[1] تُو، کْرَمِیَࢽِ ࢽجَرَاکّْࢽَ کُورُو کُرُوࢽْدُو رَاکّْࢽَسُو، ࢽَیِمَ کَرْوُکْجِࢽِ یٜ، دَرَجَࢽِ یٜ وُو؞ کْرَوُووُࢽِ، کْمَلَࢽْ دُࢽُووَرُو دَࢽُواْ!
[2] یَ أَࢻُودِیَا یَ سِࢽْتِیَا لُواْࢽْکّْࢽَ، کْمَ ࢽَࢽْغَرُو حَࢽْغَلْࢽْجَ تِلُوجُو؞
[3] آه، سَوَࢽِ کِدَیٜ جِرٜىٰ، ࢽِ یٜیَ ࢽجُوُورْکِّ، کَمُ یِࢽْدِ أَࢽِرُو بَࢽَغْࢽٜ؞ تَیِدْ وُوَ کْلٜمَࢽَا سَوَوَࢽِ کِدَیٜ غَࢻْثَࢽَ ثُࢽْجَ ثُرُو کِتَوُ رُویٜࢽْ رُوُوَدَدَ کَلُّو کِدَ کَوُرِ کْجِیٜلَࢽْ ࢽغْࢽْࢻْتَࢽَ؞
[4] سَوِ یَیٜ کْمَࢽْدٜࢽْ کَرْوُࢽْدُو کْجِجُو! کُورُو وَلّْکّٜ وُلْࢽْجَغَکِّ، کَرْوُࢽْدُو کْجِجُو!
[5] وُࢽْدُ یَیٜرُو حَلْࢽْغْلَࢽْدُو ࢻْلٜدُوُو، کْمَدْیٜ کْࢽْدٜࢽْجُ کَرْࢽْجْࢽَ؞
[6] بَرٜ کْلَ أَوِیٜمَࢽْ حَࢽْغَلْࢽْدُو ثِجْࢽِّ، أَمَّ ثُرُو أَوُو ࢻِیٜࢽْ یَیٜ مُودُوَا لُواْالَࢽْ وُسٜدُࢽْ کُࢽْدٜࢽُّو اللَّهرُو کُورُوࢽْدُو إِسَࢽُوغْࢽُواْ!
[7] دَجِ ࢽَࢽْلٜوَ اللَّهیٜ ࢽُودُ ࢻِ یَیٜیَ کُوجْࢽَدْ کَرْوُࢽْدُووَ حَࢽْغَلْࢽْدُووَا عِیسَى أَلْمَسِیوُلَࢽْ رُوجِ؞
[8] دَرْیٜرَمْبُو، کْرَمِیَ، أَوُو جِرٜ سُو، أَوُو دَرَجَا سُو، أَوُو کَلْکَلْ سُو، أَوُو تَیِرْ سُو، أَوُو کْرَوُویٜ سُو، أَوُو کَسَتُّرُو ثَࢽْدْࢽَ سُو، أَوُو لَا ࢽغْلَ بِ ࢽجُࢽْغُورُویٜ مٜࢽَّا، أَوُو أَࢽِیَ تَࢽْغُواْ!
[9] أَوُو وُلَࢽْ رِوَّ یٜ، ࢻَࢽْدُوَّ یٜ، ࢻَࢽُّوَّ یٜ، رُوَّ یٜ سَمَّا دٜوُو، دَجِ اللَّه ࢽَࢽْلٜوَیٜ دَوُࢽْدُوࢽْ دْغَیْ؞
[10] کُورُو وَلْدُوٜ کْرَوُوࢽْدُو وُرُو ࢻْلٜسُوَّدْرُو کْمَلَࢽْ جَوْرُو کَرْوُࢽِ کْجِجْࢽَ؞ أَیْ، ࢽِیَدَ ثَمَࢽْ تَوَّ، أَمَّ دَمَ تِیَ ࢻْلٜدُیٜ ࢻَࢽْدُوِّ؞
[11] مْرَدُࢽِ غْࢽِ ࢽَࢽْغَرُو أَدَ وُلّْکِّ، أَوُووَ لَمَرْ ثُرُوࢽْ دْغَکّْࢽَ ࢻِ یَیٜࢽْ کْلَࢽْ دَدُ رِکّْࢽَ؞
[12] ثُرُو لَمْبِیٜࢽْ دْغَ یٜ ࢽُوکّْࢽَ، ثُرُو لَرَسُیٜࢽْ دْغَ یٜ ࢽُوکّْࢽَ؞ لَمَرْ ࢻِ یَیٜࢽْ کْلَࢽْ دَدُ رِکّْࢽَ، ثُرُو کْࢽَیٜࢽْ بِ کُلْدُیٜࢽْ، ثُرُو لَرَسُیٜࢽْ بِ لَمْبِیٜࢽْ،
[13] أَلْمَسِیوُ دُࢽُو سِدْیٜࢽْ أَوُو سَمَّا رَࢽْغْکّٜ دِکِّ؞
[14] أَدْ یَیٜ، جْکْتُࢽِرُو مُکُّو یَکُّوَّدْ، أَوُو ࢽغْلَ دِوَّ؞
[15] ࢽَیِ ࢻِلِبِوُسُو، ࢽُوࢽُوَّدْ غَیْ، کَوُرِ کْجِ ࢻَࢽُّوَّدْیٜ بَدِدُرَمْࢽْجُࢽْ، سَ دُوُوࢽْ لَرْدُ مَکِدُوࢽِیَیٜیَ کُولّْکّْࢽَدْ، ࢽَیِ رُࢽْدُو غْࢽِیَ، جَمَ عِیسَىٰ غَوُیٜ ࢻَلْمَ وُرُو کْلْدْغْࢽٜ لَمَرْ ࢽجُووَ مُواْایٜرُو مُکُّو ثَکّْࢽِّ؞
[16] بْرْࢽِ تَسَلُوࢽِکَیٜلَࢽْ دْغَکّْࢽَمَࢽْ، ࢻَلَّ کُوجْࢽَرُو أَوُو مْرَدُࢽِ غَلْدُیٜ جُوَسُوَّ؞
[17] کْࢽْجُو ࢽَࢽْدُوࢽْ مُواْکُّورُو غْࢽِ، رِوَ أَوُو دِوَّدْیٜࢽْ ࢻَࢽْدُواْرُو مَکِّ؞
[18] أَیْ، أَوُو سَمَّا ࢻَࢽْدْکّْࢽَ، حَرْ أَدْمَا کُوجْࢽَرُو تْࢽْ کُلّْکّْࢽَ؞ کْࢽْجُو مُکُّو أَبَرَتُسّٜࢽْ سِوَّدَ مُواْکّْࢽَ؞ تَیِدْ کَوُدِ کَلَ کْجِیَ، سَدَا دُوُوࢽْ اللَّه کَسَثِّ یٜ، أَرْدِجِ یٜدْ؞
[19] کُورُو اللَّهࢽِ مْرَدُࢽْدُو ࢽغَ یٜیَ کْلَ أَرْسِیࢽْجُ دَرَجَا عِیسَى أَلْمَسِیوُیٜࢽْ غَلْجِ؞
[20] اللَّه بَوَࢽْدٜرُو حَرْ أَبَدَ أَبَدِࢽُّو دَرَجَ تِیُو! أَمِࢽْ؞
[21] مُمِࢽَّ عِیسَى أَلْمَسِیوُیٜ سَمَّا لٜوَࢽُواْ! کْرَمِیَ وُوَ رُوکُّودْ لٜوَࢽْجَیْ؞
[22] مُمِࢽَّ سَمَّ لٜوَࢽْجَیْ، مَسَمَّࢽُّو تَیِ ࢻَدُو کَیْسَرّٜࢽْ دَسَاࢽَدْ؞
[23] سٜرْ کْمَ عِیسَى أَلْمَسِیوُیٜ ࢽَیِلَࢽْ دْغَ!