[1] Qankunapurapi kurak runakunatan kallpachani. Ñoqapas paykuna hina kurak runallataqmi kani. Hinan Cristoq ñak'arisqankunata rikuq kaspay, hinallataq k'ancharishaq rikhurimuyninpi suyakuqmasi kasqayrayku kallpachani.
[2] Qankunapurapi kashaq Diospa obeha t'aqanta makilla kuidaspa michiychis. Amataq qatirisqa hinachu, aswanpas sumaq sonqowanpuni michiychis. Amallataq mana chaninninpi ganasqa qolqeraykuchu, aswanpas tukuy sonqomantapuni michiychis.
[3] Nitaq chay michisqaykichis t'aqapi munayniyoq hina kaywanchu, aswanpas chay t'aqaq yachaqakunankupaq hina kaywan michiychis.
[4] Hinan iñiq t'aqa michiqkunaq Umalliqnin rikhurimuqtin, k'ancharishaq mana hayk'aq naq'eq koronata chaskinkichis.
[5] Qelqaqa ninmi: ‘Diosmi hatunchakuqkunaq kontranpi sayarin. Huch'uyaykukuqkunamantaqmi ichaqa, allinpaq qokuyninta qon,’ nispa. (Prov. 3:34) Chayrayku, qankunapas waynakuna, kurak runakunaman kasukuychis. Hinallataq llapallaykichis hukkuna-hukkunapaq huch'uyaykukuywan p'achallikuychis.
[6] Chay hinaqa, tiemponpi Diosqa altoman hoqarinasunkichispaq, paypa atiyniyoq makinman k'umuykukuychis.
[7] Qankunataqa, Diosmi kuidashasunkichis. Chayrayku llapallan llakipakuyniykichiskunata payllamanña wikch'uykapuychis.
[8] Awqaykichis saqraqa, pitapas millp'urunanpaqmi qaparishaq león hinaraq muyuriqta maskhaspa purimushan. Chayrayku, makilla kuidakuychis, hinallataq rikch'ashallaychispuni.
[9] Iñiypi qaqa takyasqa kaspa, saqraq kontranpi qaqata sayaychis. Chay hina ñak'ariykunallatataq, teqsi muyuntinpi wawqe-panakuna pasashasqankutapas yachankichistaqmi.
[10] Ichaqa Diosmi, Cristo Jesuspi, llapallan allinpaq qokuyninwan wiñaypaq k'anchayninman waqyarqasunkichis. Hinan huk tiempo ñak'arisqaykichismantaña, pay kikillantaq k'apakchasunkichis, takyachisunkichis, kallpachasunkichis, hinallataq teqsichasunkichis.
[11] Payllamanpuni allinpaq qhawarisqa kaypas, atiyniyoq kaypas wiñaywiñaypaq kachun. Ahinapuni kachun.
[12] Silvanoq chawpintan pisillapi qelqamurqaykichis. Paytaqa iñiyninpi hunt'aq wawqeta hinapunin qhawarini. Qankunata anyaykunaypaqmi, hinallataq chay allinpaq qokuypi takyasqaykichisqa, cheqaqpuni Diospa allinpaq qokuynin kasqanta willanaypaqmi qelqamuykichis.
[13] Qankunawan kuska akllasqa Babilonia llaqtapi kashaq iñiq t'aqan napaykamusunkichis. Waway Markospas napaykamullasunkichistaqmi.
[14] Ch'uya munakuq much'aykuywan hukkuna-hukkunawan napaykunakuychis. Llapallaykichis Cristo Jesuspi kashaqkunapaq thak kay kachun. Ahinapuni kachun.