[1] Hinaqa llapan mana allin kaqta, llapan q'otukuyta, iskayuya kaykunata, enbidiakuykunata, hinallataq runaq qhepanpi llapan mana allin rimaykunatawan wikch'upuychis.
[2] Hinaspa chayllaraq nasesqa wawakuna hina, espiritual kaq mana imawanpas chhaqrusqa lecheta wiñanaykichispaq munaychis.
[3] Señorqa sumaq sonqoyoq kasqantapas, yachankichisñataqmi.
[4] Cheqapaq, runakunaq tanqarparisqan kawsashaq rumiqa Señormi. Ichaqa Diospa ñawpaqenpi ancha balorniyoq, hinallataq akllasqa rumiqa paymi. Payllaman asuykuychis.
[5] Qankunapas kawsashaq rumikuna hinan, espiritual wasipi perqasqa kashankichis. Chay hinapin Jesucristoq chawpinta Dios kusichiq espiritual sakrifisiota haywaq t'aqasqa saserdotekunaqa kankichis.
[6] Chaymi Qelqaqa kay hinata nin: ‘Qhawariychis, Sión cheqaspin eskina hap'iq akllasqa balorniyoq rumita churani. Hinan pipas paypi iñiqqa manapuni hayk'aqpas p'enqachisqachu kanqa,’ nispa. (Isa. 28:16)
[7] Hinan qankuna paypi iñiqkunapaqqa ancha balorniyoqpuni. Mana kreeqkunapaqñataqmi ichaqa, Qelqa nin: ‘Perqaqkunaq tanqarparisqan rumitataqmi, eskina hap'iq allin kaq rumiman Diosqa tukuchipun,’ nispa. (Sal. 118:22)
[8] Nillantaqmi: ‘Misk'achiq rumiman, hinallataq urmachiq qaqaman tukupun,’ nispa. (Isa. 8:14) Hinan runakunaqa, simita mana kasukuq kaspanku misk'akunku. Chaypaqpunitaqmi unanchasqapas karqanku.
[9] Qankunan ichaqa, Diospa akllakusqan miray ayllu kankichis. Reypa familian saserdotekuna, t'aqasqa suyu, hinallataq Diospa rantisqan llaqta kankichis. Diosqa, allin kayninkunata willanaykichispaqmi, laqha-tutayaqmanta, utirayana k'anchayninman akllakurqasunkichis.
[10] Ñawpa tiempopi qankunaqa, manan Diospa llaqtanchu karqankichis. Kunanmi ichaqa, Diospa llaqtanña kapunkichis. Manataqmi yanapakuyninmanpas ayparqankichischu. Kunantaqmi ichaqa, yanapakuyninmanpas ña aypankichisña.
[11] Munakusqaykuna, wak suyu runakunata hina, hinallataq purikuqkunata hinan qankunataqa kallpachaykichis. Almanchispa kontranpi maqanakuq aycha kuerpoq munasqankunamanta kuidakunaykichispaqmi kallpachaykichis.
[12] Mana-judío runakunapurapipas yachaqakunapaq hina kawsayniyoq kaychis. Chay hinapin qankunata mana allinkuna ruwaqmanta tumpaykusqankupi, allin kaq ruwasqaykichistaqa rikunqaku. Hinan chayta rikuspanku, Señorpa watukunan p'unchaypi Diosta hatunchanqaku.
[13] Llapallan runa kamachikuqkunaman, Señorhawa kasukuychis. Reykunaman, munayniyoq kasqankurayku kasukuychis.
[14] Hinallataq kamachikuqkunaman kasukuychis. Paykunataqa reymi mana allin ruwaqkunata muchuchinanpaq, allin ruwaqkunatataq ichaqa, sumaqta qhawarinanpaq kachamurqan.
[15] Diospa munayninqa kaymi. Allin kaqta ruwaspan, mana yuyayniyoq runakunaq mana yachaspa rimayninkutaqa upallachinkichis.
[16] Kacharichisqakuna hina kawsakuychis. Ichaqa amataq kacharichisqa kasqaykichistaqa, mana allin kaqta ruwanaykichispaqchu hap'iychis. Aswanpas Diospa kamachinkuna hinapuni kawsakuychis.
[17] Llapata allinpaq qhawariychis. Wawqe-panakunatapas munakuychis. Diostapas manchakuychis. Reytapas allinpaq qhawariychis.
[18] Uywasqa kamachikuna, tukuy manchakuywan patronniykichiskunaman kasukuychis. Ama sumaq kaqkunallamanchu, nitaq khuyapayakuq kaqkunallamanchu, aswanpas phiñarikuq kaqkunatapas kasukuychispuni.
[19] Sichus pipas nanaykunata muchun, hinallataq mana ima huchanmanta Diospaq hina konsiensian kasqanrayku ñak'arichisqa kanman chayqa, chaymi chaskinapaq hina kaqqa.
[20] Chay hinaqa, sichus huchaykichismanta saqmasqa kaspa muchunkichis chayqa, ¿ima allintaq kanman? Sitaqchus allin kaqta ruwashaspa ñak'arichiykunata muchukunkichis chaymi ichaqa, Diospa ñawpaqenpi chaskinapaq hina kaqqa.
[21] Cristopas ñoqanchisrayku ñak'arisqanpin, yupinkunata qatikunanchispaq ejemplota saqewarqanchis. Chayraykun chaypaqpuni waqyasqaqa karqanchis.
[22] Qelqaqa ninmi: ‘Payqa, manan ima huchatapas ruwarqanchu, nitaqmi siminpi ima q'otukuypas tarisqaqa karqanchu,’ nispa. (Isa. 53:9)
[23] K'amiqtinkupas payqa manan kasqan k'amikuyllawantaqchu kutichirqan. Ñak'arichiqtinkupas manan amenasarqanchu. Aswanpas chanin kaywan chaninchaq Diosmanmi hap'ichikurqan.
[24] Pay kikinmi, kuerponpi huchanchiskunata k'aspi kruspi aparqan. Chay hinapi, ñoqanchis huchapaq wañupuspa chanin kaypaq kawsakusunchis. K'irinkunawantaqmi qhaliyachisqapas karqankichis.
[25] Qankunaqa, chinkasqa obehakuna hinan kasharqankichis. Kunantaq ichaqa, almaykichis Michiqman, hinallataq Kuidaqman kutirikapunkichisña.