[1] Chay hinaqa, pichus aycha kuerpopi ñak'ariqqa, manañan huchawanqa imapas ruwanan kanñachu. Chaymi Cristoq aycha kuerponpi ñoqanchisrayku ñak'arisqanhawa, qankunapas chay hinallatataq ñak'arinaykichispaq allin wakichisqallapuni kashanaykichis.
[2] Kay kawsanapaqraq kashaq qhepa tiempopitaq, amaña kay aycha kuerpoq munapayayninkunaman hinachu kawsasun. Aswanpas Diospa munayninman hinapuni kawsakusun.
[3] Qankunaqa, mana-judío runakunaq imaymana mana allin munapayayninkunapi purisqankuman hinan, ñawpa tiempo kawsaypi purirqankichis. Aycha kuerpota mana watakuspa q'elli puriykunapi, mana allin kaqta munapayaykunapi, machaykunapi, sinchi saksapakuy fiestakunapi, machana fiestakunapi, hinallataq millakuna idolota yupaychaykunapin purirqankichis. ¡Chay hina puriyniykichisqa, chayllaña kachun!
[4] Chay runakunaqa, aycha kuerpota mana watakuspa, sinchi millay huchakuna ruwasqankuta manaña ruwaysikusqaykichismantan waq'ata hina qhawarisunkichis. Chaymi qankunataqa k'amishasunkichis.
[5] Chay runakunaqa, pichus wañukapuqkunatawan, kawsashaqkunatawan chaninchananpaq wakichisqaña kashaqmanmi, kuentata qonqaku.
[6] Chaymi kunan wañusqaña kashaqkunamanpas allin willakuyqa willasqaña karqan. Aycha runa kayninkupi chaninchasqa kanankupaqmi willasqa karqan. Espiritupitaq ichaqa, Diospa munayninman hina, kawsanankupaq allin willakuyqa willasqa karqan.
[7] Llapallan imaymanakunaq p'uchukayninqa qayllaykamunñan. Chayrayku yuyaysapa, hinallataq makilla kuidakuq kaspa, Diosman parlashallaychispuni.
[8] Chay hinaqa, munakuymi may askha huchakunata pampachan. Chayrayku qankunapurapi ruphashaq munakuyniyoqpuni kashaychis.
[9] Ama imatapas chhuchupakuspalla, hukkuna-hukkunawan qorpachaykunakuychis.
[10] Sapanka hukniykichismi, Diospa ruwana qokuyninta chaskirqankichis. Chayrayku, chayta allin qhawaqkuna hinapuni, may askhapichus Diospa chay allinpaq qokuyninta chaskisqaykichisman hina, hukkuna-hukkunata serbichunku.
[11] Sichus pipas riman chayqa, Diospa siminkunaman hina rimachun. Sichus pipas sirbin chayqa, Diospa kallpa qosqanman hina sirbichun. Chay hinapin Diosqa tukuypi Jesucristoq chawpinta hatunchasqa kanqa. Payllamanpunitaq k'anchariyniyoq kaypas, atiyniyoq kaypas, wiñay-wiñaypaq kachun. Ahinapuni kachun.
[12] Munakusqaykuna, sinchi prueba qankuna ukhupi yawrariqtinqa, amayá mana reqsisqa sasachakuykunapas kanman hinaqa mancharikuychischu.
[13] Aswanpas imaynachus Cristoq ñak'ariysikuqmasin kasqaykichispi kusikuychis. Hinan paypa k'ancharishaq hamuyninpi ancha kusikuywan q'ochukunkichis.
[14] Diospa k'ancharishaq Espiritunmi qankunapi kashan. Cheqapaq runakunaqa Cristotaqa k'araktan k'aminku, qankunataqmi ichaqa hatunchankichis. Chayrayku, sichus Cristoq sutinrayku k'amisunkichis chayqa, kusisamiyoqmi kankichis.
[15] Chay hinaqa, ama mayqenniykichispas runa wañuchiq hinaqa, otaq suwa hinaqa, otaq mana allin ruwaq hinaqa, otaq mana paypa kaqman chapukuq hinaqa ñak'arichunchu.
[16] Ichaqa, sichus mayqenpas Cristota qatikuq kasqanmanta ñak'arin chayqa, ama p'enqakuchunchu. Aswanpas chaymanta Diosta hatunchachun.
[17] Chay hinaqa, Diospa wasinmantaraq chaninchay qallarinanpaqqa ñan tiempoña. Chayrayku, sichus ñoqanchismantaraq ñawpaqta qallarinqa chayqa, Diospa allin willakuyninta mana kasukuqkunaq tukukuyninqa ¡imaynaraqchá kanqa!
[18] Qelqaqa ninmi: ‘Sitaqchus chanin runapas ñak'ayta qespikun chayqa, mana Diosniyoq runaq, hinallataq huchasapa runaq tukukuyninqa ¡imaynaraqchá kanqa!’ nispa. (Prov. 11:31)
[19] Chayrayku, Diospa munayninman hina ñak'ariqkunaqa, hunt'aq Kamaqninkuman almankuta hap'ichikuchunku. Hinallataq allin kaqtapas ruwachunku.