[1] E taon jareya keya e bulan lema' taon se kapeng empa' e dhalem pamarenta'anna Rato Zedekiya, Hananya pottrana Azur, nabbi dhari kottha Gibeyon, acaca ka sengko' e Padalemman Socce. E adha'anna mam-imam ban ra'yat Hananya ngoca' ka sengko'
[2] ja' PANGERAN Se Mahakobasa, Allahna Isra'il, adhabu kantha reya, “Kakowadanna rato Babil bi' Sengko' la epotel.
[3] E dhalem bakto dhu taon reya Sengko' mabaliya rang-barang dhari Tang Padalemman se eangko' ka Babil bi' Rato Nebukadnezar.
[4] Sengko' mabaliya keya Yoyakhin ana'na Yoyakim rato Yehuda, epabarengnga ban sakabbinna ra'yat se la eangko' ka Babil. Onggu, kakowadanna Babil bi' Sengko' epotella. Sengko', PANGERAN, la ngoca'.”
[5] Daddi e adha'anna mam-imam ban sakabbinna ra'yat se manjeng e Padalemman Socce jareya, sengko' ngoca' ka Hananya,
[6] “Nyaman! Moga-moga ramalanna ba'na jareya daddiya kanyata'an, ban PANGERAN mabaliya onggu dhari Babil rang-barangnga Padalemman Socce ban sakabbinna oreng se ebuwang ka jadhiya.
[7] Tape ba'na, Hananya, ban ba'na ra'yat kabbi, edhingngagi reya:
[8] Bi-nabbi sabellunna reya la aramallagi ja' paperrangan, balai sarta wabah panyaket bakal teba'a ka sa-bangsa ban karaja'an se wat-kowat sabannya'na.
[9] Tape nabbi se aramallagi kataremtemman, pera' bisa eakowe ja' bendher nabbi se eotos PANGERAN, mon sabarang se eramallagi jareya daddi nyata onggu.”
[10] Hananya pas nyendhal pekolan se epamalang e budhina tang le'er, pas epapotong.
[11] E adha'na sakabbinna ra'yat se hadir e jadhiya Hananya ngoca', “PANGERAN adhabu kantha reya carana Salerana se mapotong kol-pekol se epasang Rato Nebukadnezar e le'erra sa-bangsa kabbi; Pangeran alampa'agiya jareya e dhalem bakto dhu taon.” Saellana jareya sengko' pas ondur.
[12] Ta' saapa abidda saellana kadaddiyan jareya, PANGERAN ngotos sengko'
[13] entar ka Hananya ngoca' kantha reya, “Dhabuna PANGERAN ba'na bisa mapotong kol-pekol dhari kaju, tape bi PANGERAN kol-pekol jareya eganteyana kol-pekol besse.
[14] PANGERAN Se Mahakobasa, Allahna Isra'il, adhabu ja' Salerana masanga kol-pekol besse e le'erra bangsa reya, ban bangsa jareya bakal ngabdiya ka Nebukadnezar rato Babil. PANGERAN adhabu ja' la'-mala' burun alas bi' Pangeran epangabdiya ka kakobasa'anna Nebukadnezar.”
[15] Jareya bi' sengko' ekabala kabbi ka Hananya, saellana jareya sengko' pas ngoca' pole, “Mara edhingngagi, Hananya! Ba'na ta' eotos PANGERAN; bi' ba'na bangsa reya epaparcaja ka caca se lecek.
[16] Daddi PANGERAN dibi' adhabu ja' ba'na epamosna'a dhari bume reya. Taon reya keya ba'na bakal mateya, sabab ba'na nyoro bangsa reya alaban ka PANGERAN.”
[17] Daddi e taon jareya keya e bulan petto', Hananya mate.