[1] Chay hinallataq qankunapas kasarasqa warmikuna, kikiykichispa qosaykichisman kasukuq kaychis. Chay hinapin Diospa siminpi mana iñiqkunapas, kawsayniykichista rikuspanku, mana ch'ulla simitapas rimapayashallaqtiykichis uyachisqa kanqaku.
[2] Manchakuywan ch'uya kawsayniykichista rikuspankun iñikapunqaku.
[3] Sumaqchakuyniykichisqa ama patallaykichischu kachun. Imaymananiraqninmanta chukcha ñaqch'achikuykunawan, qorimanta achalakunawan, nitaq ancha balorniyoq p'achakunawan p'achakuypaschu kachun.
[4] Aswanpas sonqoykichis ukhupi runa kayniykichisyá mana tukukuq, llamp'u kay espirituwan, hinallataq sumaq sonqo kaywan p'achallisqa kachun. Chaymi Diospa ñawpaqenpi ancha balorniyoqpuniqa.
[5] Chay hinallatataqmi, ñawpa tiempopi Diospi suyakuq, ch'uya warmikunapas sumaqchakurqanku. Paykunaqa, kikinkuq qosankuman kasukuqmi karqanku.
[6] Sarapas Abrahamta ‘wiraqocháy,’ nispa sutiyaspanmi kasukurqan. Maypachachus allin kaqta ruwankichis, hinallataq mana ima amenasaytapas manchapakuspachu kashankichis chayqa, qankunapas Saraq ususinkunañan kapunkichis.
[7] Qosakuna, chay hinallataq qankunapas esposaykichista p'akirukuq basota hina allinpaq qhawarispa, allin yachaywan kawsaychis. Hinallataq allinpaq qokuy wiñay kawsay chaskiqmasiykichiswan hinapuni sumaqta kawsaychis. Chay hinapin, Diosman parlayniykichispas mana hark'asqachu kanqa.
[8] Tukuykunaypaqtaq, llapallaykichis ch'ulla yuyayllayoqpuni kashaychis. Khuyapayanakuspa, wawqe-panantin hinapuni munanakuspa, yanapaykunakuspa, huch'uyaykukuspa ima kashaychis.
[9] Ama mana allinmanta, kasqan mana allinllawantaq kutichiychischu. Nitaq ñakaqniykichistapas ñakaychischu. Aswanpas saminchaychis. Chay saminchay erensiata chaskiq kanaykichispaqmi waqyasqaqa karqankichis.
[10] Qelqaqa ninmi: ‘Pipas kawsakuytaraq munan, hinallataq sumaq p'unchaykunatapas rikuytaraq munan chayqa, qallunta mana allin kaqmanta watakuchun. Siminpas ama q'otukuykunata rimachunchu.
[11] Mana allin kaqmanta t'aqakuspa allin kaqta ruwachun. Thak kayta maskhaspa chayllapipuni purichun.
[12] Señorpa ñawinqa, chaninkunata qhawaspan kashan. Hinallataqmi, ninrinpas mañakusqankuta makilla uyarispa kashan. Señorpa uyantaqmi ichaqa, mana allin ruwaqkunaq kontranpi kashan,’ nispa. (Sal. 34:12-16)
[13] ¿Allin kaqtataq qatikushankichis chayri, pitaq ima mana allintapas ruwayta atisunkichisman?
[14] Ichaqa sichus chaninrayku ñak'arichisqa kashankichis chayqa, kusisamiyoqmi kankichis. Chayraykun Qelqaqa nin: ‘Ama paykunaq manchachikuyninwan mancharisqa, nitaq llakisqapas kashaychischu,’ nispa. (Isa. 8:12)
[15] Aswanpas sonqoykichispi, Diosqa Señorniykichispuni kasqanta yuyariychis. Hinallataq suyakuyniykichismanta pipas tapusuqtiykichis kutichinaykichispaqpas wakichisqallapuni kashaychis. Ichaqa llamp'u kaywan, hinallataq manchakuq kaypiwan kutichiychis.
[16] Allin konsiensiayoq kaychis. Chay hinapin, Cristopi allin kawsasqaykichismanta asipayaspa, qankunamanta mana allinta rimaqkunaqa p'enqachisqa kanqaku.
[17] Sichus Diospa munaynin chay hinata munanqa chayqa, mana allin kaqta ruwaspa muchuyniykichismantaqa, allin kaqta ruwaspa muchukuyniykichismi aswan allinqa.
[18] Cristopas ch'ulla kutillatan huchasapakunarayku wañurqan. Payqa, chanin kashaspanmi, mana chaninkunarayku wañurqan. Cheqaqtapunin payqa, Diosman pusawananchispaq, aycha kuerpopi wañurqan, espiritupitaq ichaqa, kawsarimpurqan.
[19] Espiritupi kashaspantaqmi, wisq'asqa espiritukunamanpas willaq rirqan.
[20] Noepa p'unchayninkunapi arka ruwakushanankama, Diosqa pasiensiawan suyashaqtin, paykunaqa manan kasukurqankuchu. Chay arkapiqa, pisillan qespikurqanku. Huk niypiqa, pusaq runakunallan ununta qespikurqanku.
[21] Chay unuqa, kunan bautisakusqanchis unumanmi rikch'akun. Chay bautismon, Jesucristoq kawsarimpuyninpa chawpinta qespichiwanchis. Manataqmi aycha kuerpoq qhellintachu maylliwanchis. Aswanpas allin konsiensiawan Diosman prometikuymi.
[22] Jesucristoqa hanaq pachaman wicharipuspanmi, Diospa paña ladonpi kashan. Hinan angelkunapas, kamachikuqkunapas, atiyniyoqkunapas payman kasukuspa kashanku.