[1] Qanyá wawallay, Cristo Jesuspa allinpaq qokuyninpi kallpachakullaypuni.
[2] Askha testigukunaq ñawpaqenpi ñoqamanta imatachus uyariwasqaykita, pikunachus hunt'aq, hinallataq yachachiy atiq runakunaman yachachiy. Chay hinapi paykunapas hukkunaman, yachachinankupaq yachachiy.
[3] Qanqa, Jesucristoq allin soldadon hinapuni, ñak'ariykunapi muchuy.
[4] Pipas soldado kashaspa, soldadopaq hap'iqninta kusichiyta munaspaqa, manan kay pacha negosiokunamanraq winakushanmanchu.
[5] Hinallataq llallinakuypi kashaq mayqen runapas, sichus mana imayna llallinakunanpaq kamachisqaman hinachu llallinakushan chayqa, manapunin koronataqa chaskinmanchu.
[6] Sasawan chakra llank'akuqqa, payraqmi rurusqanta ñawpaqta mikhunan.
[7] Llapanpaqpas, Señorllapunin yuyaytaqa qosunki. Chayrayku, nisqaytaqa allintapuni hap'ikuy.
[8] Willasqay allin willakuyman hina, wañusqakunamanta kawsarichimpusqa, Davidpa miraynin Jesucristomanta yuyariy.
[9] Allin willakuyraykutaqmi, kadenasqa preso kanaykamaraq, mana allin ruwaqpas kayman hina, imaymana ñak'ariykunata muchushani. Diospa simintaqmi ichaqa, manapuni hark'asqachu kashan.
[10] Chaymi, akllasqakunarayku tukuytapas muchushani. Hinan paykunapas wiñay k'anchariyniyoq Cristo Jesuspi qespikuyta tarinqaku.
[11] Kay simiqa hunt'akunpunin: Sichus paywan kuska wañupurqanchis chayqa, Paywan kuskallataqmi kawsasunchispas.
[12] Ñawpaqllamanpunichus purisunchis chayqa, Paywan kuskallataqmi kamachikusunchis. Sitaqchus mananchasunchis chayqa, Paypas mananchallawasunchistaqmi.
[13] Mana hunt'aqña kasunchis chaypas, payqa hunt'aqllapunin. Manataqmi pay kikinta mananchakuytaqa atinmanchu.
[14] Ama huchatarishanankupaq Señorpa ñawpaqenpi kallpanchaykuspayki yuyarichiy. Chay hina simikunaqa, manan imapaqpas balinchu. Aswanpas, uyariqkunatan wañuy ñak'ariyman apaykun.
[15] Aprobasqa llank'aq hina, Diosman qayllaykunaykipaq allintapuni kallpachakuy. Hinallataq, cheqaq simita allintapuni yachachispa, mana imamantapas p'enqakuywan qayllaykuy.
[16] Yanqa thawtiykunaqa, hinallataq mana baleq simikunaqa, aswanaswantan mana Dios sonqo kayman apaykukun. Chayrayku chay simikunataqa, ama rimayñachu.
[17] Hinan chay simikunaqa, uyariqkunata gangrena onqoy hinaraq tukupunqa. Himeneopi wan, Filetopiwanmi chay hinaqa kanku.
[18] Paykunan cheqaq kaqmanta pantaykapuspa ninku: ‘Kawsarimpuyqa ñamá karqanña,’ nispanku. Hinan chay nisqankuwan wakinkunata iñiyninkumanta waqllichinku.
[19] Chaywanpas Diospa teqsichasqanqa, qaqatan sayashan. Chaypitaqmi kay hina sellosqa kashan: ‘Señorqa, paypa kaqkunata reqsinmi,’ nispa. (Num. 16:5; Nah. 1:7) Nillantaqmi: ‘Pikunachus Cristoq sutinta waqyakuqkunaqa, tukuy mana allin kaqkunamanta t'aqakuchunku,’ nispa. (Num. 16:26)
[20] Ichaqa, huk hatun wasipipas manan qorimanta, nitaq qolqemanta qerokunallachu kan. Aswanpas k'ullumanta, t'urumanta iman kan. Chaymantapas wakinqa allinpaq qhawarisqa ruwaykunapaq, wakintaq mana allinpaq qhawarisqa ruwaykunapaq kan.
[21] Chay hinaqa, sichus pipas chaykunamanta llimphuyakun chayqa, payqa huk allinpaq qhawarisqa qero hinan kanqa. Hinallataqmi Patronninpaqpas, hoqariykunanpaq huk t'aqasqa hina, lliw allin kaq ruwaypaqpas allin-allin wakichisqan kanqa.
[22] Wayna-sipaskunaq millay munapakuypi kawsayninkumanta ayqekuy. Hinaspa Señorta ch'uya sonqowan, waqyakuqkunawan kuska, chanin kayta, iñiyta, munakuyta, hinallataq thak kaytapas qatikullaypuni.
[23] Mana yuyaykukuspa millay huchatariykunatawan, yanqa churanakuykunatawan wikch'upuy. Chaykuna huchatariykunallata paqarichisqantaqa yachankin.
[24] Señorpa kamachinqa, manan huchatariqchu kanan. Aswanpas llapapaq munakuq, yachachiy munaq, hinallataq llamp'u sonqoyoqmi kanan.
[25] Kontrallikuqkunatapas llamp'u kaywanmi wanachinan. Ichapaschá cheqaq kaqta allinta reqsinankupaq yuyayman kutirikuyta Diosqa paykunaman qonman.
[26] Paykunaqa, saqraq munayninta ruwanankupaqmi presochasqa kashanku. Ichapaschá paykunaqa, entiendikuspa saqraq toqllanmanta ayqekunkuman.