Рʼутʼ 2
[1] Пьсмамәки малмеране Наһомийе һәбу. Әва жь рʼькʼьнйата Әлимәләх бу, йәки хwәйиһәбук, бь нав у дәнг бу, наве wи Боwаз бу.
[2] Рʼутʼа Моwаби готә Наһомийе: «Әз һәрʼьмә нава зәвийа, дьле кʼе ль сәр мьн бешә, әз пәй wи һәрʼьм сьмбьла тʼоп кьм». Әwе готә wе: «Һәрʼә qиза мьн».
[3] У Рʼутʼ чу кʼәтә зәвике, пәй нандьруйа сьмбьл тʼоп кьрьн. У жерʼа ӧса льһәв һатьбу, кӧ әw кʼәтьбу зәвийа Боwазе жь рʼькʼьнйата Әлимәләх.
[4] Аwа Боwаз жь Бәйтләһʼме һат готә нандьруйа: «Хӧдан qәwата wәрʼа бә!» Wана ле вәгәрʼанд у гот: «Бьра Хӧдан дӧа ль тә бькә!»
[5] Һьнге Боwаз жь хӧламе кӧ чаwа сәрwер ль сәр нандьруйа кʼьфш кьрьбу пьрси: «Әва qиза кʼе йә?»
[6] Хӧламе сәрwере нандьруйа ле вәгәрʼанд у гот: «Әва qизька Моwаби йә, йа кӧ тʼәви Наһомийе жь әʼрде Моwабийе вәгәрʼийайә һатийә.
[7] Әве готә мә: ‹Изьна wә һәбә кӧ әз пәй нандьруйа сьмбьла бьчьньм у жь нава qәwшада жи тʼоп кьм›. Ве сьбе зува әва һатийә у һʼәта ньһа әw ль вьр ә, qәт нәчуйә мале рʼьһʼәт бә жи».
[8] Һьнге Боwаз готә Рʼутʼе: «Бьбьһе qиза мьн, нәчи әʼрде хәлqеда тʼоп нәки у жь вьр жи дур нәкʼәви, ле ль вьр щәм щарийед мьн бьмини.
[9] Дина хwә бьдә wе зәвийа кӧ әw дьдьрун у ль пәй wан һәрʼә. Мьн бона тә тʼәми дайә хӧлама, кӧ qәдьре тә накʼәвьн. Гава тʼиби жи, незики дәрдана би у жь ава хӧлама кʼьшанди вәхwи».
[10] Рʼутʼ дәвәрʼуйа чу әʼрде у ль бәр та бу готе: «Әва жь чийә кӧ дьле тә һаqаси ль сәр мьн дешә у бона мьн жи һаqаси пьрс пьрсийара дьки? Нә әз йәкә хәриб ьм?»
[11] Һьнге Боwаз ле вәгәрʼанд у готе: «Пәй мьрьна мере хwәрʼа, тә чь qәнщи хwәсийа хwәрʼа кьрийә, һʼәму кьрьнед тә мьнрʼа гьли кьрьнә. Ӧса жи әʼйан ә кӧ тә чаwа де у баве хwә у wәлате хwә һьштийә у һати гьһишти wе щьмәʼте, кʼижан кӧ тә пешда нас нәдькьр.
[12] Бьра wәкә кьрьна тә Хӧдан бинә пешийа тә у бьра Хӧдан Хwәдейе Исраел ль сәр тәда бьбаринә, wәки тӧ һати бьн пʼәрʼе wида сьтʼарәке бьбини».
[13] Һьнге Рʼутʼе готе: «Хwәйе мьн, әз дьбиньм кӧ дьле тә ль сәр мьн дьшәwьтә, чьмки тӧ бәр дьле мьнда һати у тә тʼәви щарийа хwә ширьн ширьн хәбәр да, ле рʼаст әз wәкә щарикә тә жи ниньм».
[14] Боwаз wәхте нанхwарьне готә wе: «Кʼәрәм кә сәр нен у пәʼрийе хwә сьркеда кә». Рʼутʼ тʼәви нандьруйа рʼуньшт. Әwи фьрикед qәланди данә wе, әwе хwар тʼер бу у бәр жи ма.
[15] Гав әwа рʼабу чу сьмбьла тʼоп кә, Боwаз тʼәми да хӧламед хwә у гот: «Бьра әw жь нав qәwшада жи тʼоп кә у wе нәдьнә шәрме.
[16] Бона хатьре wе жь qәwша жи бавежьнә әʼрде у бьһельн бьра тʼоп кә, бехатьрийа wе нәкьн».
[17] Әwе һʼәта бәре еваре wе зәвийеда тʼоп кьр у гава әw кʼӧта, бу тʼорпә щәһ.
[18] Рʼутʼе тʼорпе хwә һьлда чу бажер у хwәсийа wе әw щәһе wейи тʼопкьри дит, һьнге Рʼутʼе әw бәрмайие жь wи хӧрәке кӧ пе тʼер бьбу жи дәрхьст да wе.
[19] Һьнге хwәсийе же пьрси у готе: «Иро тә жь кʼӧ тʼоп кьрийә у ль кʼӧ хәбьти йи? Бьра дӧа ль wи бә, йе кӧ тәрʼа кьрийә qәнщи». Һьнге әwе хwәсийа хwәрʼа гьли кьр, кӧ щәм кʼе хәбьтийә у гот: «Наве wи мәрьве кӧ әз иро щәм wи хәбьтимә Боwаз ә».
[20] Наһомийе готә бука хwә: «Бьра дӧайе Хӧдан ль wи бә, кӧ әwи пьшта хwә нәда мьри у зендийа». Наһомийе готә wе: «Әw мәрьва йәки жь рʼькʼьнйата мә йә, пьсмамәки мәйи незик ә, гәрәке али мә бькә ».
[21] Һьнге Рʼутʼа Моwаби гот: «Әwи ӧса жи готә мьн: ‹Жь хӧламед мьн дур нәкʼәви, һʼәта кӧ әw нандьруна мьн хьлаз нәкьн›».
[22] Наһомийе бука хwә Рʼутʼрʼа гот: «Qәнщ ә qиза мьн, кӧ тӧ тʼәви щарийед wи һәрʼи бейи у тә нава әʼрде хәлqеда нәбиньн».
[23] Рʼутʼ жь щарийед Боwаз дур нәкʼәт, һʼәта хьлазийа щәһдьрун у гәньмдьруне сьмбьл тʼоп дькьрьн у ль щәм хwәсийа хwә жи дьма.