[1] Ñoqa Pabloqa, Diospa rantisqan, hinallataq Jesucristoq apostolninmi kani. Ñawpaqmantaraq Diospa akllasqankunaq iñiyninkuman hina, hinallataq cheqaq kaqta reqsisqayman hinan apostolqa kani. Chay cheqaq kaqqa Dios sonqo kayman hinataqmi.
[2] Chaytan mana llullakuq Diosqa kay pacha manaraq qallarishaqtin prometirqan. Hinan wiñay kawsayta suyakushani.
[3] Qespichiqninchis Diosqa, kamachiwasqanman hina, siminta willanaypaqmi churawarqan. Chay hinapin Diosqa, willakuypa chawpinta, tiemponpi willakurqan.
[4] Qanmanmi Tito qelqamuyki. Iñiyninchisman hina, qanqa cheqaq wawaypunin kanki. Dios Yayaq, hinallataq Qespichiqninchis Jesucristoq allinpaq qokuyninpas, yanapakuyninpas, hinallataq thak kayninpas qanwanpuni kachun.
[5] Imapas pisisqanta allichamunaykipaq, hinallataq sapanka llaqtapi umalliq wawqekunata, kamachisqayman hina churamu- naykipaqmi, Kreta islapiqa saqemurqayki.
[6] Umalliq wawqeqa, mana imamantapas huchachana, hinallataq ch'ulla warmiq qosallanmi kanan. Chay hinallataqmi wawankunapas iñiqkuna kananku. Manataq millay munasqanman hina puriqmantapas, mana kasukuq k'ullu kaymantapas reqsisqachu kananku.
[7] Diospa llank'ananta qhawaqqa, Diospa llank'ananta qhawaq hinapunin, mana imamantapas huchachana kanan. Hinallataq mana munasqallan ruwaq, mana usqhaylla phiñakuq, mana machaq, mana saltaq sonqo, nitaq yanqallanmanta qolqe ganay munaqchu kanan.
[8] Aswanpas qorpachaqllapuni, allin kaqta munakuqllapuni, ima ruwasqanpipas kuidakuq, chanin runa, ch'uya runa, hinallataq kikinta kuidakuq runan kanan.
[9] Hinallataq payqa, hunt'aq simi yachachisqa kasqanman hap'ipakuqmi kanan. Chay hinapin allin yachachikuywan hukkunata kallpanchaykunqa, hinallataq kontrallikuqkunatapas upallachinqa.
[10] K'ulluchakuspa hataripakuqkunapas, yanqa mana baleq simita rimaqkunapas, hinallataq q'otukuqkunapas askhan kanku. Aswantaraqqa, sirkunsisionmanta kaqkunan chaykunaqa kanku.
[11] Chay runakunaqa, mana yachachinapaq hina kaq yachachikuywanmi yanqallanmanta qolqe ganayta munaspa wasintintaraq waqllichishanku. Chayraykun paykunaq siminkuqa, upallachisqapuni kanan.
[12] Paykunamanta kaq huknin profetallankutaqmi nirqan: ‘Kreta isla llaqtayoq runakunaqa, llullakunapuni, millay k'ita animalkunapuni, hinallataq qella rakrapukunapunin kanku,’ nispa.
[13] Chay nisqanqa cheqaqmi. Chayrayku iñiyninkupi allinta takyanankupaq, paykunataqa k'araktapuni phiñarikuy.
[14] Paykunaqa, judío runakunaq kuentonkuta, hinallataq runakunaq kamachikuyninkunata uyarispankun cheqaq kaqmanta t'aqakushanku. Chayta amaña uyarishanankupaq paykunata phiñarikuy.
[15] Ch'uya kaqkunapaqqa, tukuy imaymanakunapas ch'uyapunin. Qhellichasqakunapaqwan, mana iñiqkunapaqwantaqmi ichaqa, mana imapas ch'uyaqa kanchu. Aswanpas paykunaq yuyayninku, hinallataq konsiensiankupas aswantaraqmi qhellichaykusqa kashan.
[16] Paykunaqa ninkun: ‘Diostaqa reqsiykun,’ nispanku. Ruwayninkuwantaqmi ichaqa, Diosta mananchanku. Paykunaqa, Diospa millakusqan, mana kasukuqmi kanku. Llapan allin kaq ruwaykunapaqtaqmi ichaqa, mana balinkuchu.