[1] Ñoqa Simón Pedron, Jesucristoq kamachin, hinallataq apostolnin kani. Qespichiq Diosninchis Jesucristoq chanin kayninpa chawpinta, ñoqaykuq hina, ancha balorniyoq iñiyniykuman aypaqkunamanmi qelqamuykiku.
[2] Qankunaqa, Diosta, hinallataq Señorninchis Jesusta allintapunin reqsinkichis. Diospa allinpaq qokuyninpas, thak kayninpas qankunapaq askhayachisqapuni kachun.
[3] Diospa atiyninmi tukuy imaymanakunata qowarqanchis. Chay imaymanakunaqa, kawsaypa, hinallataq Dios sonqo kaypa kaqkunan kanku. Ñoqanchisqa, pichus k'anchariyninwan, hinallataq qoykukuq kayninwan waqyaqninchispa chawpintan chaykunataqa, allintapuni reqsinchis.
[4] Chaykunaq chawpintan balorniyoq, hinallataq ancha hatun promesakunatapas qowarqanchis. Chay promesankunataqa, kay pachapi imaymana mana allin munapayaykunamantapas, hañachikuykunamantapas ayqekunaykichispaqmi qorqasunkichis. Chay hinapin, Diospa Dios kayninmanta chaskikuqkunaqa kankichis.
[5] Chayrayku, qankunapas anchatapuni kallpachakuspaykichis, iñiyniykichisman allin kaq ruway munaqllapuni kaywan yapaykukuychis. Allin kaq ruway munaqllapuni kaymantaq, yachaywan yapaykukuychis.
[6] Yachaymantaq, kikin kuerponchiswan kasuchikuywan yapaykukuychis. Kikin kuerponchiswan kasuchikuymantaq, pasiensiawan yapaykukuychis. Pasiensiamantaq, Dios sonqo kaywan yapaykukuychis.
[7] Dios sonqo kaymantaq wawqepanantin hina munanakuywan yapaykukuychis. Wawqe-panantin hina munanakuymantaq, munakuywan yapaykukuychis.
[8] Chaykunachus qankunapi kashan, hinallataq llimp'arishanraq chayqa, manan qasillatachu kachisunkichis. Nitaqmi Señorninchis Jesucristo reqsiypi, mana ruruyoqtapas kachisunkichischu.
[9] Pikunachus mana chaykunayoq kashanku chayqa, ñawinku arphayachisqan kashanku. Hinallataq ñawpa huchankumanta ch'uyanchasqaña kasqankutapas qonqarapuspankun, ñawsa kashanku.
[10] Chayrayku wawqe-panaykuna, waqyasqa kasqaykichistawan, akllasqa kasqaykichistawan aswan-aswantaraq takyachiychis. Chaykunatachus ruwankichis chayqa, manapunin hayk'aqpas misk'akunkichischu.
[11] Chay hinapin, Señorninchis hinallataq Qespichiqninchis Jesucristoq wiñaypaq qhapaq suyunman haykuyniykichisqa, ancha qosqapuni kasunkichis.
[12] Chay hinaqa, cheqaq kaq qankunapi kashasqantaqa yachankichisñan. Diostaqmi chay cheqaq kaypiqa takyachirqasunkichis. Ñoqataqmi ichaqa, chay imaymanakunamantaqa qankunaman yuyarichinaypuni kashan.
[13] Ichaqa, kay pisi-kallpa aycha kuerpopi kawsanaykama qankunaman anyaykuyniywan rikch'arichiyniymi allin rikch'akuwarqan.
[14] Señorninchis Jesucristoq sut'inchawasqanman hina, kay pisi-kallpa aycha kuerpoyta pisi tiempollamanta saqeripunaytaqa yachanin.
[15] Ichaqa, ripukapusqay qhepata, chay imaymanakunamanta tukuy tiempo yuyarinaykichispaqmi kallpachakusaqpuni.
[16] Señorninchis Jesucristoq atiyninmantawan, hamunanmantawanqa willarqaykikuñan. Ichaqa, manan yachaysapa kaywan rimasqa yanqa kuentokunata hinachu willarqaykiku. Aswanpas Hatun Atiywan Kamachikuq kasqanta, ñawiykuwanpuni rikuq kasqaykuraykun willarqaykiku.
[17] Jesucristo, maypachachus Dios Yayamanta hatunchaytawan, yupaychaytawan chaskishaqtinqa, ancha hatun k'anchariyninmantapachan Yayaqa nimurqan: ‘Munasqay Churiyqa paymi. Paypin ancha kusikuyniyqa kapuwan,’ nispa. (Mat. 17:5)
[18] Hanaq pachamanta nimusqa chay kunkatataqmi, ñoqaykuqa ch'uya orqopi paywan kashaspayku uyarirqayku.
[19] Chaymantapas, Diospa rantinpi rimaqkunaq qelqasqan aswan takyasqa simikunaqa kapuwanchismi. Tutayaq cheqaspi pachaq illarimunankama chay qelqakunata makilla uyariychis. Hinallataq pacha paqariy ch'aska sonqoykichispi lloqsimunankama, k'anchashaq lamparaman hina, chay qelqakunata allintapuni uyariychis.
[20] Ñawpaqtaqa, kaytaraq yachaychis. Llapan profetisasqa Qelqakunataqa, manan pipas munasqanman hina sut'inchanmanchu.
[21] Profetisasqa simikunaqa, manan hayk'aqpas runakunaq munayninman hina qelqasqachu karqan. Aswanpas Diospa t'aqasqan runakunaqa, Santo Espírituq yuyaychasqan kaspankun, rimarqanku.