan kanqaku.
[3] Familiankutawanpas mana munakuqkuna, pampachaykuyta mana munaqkuna, yanqanmanta tumpakuqkuna, aycha kuerponkuta mana watakuqkuna, yana almakuna, hinallataq allin kaqta cheqnikuqkunan kanqaku.
[4] Amigonkunata hap'ichiqkuna, munasqallanpi puriqkuna, k'ankaykachaqkuna, kay pacha q'ochukuykunata Diosmantapas aswantaraq munakuqkunan kanqaku.
[5] Hinallataq, Dios sonqo kayman tukuqkuna kanqaku. Ichaqa, Dios sonqo kaypa atiynintataqmi mananchanqaku. Paykunamanta t'aqakuy.
[6] Chaykuna ukhupi kaqkunataqmi, wasikunaman haykuspa, pisi yuyayniyoq warmikunata presochaspa apakapunku. Chay warmikunaqa, imaymana huchawan ñit'iykusqa, hinallataq mana allin munapayaykunaq apaykachasqanmi kanku.
[7] Chay warmikunaqa, imatapas yacharuyllatapunin munashanku. Ichaqa manataqmi hayk'aqpas cheqaq kaq reqsiytaqa atinkuchu.
[8] Imaynan Janeswan, Jambreswanpas Moisespa kontranpi hark'apakurqanku, chay hinallataqmi chay runakunapas cheqaq kaqpa kontranpi hark'apakunku. Chay runakunaqa, waqllisqa yuyayniyoqkuna, hinallataq iñiypi mana aprobasqakunan kanku.
[9] Ichaqa chay mana allin runakunaq, mana yuyayniyoq kasqankuqa, llapa runapaq reqsisqanmi kanqa. Chayrayku, imaynan Janespas, hinallataq Jambrespas ñawpaqman manan purirqankuchu, chay hinallataqmi chay mana allin runakunapas manapuni ñawpaqmanqa purinqakuchu.
[10] Qanmi ichaqa yachachikuyniytapas, imayna kawsasqaytapas, imapaqchus kawsasqaytapas, iñiyniytapas, llamp'u kayniytapas, munakuyniytapas, hinallataq ñawpaqllaman purisqaytapas allinta qhawaspa qatikuwarqanki.
[11] Chay hinallataqmi, imaynan Antiokía llaqtapi, Ikonio llaqtapi, hinallataq Listra llaqtachapipas kashaqtiy, qatiykachasqa kayniypipas, llakikuyniypipas qatikuwarqanki. Chay qatiykachakuykunataqa, muchukullarqanin. Hinan tukuy chaykunamantapas Señorpuni horqowarqan.
[12] Cheqaqtapuni, hayk'an Cristo Jesuspi Dios sonqo kaywan kawsakuy munaqkunaqa, qatiykachasqallapunin kanqaku.
[13] Millay runakunapiwan, q'otukuq runakunapiwanmi ichaqa, mana allinmanta aswan mana allinmanraq q'otuspanku, hinallataq q'otuchikuspanku chayanqaku.
[14] Qan ichaqa, imachus yachasqaykipipuni, hinallataq pipichus kreesqaykipipuni takyay. Pimantachus yachaqakusqaykitaqa yachankitaqmi.
[15] Hinallataq wawa kasqaykimantapacharaqmi, Ch'uya Qelqakunataqa yacharqanki. Chay Qelqakunan Cristo Jesuspi iñisqaykiq chawpinta qespikunaykipaq yachaysapaman tukuchiyta atisunki.
[16] Llapan Qelqakunaqa, Diospa yuyaychasqanmi. Hinan yachachinapaqpas, anyaykunapaqpas, wanachinapaqpas, hinallataq chanin kaqpi yachachinapaqpas allinpuni.
[17] Chay hinapin Diospa runanqa, k'apak, hinallataq tukuy allin kaq ruwaykunata ruwananpaq allin-allin wakichisqapuni kanqa.