Рʼутʼ 3
[1] Хwәсийа Рʼутʼе, Наһомийе готә wе: «Qиза мьн, әз дьхwазьм кӧ тә сьтʼар кьм, кӧ ахьрийа тә хер бә.
[2] Ва йә Боwазе жь рʼькʼьнйата мә, щәм щарийед кʼижани тӧ дьмайи, әwе ишәв бедәреда щеһ бьдә бе.
[3] Рʼабә ньһа сәре хwә бьшо, рʼуне бинхwәш ль хwә дә, хәмьла хwә ль хwә кә у бәржери бедәре бә, ле тӧ хwә нишани wи нәди, һʼәта әw хwарьн вәхwарьна хwә хьлаз нәкә.
[4] У гава әw дькә кӧ рʼазе, тӧ госqӧлахийа щийе рʼазана wи бькә у һәрʼә бьнпʼийева бькʼәвә щийе wи пʼалдә. Һьнге әwе тәрʼа бежә, кӧ тӧ чь гәрәке бьки».
[5] Рʼутʼе готә wе: «Тә чь тʼәми данә мьн, әзе һʼәму тьшти жи ӧса бькьм».
[6] Әw бәржери бедәре бу у хwәсийе чаwа тʼәми дабуйе, әwе ӧса жи кьр.
[7] Боwаз пәй хwарьн вәхwарьнерʼа, кʼефа wи щи, чу бәр щәһе лод кьри пʼалдә кӧ рʼазе. Һьнге әwа тәлә тәл чу, бьнпʼийева кʼәтә нава щийе wи пʼалда.
[8] Ниве шәве әw мәрьв вәщьньqи, вәгәрʼийа дина хwә дайе, ва йә кʼӧлфәтәк бьнпʼийеда пʼалдайи йә.
[9] Әwи же пьрси: «Тӧ кʼе йи?» Әwе готе: «Әз щарийа тә Рʼутʼ ьм, пʼеша хwә бавежә ль сәр щарийа хwә, чьмки тӧ пьсмаме мьни незик и».
[10] Әwи готе: «Дӧайе Хӧдан ль тә бә qиза мьн! Рʼастийа тәйә ве ахьрийе жь йа пешьн qәнщтьр ә, чьмки тӧ пәй щаһьлед кʼәсиб йан дәwләти нәчуйи.
[11] Ньһа qиза мьн нәтьрсә, тә чь мьнрʼа гот әзе бькьм, чьмки тʼәмамийа щьмәʼта бажер занә, кӧ тӧ кʼӧлфәтәкә хwәйиәʼсьл и.
[12] Рʼаст ә кӧ әз пьсмаме тә мә, ле нава пьсмамтийа мәда йәки һе незик һәйә.
[13] Ишәв ль вьр шәва хwә дәрбаз кә. Сьбәһе зу һәгәр әw алийе борщдарийа пьсмамтийеда тә qәбул кә, әw тьштәки qәнщ ә, бьра qәбул кә, ле һәгәр әw борщдарийа пьсмамтийе нәхwазә бьqәдинә тә qәбул кә, һьнге әзе бьqәдиньм у тә qәбул кьм. Хwәде һәйә! Пʼалдә ль вьр һʼәта сьбе».
[14] Әве һʼәта кʼәwе сьбәйе бьнпʼийа wида пʼалда у ӧса зу рʼабу, кӧ һе тʼӧ кәси нькарьбу кәсәк нас кьра. У һьнге әwи готе: «Бьра тʼӧ кәс ньзаньбә, кӧ кʼӧлфәт кʼәтийә бедәре».
[15] Паше готә wе: «Шала ль сәр хwә бинә вьр бьгьрә». Әwе әw гьрт у Боwаз шәш код щәһ чап кьр, да ль сәр мьла у әw чу бажер.
[16] Әwа жи чу щәм хwәсийа хwә у wе же пьрси: «Qиза мьн, тӧ чаwа йи?» Әwе хwәсиерʼа гьли кьр, чь кӧ wи мәрьви бона wе кьрьбу.
[17] Паше жи хwәсийерʼа гот: «Әв шәш код щәһ әwи да мьн, гот: ‹Дәствала ль сәр хwәсийа хwәда вәнәгәрʼә›».
[18] Һьнге Наһомийе готе: «Qиза мьн ньһа сәбьр кә, һʼәта кӧ бьзаньби әв шьхӧле wе чаwа бе сери, чьмки әw мәрьва һʼәта иро әви шьхӧли сафи нәкә, дьле wи рʼьһʼәт набә».