[1] Ериконö воöм бöрын Исус мунiс кар пырыс.
[2] Сэнi олiс Заккей нима озыр морт, вот перйысьяслöн юралысьыс.
[3] Сiйö ёна кöсйис аддзывны Исусöс да тöдмавны, кодi Сiйö сэтшöмыс. Но ичöт тушаыс вöсна йöз сайсяньыс эз вермы аддзынысö.
[4] Заккей котöртiс водзö да кавшасис пу вылö, медым аддзыны Исусöс. Буретш сiйö туйöдыс локтö вöлi Исус.
[5] Пу весьтö воигöн Исус видзöдлiс вывлань, аддзис Заккейöс да шуис: «Заккей, лэччы öдйöджык. Талун Меным колö лоны тэ ордын».
[6] Заккей тэрмасьöмöн лэччис да долыдпырысь сибöдiс Исусöс гортас.
[7] Тайöс аддзылысьяс шуасисны, мыжа морт ордö пö мунiс.
[8] Заккей сувтiс да шуис: «Господьöй, овмöслысь джынсö сета гöльяслы да кодлысь ылöдлöмöн босьтi, сылы нёль пöвстöн вешта».
[9] Исус шуис сылы: «Талун воис мездмöм тайö керкаас. Öд сiйö тшöтш Öвраам пи.
[10] Морт Пи локтiс корсьны да мездыны вошöмаöс».
[11] Кывзысьяслы Исус висьталiс нöшта öти велöданвисьт, öд Сiйö матыстчис Ерусалимлань, и унаöн чайтiсны, мый регыд нин воас Енлöн Юралöмыс.
[12] Исус висьталiс: «Öксы рöдысь öти морт мöдöдчас ылi муö, медым сэнi öксы ним босьтны да бöр локны аслас муö öксыöн.
[13] Сiйö корас ас дорас дас кесйöгöс, быдöнлы сетас зарни сьöм да шуас: "Менам локтöдз тайö сьöмсö уджö бергöдöй".
[14] Ас войтырыслы тайö мортыс вöлi мустöм, та вöсна бöрсяньыс найö мöдöдасны юöртысьясöс висьтавны, огö пö кöсйöй, медым сiйö вöлi миян öксыöн.
[15] Öксыöн локтöм бöрын сiйö тшöктас корны кесйöгъяссö, кодъяслы сетлiс сьöмсö. Кöсъяс тöдмавны, уна-ö найö содтöд босьтiсны.
[16] Öти локтас да шуас: "Ыджыдöй, тэнад зарни сьöмыд вайис содтöд дасöс".
[17] Öксы шуас: "Бура вöчин. Тэ бур кесйöг. Ичöтас тэ эскана вöлiн, дас карöн веськöдлыны кутан".
[18] Локтас мöд кесйöг да шуас: "Ыджыдöй, тэнад зарни сьöмыд вайис содтöд витöс".
[19] Сылы öксы шуас: "Вит карöн веськöдлыны кутан".
[20] Локтас коймöд кесйöг да шуас: "Ыджыдöй, со, тэнад сьöмыд, чышъянö гартыштöмöн видзи сiйöс.
[21] Ме полi тэысь, тэ öд чорыд морт: босьтан, мый эн пуктывлы, да вундан, мый эн кöдзлы".
[22] Öксы шуас сылы: "Шогмытöм кесйöг! Аслад кывъясыд серти ме мыжда тэнö. Тэ тöдiн, мый ме чорыд морт, босьта, мый эг пуктывлы, да вунда, мый эг кöдзлы.
[23] Мыйла сьöмчукöртанiнö эн пукты менсьым сьöмöс, локтöм бöрам эськö содтöдöн босьтi?"
[24] Öксы шуас сыкöд сулалысьяслы: "Мырддьöй сылысь сьöмсö да сетöй дас сьöмаыслы".
[25] Найö шуасны: "Ыджыдöй, сылöн эм нин дас сьöмыс".
[26] Öксы шуас: "Висьтала тiянлы: кодлöн эм, сылы сетасны. Кодлöн абу, сылысь бöръясö босьтасны.
[27] Меным паныд мунысьясöс, менам юралöмлы паныд сувтысьясöс вайöдöй татчö да виöй найöс менам син водзын"».
[28] Тайöс висьталöм бöрын Исус мунiс водзö Ерусалимлань.
[29] Олив керöсын сулалысь Виффагия да Вифания сиктъяслань матыстчигöн Исус мöдöдiс Ассьыс кык велöдчысьсö
[30] да шуис: «Мунöй тайö сиктас. Сэтысь аддзанныд домалöм том осёлöс, сы вылö некод на эз пуксьыв. Разьöй сiйöс да вайöдöй татчö.
[31] Юаласны кö, мыйла разянныд, вочавидзöй, мый сiйö колö Господьлы».
[32] Мöдöдöмаяс мунiсны да аддзисны: ставыс вöлi Исуслöн висьталöм серти.
[33] Том осёлöс разиганыс видзысьыс юалiс: «Мыйла разянныд?»
[34] Велöдчысьяс вочавидзисны: «Сiйö колö Господьлы».
[35] Том осёлöс вайöдiсны Исус дiнö. Сэсся шлапкисны осёл вылö паськöмнысö да отсалiсны Исуслы пуксьынысö.
[36] Кор Сiйö мунiс осёл вылын, йöзыс вольсавлiсны паськöмнысö туй вылас.
[37] Кор Исус матыстчис Олив керöсысь лэччанiнö, став Сылöн велöдчысьыс кыпыда да гора шыöн пондiсны ошкыны Енмöс став аддзылöм шензьöданаторсьыс.
[38] Найö шуалiсны: – Бурсиöма Господь нимöн локтысь Öксыöс! Лöнь олöм енэж вылын, ошкöм Медвылыссалы!
[39] Йöз чукöрысь фарисейясысь кодсюрö шуисны Исуслы: «Велöдысь, öлöд велöдчысьястö!»
[40] Исус воча шуис: «Висьтала тiянлы: найö кö ланьтасны, изъяс шыасясны».
[41] Ерусалимлань матыстчигöн Исус видзöдлiс кар вылас да бöрдöмöн
[42] шуалiс: «Тöдiн кö эськö тэ талун, мый вайö тэныд лöнь олöмсö! Öнi тайö тупкыса тэнад синлы.
[43] Воас лун, кор тэныд паныд мунысьяс лэптасны тэ гöгöр тымöд, кытшаласны тэнö да быд боксянь дзескöдасны.
[44] Тэнö жугöдасны дзоньнас, олысьястö виаласны – из вылö из оз кольны, öд тэ эн кöсйы тöдны тэ дiнö Енлысь волöмсö».
[45] Исус пырис крамö да пондiс вöтлавны сэтысь вузасьысь-ньöбасьысьясöс.
[46] Сiйö шуис налы: «Гижöма: "Менам керкаöй – кевмысян керка". А тi сыысь вöчинныд лёк вöчысьяслы дзебсянiн».
[47] Исус быд лун велöдiс крамын. Аркирейяс, Индöдö велöдысьяс да веськöдлысьяс кöсйисны вины Сiйöс.
[48] Сöмын эз тöдны, кыдзи тайöс вöчны, öд став йöзыс вешйывтöг кывзiсны Исусöс.