<Рʼутʼ 1

[1] Һена сәрwертийа һʼакьмада wәлетда бу хәлайи. Жь Бәйтләһʼма Щьһуда мәрьвәк тʼәви кʼӧлфәта хwә у һәр дӧ кӧрʼед хwә чу әʼрде Моwабе хәрибийеда ма.

[2] Наве wи мәрьви Әлимәләх бу, наве кʼӧлфәта wи Наһоми бу, наве һәр дӧ кӧрʼа, йәк Маһʼлон бу, йәк жи Кʼилйон. Әвана Әфратʼи бун, жь Бәйтләһʼма Щьһуда чунә әʼрде Моwабе у ль wьр ман.

[3] Мере Наһомийе Әлимәләх мьр, Наһоми һәр дӧ кӧрʼава ман.

[4] Ван һәр дӧ кӧрʼа qизед Моwабийа стандьн, наве йәке Орпа бу, наве йәке жи Рʼутʼ. Әвана ль wьр wәкә дәһә сала ман.

[5] Паше һәр дӧ кӧрʼе wе Маһʼлон, Кʼилйон жи мьрьн у әве кʼӧлфәте һәр дӧ кӧрʼ мерва ӧнда кьрьн.

[6] Пәй ве йәкерʼа әва рʼабу кӧ тʼәви һәр дӧ букед хwә жь әʼрде Моwабе вәгәрʼә wәлате хwә, чьмки әве әʼрде Моwабеда бьһистьбу, кӧ Хӧдан сәри ль щьмәʼта хwә хьстийә, рʼьсqе wан гиһанди йә.

[7] Әва жь wи щийе хwә, тʼәви һәр дӧ букед хwә рʼабу кӧ рʼекʼәвә вәгәрʼә wәлате Щьһуда.

[8] Һьнге Наһомийе готә һәр дӧ букед хwә: «Һәрʼьн лаwо, һәр кәс вәгәрʼә мала баве хwә. Бьра Хӧдан рʼәʼма хwә ль wә бькә, һун һьндава мьн у меред хwәйә мьрида чаwа бунә, әw wәкә wе йәке жи бинә пешийа wә.

[9] Бьра Хӧдан бәхте wә вәкә, һәр кәс жь wә мала мере хwәда сьтʼар бә». Пәй ве готьнерʼа Наһоми чу рʼуйе wан, һьнге зукин кʼәтә wан әw гьрийан

[10] у готьн: «На, әме жи тʼәви тә ль сәр мьләте тәда вәгәрʼьн».

[11] Ле Наһомийе готә wан: «На qизед мьн, пашда вәгәрʼьн, һуне тʼәви мьн бенә чь? Тʼӧ бәтʼьне мьнда кӧрʼ һәнә, кӧ әw бьбьнә меред wә?

[12] Пашда вәгәрʼьн һәрʼьн qизед мьн, чьмки мьн иди салед хwә дәрбаз кьрьнә, әз ха иди мер накьм. Йан һәгәр мьн бьгота гӧман һәйә, кӧ әзе ишәв мер кьм кӧрʼа биньм,

[13] гәло һуне һаqас wәхт бьмана, һʼәта әw мәзьн буна? Йан бона ве йәке һуне бьмана wәйе мер нәкьрана? На qизед мьн, дьле мьн жь wә зәʼфтьр ль сәр wә дешә, чьмки дәсте Хӧдан ль сәр мьн гьран буйә».

[14] У wан диса кьрә зарин у гьрийан. Орпа чу рʼуйе хwәсийа хwә вәгәрʼийа, ле Рʼутʼ жь wе нәqәтийа.

[15] Һьнге Наһомийе готә Рʼутʼе: «Ва йә жьнтʼийа тә ль сәр щьмәʼта хwә у хwәдейед хwәда вәгәрʼийа, тӧ жи ль пәй жьнтʼийа хwә һәрʼә».

[16] Ле Рʼутʼе готе: «Пʼейи ль сәр мьн нәкә, кӧ әз жь тә бьqәтьм дур кʼәвьм, чьмки тӧ кʼӧда һәрʼи әзе бем, тӧ ль кʼӧ бьмини әзе жи ль wьр бьминьм. Щьмәʼта тәйе щьмәʼта мьн бә, Хwәде тәйе Хwәдейе мьн бә.

[17] Тӧ ль кʼидәре бьмьри әзе жи ль wьр бьмьрьм у ль wьр бемә дәфьн кьрьне. Чь һатийә ль сәре мьн, бьра Хӧдан жь ве йәке хьрабтьр бинә ль сәре мьн, һәгәр пештьри мьрьне, тьштәки майин мьн жь тә бьqәтинә».

[18] Гава Наһомийе дина хwә дайе, wәки әве нета хwәда данийә кӧ әʼсә тʼәви wе һәрʼә, иди зор ле нәкьр.

[19] Һьнге һәр дӧйа һәврʼа данә ль сәр рʼе һʼәта Бәйтләһʼме чун. У гава кʼәтьнә Бәйтләһʼме, һʼәж кʼәтә тʼәмамийа бажер у кʼӧлфәта дьготьн: «Әва Наһоми йә?»

[20] Ле әwе дьготә wан: «Мьнрʼа нәбежьн Наһоми , ле мьнрʼа бежьн Мара , чьмки Йе Һәри Зор дәрд у кӧлава әз данимә.

[21] Әз тʼер тʼьжи дәркʼәтьм чум, ле Хӧдан әз дәствала вәгәрʼандьм. Иди чьма бежьнә мьн Наһоми? Һәгәр Хӧдан чәрха мьн чʼәп кьр у Йе Һәри Зор әз кьрьмә ве рʼоже?»

[22] Бь ви аwайи Наһоми тʼәви бука хwә Рʼутʼа Моwаби, жь әʼрде Моwабийе вәгәрʼийа у wәхте дәстпекьрьна щәһдьруне гьһиштьнә Бәйтләһʼме.