[1] دَرْیٜرَمْبُو، کْرَمِیَࢽِ، کْمَ ࢽَࢽْغَرُو کَرْوُࢽْدُو کْجِجُو! أَوُو ثَلَࢽْ ࢽَیِرُو رُوُࢽْجَغَکّْࢽَدَ وَلْدْمٜ رُوُدُوُدْ وُرُو کُرْوُووُ غْࢽِ، کُورُو ࢽَیِ یٜرُو ࢻَیْدَا؞
[2] کْرِیَسُورُو حَࢽْغَلْ غْࢽَࢽُواْ، تَیِ کِدَوُ دِوِسُو یٜ، تِیے کَمْدَوُسُو یٜدْرُو حَࢽْغَلْ غْࢽَࢽُواْ!
[3] أَࢽْدِمَ أَمْ کَجَادَ جِرٜىٰدْ وُو، أَࢽْدِ دُوُوࢽْ اللَّهَ رُحُࢽْجُیٜࢽْ یُࢽْغُورِیٜ یٜ، عِیسَى أَلْمَسِیوُلَࢽْ أَوُلُو بُیْیٜ یٜ، کُورُو حَلْ تِییٜرُو ࢽجُتْکْیْیٜوَوُو یٜدْ؞
[4] أَدْ یَیٜ وُ یٜ دَلِلْࢽِ حَلْ تِییٜرُو ࢽجُتُّوُیٜ مبٜجِ؞ کَمْ لَا دَلِلْࢽْجُوَا، وُ تِیَ کُوکّْࢽَ:
[5] تَمْبْکّْࢽَیٜ کَوُ وُسْکُوَ وُوَ کَجَسٜرَ، وُ إِسْرَاءِیلَمَ جِرِ بِلِیَمِࢽُیٜ یَوْدِ کَدُوُ یَوْدِیَیٜ، کَࢽْجِ أَتَّوْرَیٜࢽْ ࢻَرِسَ،
[6] کَࢽْجِ کُواْرِیٜࢽْ جَمَ عِیسَىٰ غَوُوَ بَسَرْدُمَ، کَࢽْجِ جِرٜىٰࢽْ شَرَ اللَّهیٜ تَلْدُ بَوُووَرُو غَمَ؞
[7] أَمَّ أَوُو وُرُو بُرْوُوࢽْ ࢻَࢽْدِدْ، کْرْمَ أَوُو أَࢽِیَ أَلْمَسِیوُ ࢽَࢽْغَرُو أَسَرُّو ࢽغُوکّْࢽَ؞
[8] آه، کْمَࢽِ عِیسَى أَلْمَسِیوُوَ ࢽُودُیٜ دَرَجَࢽْجُدْ أَوِ یَیٜیَ کُوجْࢽَ ࢽَࢽْغَرُو، أَوُو سَمَّا أَسَرُّو ࢽغُوکّْࢽَ؞ أَیْ، تِ ࢽَࢽْغَرُو أَوِ یَیٜیَ ࢻُدّْکّٜ تَیِیَ بُووُ ࢻَتُّو ࢽغُوکّْࢽَ، وُ یٜ أَلْمَسِیوُوَ ࢻَࢽْدْکُّورُو،
[9] تِ یٜ وُوَ سُوَࢽْدُورُو؞ وُدْ وَدَ أَتَّوْرَیٜ غَلَࢽْ غْࢽِ، أَلْمَسِیوُوَ مٜرْسَدُلَࢽْ جِرٜمَرُو وَلْیٜکُّو، ࢽَࢽْجِرٜ دُوُوࢽْ کَمْبْرْسٜىٰࢽْ ࢽَ اللَّهیٜࢽْ إِسِدْ؞
[10] أَلْمَسِیوُوَ کْࢽْدُوُو کَرْمُولَࢽْ ثِدُࢽْجُیٜیَا ࢽُودُ رَاکُّو، کُورُو ثُرُو بُوࢽٜࢽْجُ ࢽجَیٜࢽْ تِرُو کْلْدْغْکِّیَ، رَاکُّو، کَرْمُوࢽْجُلَࢽْ تِ غَیْرُو وَلّْکُّو،
[11] جِرِ ࢻِࢽْ یَیٜ وُ یٜ کَرْمُولَࢽْ ثِدُدَ ࢻَࢽْدْکُّورُو؞
[12] أَدَ حَرْ ࢻَࢽْدْکّْࢽَ بِ کَلْکَلْ دِیُومَرُو وَلّْکّْࢽَ غْࢽِ وُلّْکِّ، أَمَّ عِیسَى أَلْمَسِیوُ وُوَ تَیْ دَجٜ سْدَࢽَ ࢽَࢽْغَرُو، وُ یٜ أَوُودَ تَرُو کُواْرِ دِکِّ؞
[13] کْرَمِیَ، تِیَ حَرْ تَکّْࢽَرُو تْمَکّْࢽِ، أَمَّ أَوُو ࢻَلْ دِکِّ، أَوُو ࢽغَوُویٜدَ ثْࢻْکْکّٜ أَوُو ࢻُوُیٜدَ ࢽغْࢽْࢻْتْکّٜ مَکِّ؞
[14] ࢽغَیْࢽِࢽْ لَدَ دُوُوࢽْ اللَّه عِیسَى أَلْمَسِیوُیٜࢽْ سَمٜلَࢽْ ࢻَࢽْدُورُو بُواْسَࢽَدَ ࢻَࢽْدْکُّورُو مْلْدْکِّ؞
[15] أَدْ ࢽَࢽْغَرُو، أَࢽْدِ سَمَّ کَمْبْرْسٜىٰࢽْ رَشِدُوَدْ، کُرُوࢽْدٜ تِلُوجُو؞ کْلَ أَوُو لَایٜࢽْ کُرُو غَدٜ تَوَّا، اللَّه أَوُو أَدْ یٜیَ ࢽَیِرُو ࢻْلٜࢽْجَغَیْ؞
[16] أَیْ، أَوُو ࢽَیِیٜࢽَدْࢽْ ࢻُوُرُو غَیْیُو!
[17] کْرَمِیَ، مِسَلْࢽِ غَوُرُو وَلُّواْ، کُورُو أَمْ دُوُوࢽْ ࢽغَیْ دَسَیِدَ رُیْوُو، جِرِ مِسَلْ ࢻْلٜࢽْجَغَیْیٜࢽَدْ غَیْ؞
[18] ثَلَࢽْ ࢽغْوُرُو ࢽَیِرُو وُلْࢽْجَغَکّْࢽَدْ غَیْ، کْرْمَ یٜ سِمِّࢽْ سِمَلُووَرُو وُلْࢽْجَغَکِّ، أَمْ کَدَ کْلَدُو کْسْکَ کَرْمُویٜ أَلْمَسِیوُیٜرُو وَلْجَࢽَ مبٜجِ؞
[19] ࢽجٜرُورَمْࢽْجَ سِدُوُ، أَلَࢽْجَ یٜ ثُرُوࢽْجَ، دَرَجَࢽْجَ یٜ ثُرُو ࢽَࢽْغُبَوُوࢽْجَیٜࢽْ، کُورُو حَࢽْغَلْࢽْجَ یٜ کْلَ أَوُو دُࢽِیَیٜࢽْ کْرْغَ؞
[20] أَمَّ أَࢽْدِدْ أَمْ سَمٜىٰ، غَࢽْغَدَارُو ࢽَدْࢽْ کْࢽْدٜ ࢽجْکَّیِمَیٜیَ غُرٜࢽِیٜ، تِمَ کْمَ عِیسَى أَلْمَسِیوُدْ وُو؞
[21] کْلَ کْࢽْدُوُو دُوُوࢽْ تِلَࢽْ أَوِ یَیٜیَ ࢻْرْدُࢽْجُرُو ثَکِّدْیٜمَࢽْ تِیࢽْدٜ لَوُدَ أَلَمَ تِیࢽْجُ دَرَجَآ ثَمُࢽُّو ثْدِ؞