[1] Шойччан лунö Исус мунiс фарисейяслöн öти юралысь ордö сёйны. Сэнi ставöн сюся видзöдiсны Исус бöрся.
[2] Сы дiнö локтiс ва пыкталöмöн висьысь морт.
[3] Исус юалiс Индöдö велöдысьяслысь да фарисейяслысь: «Позьö-ö шойччан лунö бурдöднысö?»
[4] Найö чöв олiсны. Исус инмöдчылöмöн бурдöдiс висьысьöс да ыстiс сiйöс гортас.
[5] Исус бара юалiс: «Шойччан лунö кö тiян осёлныд либö öшныд усяс юкмöсö, онö öмöй пырысь-пыр лэптöй сiйöс сэтысь?»
[6] Найö нинöм эз вермыны воча шуны.
[7] Исус казялiс, мый пызан сайö пуксигöн корöмаяс корсисны бурджыкинсö. Сэки Сiйö шыасис на дiнö велöданвисьтöн:
[8] «Корасны кö тэнö кöлысь вылö, эн пуксьы бурджыкинас. Сэнi вермас лоны тшöтш кодкö, кодi корöмаяс пиысь пыдди пуктанаджык тэысь.
[9] Сэки кöлысь вылö корысь матыстчас тэ дiнö да шуас: "Тайö мортыс мед пуксяс татчö". Сэки тэ яналан, öд тэныд ковмас вуджны пызан помас.
[10] Кор тэ локтан кöлысь вылö, пуксьы пызан помланьыс. Тэнö корысь кö матыстчас да шуас: "Ёртöй, пуксьы матöджык", сэки тэ лоан корöмаяс водзын пыдди пуктöмаöн.
[11] Öд асьсö вылö пуктысьöс лэдзасны, асьсö улö пуктысьöс кыпöдасны».
[12] Сэсся Исус шуис Сiйöс корысьлы: «Лöсьöдан кö пызан, эн корав ёртъястö, вокъястö, рöдвужтö, орччöн озыра олысьястö. Öд найö сэсся коркö асьныс корасны тэнö, тадзи мынтысясны тэныд.
[13] Мöдарö, лöсьöдан кö пызан, кор гöльясöс, доймалöмаясöс, коктöмъясöс да синтöмъясöс.
[14] Тэ шуда лоан, öд найö оз вермыны мынтысьнысö тэныд. Тэныд лоö мынтöма веськыда олысьяслöн ловзьöм дырйи».
[15] Тайöс кылöм бöрын сёйысьясысь öти шуис: «Шуда Енлöн Юраланiнын пызан сайö пуксьысь!»
[16] Исус воча шуис: «Öти морт ыджыд пызан лöсьöдас да унаöс корас.
[17] Пызан сайö пуксян кад матыстчигöн сiйö мöдöдас ассьыс кесйöгсö висьтавны корöмаяслы: "Локтöй, ставыс нин дась".
[18] Водзвыв сёрнитчöмöн моз ставныс шуасны, огö пö вермöй локнысö. Öти шуас: "Ме му ньöби, колö ветлыны видзöдлыны сiйöс. Эн дöзмы, ог эшты".
[19] Мöд шуас: "Дас öш ньöби, муна видлыны найöс. Эн дöзмы".
[20] Коймöд шуас: "Ме гöтраси да, ог вермы локнысö".
[21] Кесйöг бöр локтас да висьталас та йылысь ыджыдыслы. Сiйö ёна скöрмас да шуас кесйöгыслы: "Мун дзик пыр туйвежъясö да йöзаинъясö, вайöд татчö гöльясöс, доймалöмаясöс, коктöмъясöс да синтöмъясöс".
[22] Локтöм бöрас кесйöг шуас: "Ыджыдöй, тэнсьыд тшöктöмтö вöчи, но пызан саяд эм на пуксянiныс".
[23] Мöдыс вочавидзас: "Пет карсьыс, ветлы туйяс-потшöсъяс пöлöн да тшöкты локнысö, медым менам керкаöй вöлi тыр.
[24] Висьтала тiянлы: воддза корöмаясысь весиг öти морт оз видлы менсьым пызанвыв сёянöс". Унаöс корöма, но этшаöс бöрйöма».
[25] Уна йöз мунiс Исускöд. Налань бергöдчылöмöн Сiйö шуис:
[26] «Ме дiнö локтысьлы кö бать-мамыс, гöтырыс, ныв-пиыс, чой-вокыс да аслас олöмыс Ме дорысь мусаджык, сiйö оз вермы лоны Менам велöдчысьöн.
[27] Кодi оз ну ассьыс крестсö да оз лок Ме бöрся, сiйö оз вермы лоны Менам велöдчысьöн.
[28] Кодкö тiян пиысь кö мöвпыштас ыджыд керка лэптыны, оз-ö сiйö водзджык пуксьы да артышт, тырмас-ö сылöн сьöмыс керкасö лэптыны.
[29] Вермас артмыны, мый подувсö пуктас, а помавнысö оз вермы. Сэки пондасны серавны сiйöс:
[30] "Видзöдлöй, лэптынысö босьтчис, а помавнысö эз вермы!"
[31] Öксылы кö ковмас тышö петны мöд öксылы паныд, оз-ö сiйö водзджык пуксьы да бура мöвпышт, вермас-ö сiйö дас сюрса тышкайöзнас водзсасьны кызь сюрса тышкайöзкöд.
[32] Оз кö вермы, сiйö мöдöдас сёрнитчысьясöс паныд локтысь öксы дiнö, мед бурасьны сыкöд.
[33] Тi кö онö кольöй ставсö, мый тiян эм, онö вермöй лоны Менам велöдчысьясöн».
[34] «Солыд – буртор. Но солыс кö воштас ассьыс вынсö, кыдзи сiйöс бöр соланас вöчан?
[35] Сiйöс весиг оз шогмы муö сюйны, сöмын кольö шыбитны. Кодлöн эм пель, мед кылö!»