[1] PANGERAN ngotos sengko' entar ka karatonna rato Yehuda, toronanna Daud, epakon manapa' dhabuna ka rato, ban ka para ponggabana, sarta ka pandhudhu' Yerusalim. Reya' dhabuna PANGERAN ka reng-oreng jareya,
[3] “Paadil ban pajujur. Tolong oreng se eperres dhari kakobasa'anna oreng se merres. Ja' nyek-ngenyek otabana alako jahat ka oreng manca, na'-kana' jatim otabana randha. Ja' mate'e oreng se ta' sala e kennengngan reya.
[4] Mon ba'na ajalannagi gu-onggu Tang ta-parenta reya, to-rato se marenta akantha Daud, abareng ban ba-ponggabana sarta ra'yadda bakal maso'a lebat e bang-labang sakethengnga karaton reya nompa' kareta ban jaran.
[5] Tape mon ba'na ta' atoro' ka Tang ta-parenta, Sengko' asompa ja' karaton jareya bi' Sengko' epadaddiya jur-gujuran. Sengko', PANGERAN, la ngoca'.
[6] Monggu ka Sengko' karatonna rato Yehuda ce' bagussa, akantha bagussa tana Gileyad ban nong-gunong Libanon; tape kennengngan jareya bi' Sengko' epadaddiya akantha ra-ara se ta' ekennengnge oreng.
[7] Sengko' madhatengnga oreng se epangancora karaton jareya. Reng-oreng jareya ngeba'a kapak, magujura ga-canggana se bagus se ekagabay dhari kaju comara Libanon, se pas ebuwanga ka dhalem apoy.
[8] Saellana jareya bannya' oreng manca lebada e jadhiya ban saleng atanya arapa bi' Sengko', PANGERAN, kottha se bagus jareya me' epakantha jareya.
[9] Oreng pas bakal nyaoda ja' se daddi lantaranna jareya kabbi polana ba'na ta' neptebbi parjanjiyanna ban Sengko', Allahna, ban polana ba'na nyemba ka lah-illah laen.”
[10] Oreng Yehuda, ba'na ta' osa sossa polana Rato Yosiya seda. Tangese bai Yowahas pottrana, sabab Yowahas la egiba ondur ban ta' kera abali dha' enna'; ta' kera nangale'e pole tana kalahiranna.
[11] Parkara Yowahas, pottrana Yosiya se daddi rato Yehuda agante ramana, PANGERAN adhabu kantha reya, “Yowahas la ondur dhari dhinna' ban ta' kera abali pole.
[12] Oreng jareya bakal mateya e pambuwangan, ba ta' kera nangale'e nagara reya pole.”
[13] Palang oreng se maddek bengko ollena barang ta' adil, ban oreng se maraja bengkona ollena barang ta' jujur. Palang oreng se malako oreng tape ta' endha' aberri' opa.
[14] Palang keya oreng se ngoca', “Sengko' maddegga karaton se raja, epobuwana mar-kamar se ja-raja e loteng,” saellana jareya e karaton buru pas epasange candhela se ebarangkae kaju comara Libanon, ban eeccet mera.
[15] Peyarsa'agi, Rato Yoyakim! Manabi junandalem maddek karaton ngangguy kaju comara Libanon se paleng sae, ponapa gapaneka menangka bukte ja' junandalem rato se asaeyan dhari to-rato laennepon? Ngereng kaemodi ramaepon junandalem: Salerana odhi' senneng sareng ahasel e dhalem sadajana usahaepon sabab saleraepon ros-terrosan loros sareng jujur sarengngan pole adil e dhalem ngadili parkaraepon oreng mesken. Salerressepon pajat kodu saka'dhinto odhi'epon oreng se oneng ka PANGERAN.
[17] Namong junandalem banneyan, Yoyakim; junandalem namong nyare ontongnga dibi'. Junandalem mate'e oreng se ta' sala, ban nendhes ra'yadda epakejjem.
[18] Daddi parkara Yoyakim rato Yehuda, pottrana Yosiya, PANGERAN, adhabu kantha reya, “Pamatena ta' kera etangese oreng; tadha' oreng se ngoca'a, ‘Adhu, tang kanca, neserra, neserra!’ Tadha' oreng se sossa'a sarta nanges sambi ngoca', ‘Adhu, Guste rato, neserra!’
[19] Yoyakim bakal eereda pas epelpallagiya kalowar dhari labang saketthengnga Yerusalim epakantha babathangnga hemar.”
[20] Dhabuna PANGERAN, “He pandhudhu' Yerusalim, kassa' entar ka Libanon ban ka Basan, pas aera' e jadhiya. Acerreng e pagunongan Mo'ab, sabab sakutuna ba'na la kala kabbi.
[21] Sengko' la acaca ka ba'na e bakto ba'na gi' nyaman odhi'na, tape ba'na ta' ngedhingngagi. Pajat kantha jareya tengkana ba'na dhari lamba' sampe' sateya; ba'na ta' tao endha' atoro' ka Sengko'.
[22] Daddi para pamimpinna ba'na bakal mosna'a akantha se ekebbat angen. Tu-sakutuna ba'na bakal eangko'a epadaddi tawanan, ban kotthana ba'na eya'-seya'a ban epamalowa polana sakabbinna kajahadanna ba'na.
[23] Ba'na odhi' aman e kalenglenge ga-cangga comara Libanon, tape mon ba'na la ekenneng sake', ba'na bakal nyangsara'a akantha babine' se rembi'a.”
[24] PANGERAN adhabu ka Rato Yoyakhin, pottrana Yoyakim rato Yehuda, “Bit nyamana Sengko', Allah se odhi', Sengko' ngoca'a epaterranga, ja' maske ba'na reya akantha sello satempel se badha e Tang tanang se kangan sakale, tape bi' Sengko' ba'na edabu'a
[25] pas epassra'agiya ka reng-oreng se ekatako'e ba'na ban se terro mateyana ba'na. Bi' Sengko' ba'na epassra'agiya ka Nebukadnezar rato Babil ban reng-orengnga.
[26] Ba'na ban ebuna bi' Sengko' eojuga ebuwanga ka nagara se banne tana kalahiranna ba'na, ban e jadhiya ba'na ban ebuna bakal mateya.
[27] Ba'na bakal ce' kerrongnga ka nagara reya, tape ba'na ta' kera ngenneng abali.”
[28] Sengko' Yeremiya ngoca', “Apa Rato Yoyakhin reya la akantha polo' se bella se ebuwang ban ta' ekendha'i oreng pole? Apa kareya sababba Yoyakhin ban tra-pottrana eojuk ban ebuwang ka nagara se ta' ekataowe otabana epeyarsa sakale bi' reng-oreng jareya?”
[29] Adhu tang nagara, mara edhingngagi apa dhabuna PANGERAN,
[30] “Oreng rowa la etantowagi kaelangana na'-ana'na ban ros-terrosan ta' ahasel e dhalem odhi'na. Dhari toronanna tadha' se ahasela marenta e Yehuda menangka rato toronanna Daud. Sengko', PANGERAN, la ngoca'.”