[1] Imam Pasyhur pottrana Imer reya kapalana Pangawassa Padalemman Socce. E bakto imam jareya ngedhing sengko' manapa' parkara jareya kabbi,
[2] aba'na laju marenta'agi sopaja sengko' epokol ban ebalakbak e Labang Saketheng Benyamin, iya reya labang saketheng bagiyan attas e Padalemman Socce.
[3] Kalagguwanna saellana Pasyhur mokka' sengko' dhari balakbak, sengko' ngoca' ka imam jareya, “Nyama se eparengngagiya PANGERAN ka sampeyan banne Pasyhur, tape ‘Terror e man-dhimman’.
[4] PANGERAN dibi' adhabu, ‘Bi' Sengko' ba'na epadaddiya terror ka aba'na dibi' ban ka ca-kancana. Ba'na bakal nangaleyana ca-kancana epate'e mosona. Sakabbinna oreng Yahudi bi' Sengko' edina'a ekobasae Rato Babil; sabagiyan e antarana bakal egiba'a ka Babil egabay tawanan, dineng karena bakal epateyana.
[5] Bi' Sengko' mosona epannengnga keya ajara ban ngangko' ka nagara Babil sakabbinna arta e kottha reya, la'-mala' sampe' ka rang-barang sangkolla to-rato Yehuda.
[6] Ban ba'na, Pasyhur, ba'na sabala bakal padha'a etangkep sarta eangko' ka Babil. E jadhiya ba'na bakal mateya ban ekoburragiya; bariya keya sakabbinna kancana ba'na se la ngedhingngagi kaleceganna ba'na kabbi.’ ”
[7] GUSTE, Junandalem pos-ngapose abdidalem, ban abdidalem ampon ekenneng pos-apose. Junandalem lebbi kowat dhari abdidalem, sareng ampon matellok abdidalem. Abdidalem ebi-cebbi oreng tadha' ambuna dhari gu-laggu kantos compet are eya-seya.
[8] Sabban abdidalem acaca kodu aera' salar-kellarra, “Kakejjemman! Balai!” GUSTE, abdidalem ebi-cebbi sareng eya-seya salanjangnga, polana manapa' dhabuwepon Junandalem.
[9] Namong manabi abdidalem akarettek e dhalem ate, “Dina sengko' epaloppa'a ka PANGERAN, ta' acaca'a bit asmana pole,” dhabuwepon Junandalem pas ekarassa akadi apoy panas akadi mardha e dhalem ate. Sareng abdidalem eoddi eja-kaja, namong nyatana abdidalem arassa ta' kababa.
[10] Abdidalem mereng oreng ato'-koto' e man-ka'dhimman, “Oreng padha katako'an parana! Mara reppoddagi ka se neggu' kakobasa'an!” La'-mala' sahabat abdidalem sadaja, padha ngarep bila abdidalem se gaggara. Ca'epon reng-oreng gapaneka, “Pola mon epos-apose, Yeremiya bisa epakala, me' olle sengko' ban ba'na bisa'a males sake'na ate.”
[11] Namong Junandalem, GUSTE, nolonge abdidalem; Junandalem talebat kowat sareng parjuga. Reng-oreng se nyerser sareng nendhes abdidalem badhi kala'a ta' bisa apa-ponapa. Reng-oreng gapaneka bakal todhusa salanjangnga, ta' kalakon sadaja sajjana. Kanespa'anna reng-oreng gapaneka bakal ekaenga'ana saterrossa.
[12] Namong, GUSTE, Pangeran Se Mahakobasa, Junandalem kalaban adil ngoji manossa; Junandalem ngagali ka ate sareng pekkeranna. Daddi, edine abdidalem ka'dhinto, nengale Junandalem males kajahadanna moso, sabab ka Junandalem abdidalem massra'agi parkara abdidalem.
[13] Mara anyanye kaagem PANGERAN, molja'agi Salerana, sabab Salerana ngocol reng-oreng se tatendhes dhari kobasana oreng se daraka.
[14] Ta' salamet tang are kalahiran! Sa'at e bakto sengko' elahirragi ebu mandar eya'-seya'a.
[15] Mandar ta' salamedda keya oreng se ngeba berta se andaddiyagi tang eppa' ce' peragga atena, e bakto ebalai ja' ebu babar lalake' kasorang.
[16] Mandar se ngeba berta jareya padha'a ban tha-kottha se epaancor PANGERAN ta' kalaban ekabellasi sakone'a. Mandar oreng jareya ngedhinga cerrengnga oreng se nyandhang sake' e baja laggu, sarta cerrengnga paperrangan e bakto beddhuk.
[17] Sabab oreng jareya ta' mate'e sengko' e bakto gi' egandhu' ebu, sopaja sengko' pagguna badha e gandhu'anna ebu, sopaja tabu'na tang ebu jareya daddiya tang makam.
[18] Arapa sengko' me' kodu lahir ka dunnya? Pera' kaangguy nanggung sangsara ban karekongan? Ban sopaja odhi'na sengko' reya nanggunga malo saterrossa?