[1] وُمَ بُلُسْ رَوُو اللَّهیٜࢽْ کْࢽْغَیَمْ عِیسَى أَلْمَسِیوُیٜیَ تِمُوتِ کْرَمِࢽْدٜیَدْ
[2] کْرَمِیَ مُمِࢽَّ أَمَࢽَّا أَلْمَسِیوُلَࢽْ بْرْࢽِ کُولُوسِیٜࢽْ دَسَاࢽَسُودْرُو: اللَّه بَوَࢽْدٜ ࢽَیِرُو سٜرَّ ࢽَࢽْلٜوَا ࢽجَدُو!
[3] ࢽَیِرُو مُودُوَ ࢽجَدِّیٜیَ، سَوِ یَیٜ اللَّه بَوَ کْمَࢽْدٜ عِیسَى أَلْمَسِیوُیٜدَ وُسٜࢽِیٜ،
[4] تْࢽْ مَࢽَ کْلَ عِیسَى أَلْمَسِیوُلَࢽْ مْرْسَدُࢽْدُووَ مُمِࢽَّ سَمَّا کْرَوُوࢽْدُووَیٜࢽْ ࢻَࢽِّیٜࢽَدْࢽْ،
[5] تْمَ سَمٜلَࢽْ ࢽَیِ ࢽَࢽْغَرُو غْࢽَادَدْرُو؞ تْمَ أَدْیٜ لَوَرْࢽْجُ ثُرُو مَࢽَ جِرٜىٰ کَوُرِ کْجِدْیٜࢽْ ࢻَࢽْغٜوْ،
[6] کَوُرِ دُوُوࢽْ ࢽَیِرُو إِسْࢽَدْ؞ أَدْغَیْࢽِࢽْ کَوُرِ کْجِدْ رِجٜ ࢽٜمَ ثَکّٜ دُࢽِیَ ࢽغَرُو تَتَرْدِیے، ࢽَࢽْدُو یٜࢽْ غَیْ تْࢽْ یِمْ ࢻَࢽُّوٜ جِرٜمَرُو سٜرْ اللَّهیٜدَ أَسُࢽُوَّدْࢽْ؞
[7] أَبَࢻَرَسْ سَوَࢽْدٜ کِدَیٜ رَیِیٜࢽَدْمَࢽْ أَدَ کِرِوْ، تِدْ ثُرُوࢽْدُوࢽْ کِدَمَ أَمَࢽَّ أَلْمَسِیوُیٜ،
[8] کُورُو أَࢽْدِرُو کْلَ کْرَوُوࢽْدُو رُحُلَࢽْ إِسْࢽَیٜࢽْ وُلْسٜىٰرَ؞
[9] أَدْمَ ࢽَࢽْغَرُو، أَࢽْدِ یٜ تْࢽْ یِمْ ࢻَࢽِّیٜࢽَدْࢽْ، ࢽغَلْتٜمَ ࢽَیِرُو مُودُوَ ࢽجْدُّو کُولِّیٜࢽْدٜ؞ اللَّه ࢽَیِرُو ࢽَࢽْرَشِدُوَ ࢽُودُوَ رُحُࢽْجُیٜ سَمَّلَࢽْ رَوُوࢽْجُ جَوْرُو إِسَࢽُوࢽْجَارُو کُورِیٜ،
[10] ࢽغَیْࢽِࢽْ کْࢽْدْغَیْ ࢻُوُ کْمَࢽْدٜىٰࢽْ جُسّْࢽَ یٜ، أَرْدِجْࢽَ یٜ دِوِ، کُورُو کْࢽْدُو ࢽغْلَ سَمَّࢽْ ࢽٜمَ یَکُّوٜ اللَّهَ ࢽُودُلَࢽْ ࢻُوُ بُوِ؞
[11] اللَّه کْلَ کْࢽْدُوُوࢽْجُ دَرَجَایٜࢽْ دُࢽُو ࢽجَدُو، کَࢽَدِیَ ࢽٜتُّ دَمَ بَوُووَا ࢻَࢽْدُواْرُو؞ کَرْوُ کْجِیَلَࢽْ
[12] بَوَدَ وُسٜࢽُواْ، تِمَ ࢽَیِرُو مُمِࢽَّا رُوکُّو ࢽُوَࢽْدُو وَرَسَیٜ ثُرُو کْرْمَیْࢽْجُ ࢽُرَّیٜࢽْ ࢽجَدْࢽَدْ وُو؞
[13] أَࢽْدِیَ کْࢽْدُوُو دُوُیٜࢽْ سَمُویٜ ثُرُو کْرْمَیْ تَدَࢽْجُ جَوْرُو ثْرَاࢽَیٜرُو سَسَکُّو،
[14] تَدَࢽْجُدْیٜࢽْ مٜرُسَࢽٜ بِوُوَࢽْدٜ غَوُرْیٜࢽُو؞
[15] أَلْمَسِیوُدْ اللَّه تُرُیْوَوُومَیٜ ثَمُࢽُوࢽْجُ کَلْکَلْ، تَدَ کَرُیٜ، أَوُو أَلَکْتْࢽَ سَمَّࢽْ تِمَ ࢻُوُمَ وُو؞
[16] تِلَࢽْ اللَّه أَوُو سَمَّا أَلَکّٜࢽُو، أَوُو سَمٜىٰیَ ثِدِیٜیَ، أَوُو تُرُیْیَ تُرُیْوَوُووَ، کُرِسْ کْرْمَیْیٜ سُو، رَکْتُ سُو، ࢻُوُوُ سُو، کْࢽْدُوُووُ سُو، اللَّه أَوُو سَمَّا تِیٜࢽْ کُورُو تِ ࢽَࢽْغَرُو أَلَکّٜࢽُو؞
[17] أَوِ یَیٜرُو بُرْوُوࢽُّو تِ مبٜجِ، کُورُو تِلَمَࢽْ أَوِ یَیٜ دْغَ؞
[18] تِدْ کْلَ تِیدْیٜ، وُوتّٜ جَمَ اللَّهیٜ؞ تِمَ بَدِدُرَمْدْ، تَدَ کَرُیٜ، بُرْوُویٜ کَرْمُولَࢽْ ثِجْࢽَدْ وُو، ࢽغَیْࢽِࢽْ أَوِࢽْ یَیٜ تِمَ ࢻُوُمَ وُو؞
[19] أَوُووَ اللَّه حَلْࢽْجُ تِلَࢽْ کٜکْ ثْمْبْرُورُو کَرْوُࢽْجُ کْجِجٜ
[20] کُورُو تِیٜࢽْ أَوُو سَمَّا کْلَࢽْجُرُو سُولُوجُوُورُو کَرْوُࢽْجُ کْجِجْࢽَ، أَوُووَ ثِدِیٜ یٜࢽْ کَلْ، سَمٜىٰ یٜࢽْ کَلْ، بُࢽْجُ کْسْکَلَࢽْ ࢻِدْࢽَدْیٜࢽْ ࢽَࢽْلٜوَ أَوِ یَیٜرُو کِکُّدُو؞
[21] ࢽَیِدْ کُرٜࢽْ اللَّهࢽْ کُرُوُࢽْ، کُورُو کَرْوُࢽْدُوࢽْ کْلَدُوࢽْجُ، کْࢽْدُو دِوِ دِیُووُ ࢽَࢽْغَرُو،
[22] أَمَّ کْرْمَ تِیلَࢽْ ࢽَیِیَ کَرْمُوࢽْجُیٜࢽْ کْلَࢽْجُرُو سُولُویٜىٰࢽُو، ࢽَیِیَ تَیِرْ یٜ، أَوُو وَادَ بَوُووَ یٜ، کُورُو سَرِوُ بَوُووَ یٜلَࢽْ ࢻُوُࢽْجُࢽْ سَدُوُرُو؞
[23] أَدْ یَیٜ کَمْبْرْسٜࢽْدُو رُوࢽُواْ، دُࢽُووَرُو تِلَࢽْ دَࢽُواْ، بَرٜ تْمَ کَوُرِ کْجِ ࢻَࢽُّوَّدْیٜدَ کُولُّوِّ؞ کَوُرِ کْجِ أَدْ دُࢽِیَ ࢽغَرُو وُلْدْغْࢽَ، کُورُو تِیٜمَࢽْ وُ بُلُسْ کِدَمَرُو وَلْیٜکُّو؞
[24] کْلَ بُوࢽٜ ࢽَیِ ࢽَࢽْغَرُو یَکِّدْیٜࢽْ کَرْوُࢽِ کْجِجْࢽَ، کُورُو تِیے أَلْمَسِیوُیٜ، وُوتّٜ جَمَ تِیَ غَوُدْ ࢽَࢽْغَرُو أَوُو ثُرُو بَسَرِ أَلْمَسِیوُیٜࢽْ مَوْجْࢽَدَ تِیࢽِلَࢽْ تُمُوغْکِّ؞
[25] کْلَ وَدَ اللَّه وُرُو سِࢽَدْیٜࢽْ کِدَمَ جَمَ أَلْمَسِیوُوَ غَوُدْیٜرُو وَلْیٜکُّو، مَࢽَ اللَّهیٜ ࢽَیِرُو ثُوتُّو إِسَࢽُوࢽْجَغَکُّورُو،
[26] وُوتّٜ أَسْرْ تْࢽْ کُرٜࢽْ أَدَمْغْࢽَرُو غْرَآدَ دُوُوࢽْ، کْرْمَ مُمِࢽَّࢽْجُرُو ࢻْلٜدْغْࢽَدْ؞
[27] تَیِرُو اللَّه دَوُ کْرْدِیَیٜࢽْ أَرْسِیے دَرَجَا أَسْرْ أَدْیٜیَ إِسَࢽُودُوُ ثْرَاࢽَ، تِمَ أَلْمَسِیوُ کَرْوُࢽْدُوࢽْ، تْمَ دَرَجَیٜدْ وُو؞
[28] تِمَا مَوُوࢽِیٜ، وُࢽْدُ یَیٜیَ حَلْ تْرْمْ أَلْمَسِیوُیٜیَلَࢽْ سَدُوُرُو تَیِرُو سْمُو کَسْتَا أَلَمْدُوَ ثُرُو ࢽَࢽْرَشِدُ سَمَّیٜࢽْ یِدِّیٜ؞
[29] أَدَ دِیُورُو، کْلَ کْࢽْدُوُوࢽْجُ وُلَࢽْ دُࢽُووَجِدْیٜࢽْ مْلْدْکّٜ ࢽغْࢽْࢻْتْکِّ؞