[1] أَدْ ࢽَࢽْغَرُو، أَلْمَسِیوُلَࢽْ کَرْوُࢽْدُورُو دُࢽُو ࢽجُو لَا مٜࢽَّا، کْرَوُولَࢽْ رُو بُودَ لَا مٜࢽَّا، رُحُلَࢽْ ࢽَࢻْتُ ࢽَࢽْیَاࢽَیٜ لَا مٜࢽَّا، کَࢽْجِمَرِ سُو، ࢽجُࢽُودُ سُو لَا مٜࢽَّا،
[2] دَجِ یَکُّواْ کَرْوُࢽِ تَیْ دَجُو کْجِجُو: حَࢽْغَلْࢽْدُو یٜ تِلُوجُو، کْرَوُوࢽْدُو یٜ تِلُوجُو، حَلْࢽْدُو یٜ تِلُوجُو، ࢽِیَࢽْدُو یٜ تِلُوجُو؞
[3] بَرٜ أَوِمَ کْلَ رَوُوࢽْ بِ رُوکُرَࢽْ دِوِّ، أَمَّ رُوکُرَ بَوُووَلَࢽْ ࢽَیِرُو ࢽغَلْوُورُو أَمْ غَدٜیَ ࢽغُوࢽُواْ؞
[4] وُࢽْدُࢽْدُو یَیٜ أَوُو کْلَࢽْجُیٜ رُࢽْجُرُو غْࢽِ، أَمْ غَدٜىٰ یٜرُو کِسُّوُو؞
[5] حَلْ دُوُوࢽْ عِیسَى أَلْمَسِیوُلَࢽْ دْغَࢽَدَ ࢽَیِ یٜ ࢽغُوࢽُواْ:
[6] تِ ࢽَࢻْتُ اللَّهیٜ دُوُوࢽْ، اللَّهَ کَلْکَلْدُࢽْجُدَ أَوُو دُࢽُوࢽْ تَیٜرُو ࢽغُوجْࢽِّ،
[7] أَمَّ کْلَࢽْجُوَ أَوِمَ غْࢽِرُو کَلَکْثٜ أَلَمَ وُولُودِیٜ ࢽغُوجٜ کَمْبَ ثَمُࢽُّو وَلْیٜࢽُو؞
[8] ثَمُࢽُو کَمْبٜ ࢽغُویٜࢽِّیَ، کْلَࢽْجُوَ وَجٜ حَرْ کَرْمُورُو اللَّهَ غِیَ، کَرْمُو دُوُوࢽْ کْسْکَرُو تِیَ جَجَغَࢽٜ ࢽُࢽَدْ؞
[9] أَدْمَ ࢽَࢽْغَرُو اللَّه تِیَ ࢽَ جَوْمَرُو دَرَجَارُو ثَدٜ تِرُو ثُ دُوُوࢽْ ثُ سَمَّا کُوجْࢽَدَ کَیْࢽُو،
[10] ثُ عِیسَیٜ ࢽَࢽْغَرُو ࢽغُرُمْࢽْغُرُمْ ࢻِ یَیٜ سَمٜیَ ثِدِیَ ثُرُو ثِدِیَیٜیَلَࢽْ ࢻِدُو،
[11] دَرَجَ اللَّه بَوَدْیٜرُو تْلَمْ ࢻِ یَیٜ یٜ عِیسَى أَلْمَسِیوُدْ تِمَ کْمَدْ وُورُو وُلْجُو!
[12] أَدْ ࢽَࢽْغَرُو، کْرَوُووُࢽِ، سَوِ یَیٜ مَࢽَࢽِ غَوَّدْ غَیْ، وُ دَوُࢽْدُوࢽْ رُࢽْجُ غْࢽِ، کْرْمَ یٜ وُ بَوُومَࢽْ ثَیٜ بَوُورُو کِدَ ࢽجْکَّوُوࢽْدُویٜدَ اللَّه رِدَا لُولُودُوَࢽْ دٜوُو،
[13] اللَّهدْمَ ࢽجَسَکّٜ أَوُو ثْرَاࢽَدَ کَسَدُّوٜ دِوِدْ وُو؞
[14] أَوِ دِوِ یَیٜ بَرٜ سُوُولَّࢽْ بِ کَمْبِوُلَࢽْ دِوِّ؞
[15] ࢽغَیْࢽِࢽْ ࢽَیِدْ تَدَوَ اللَّهیٜ تَلْدُ بَوُووَا بِوُ بَوُووَا أَوُو وَادَ بَوُووَارُو دَوُ جَمَࢽْ دِوِیَ کَرْوُ یٜسْکَدَایٜࢽْ وَلُّوٜ دَوُࢽْجَࢽْ سِلُّووُ غَیْ دُࢽِیَلَࢽْ یِیلُّوِ؞
[16] مَࢽَ رُویٜدَ دُࢽُووَرُو تَیْوُو، دَجِ وُ یٜ یِمْ أَلْمَسِیوُیٜࢽْ أَوُلُو بُکِّ، کِدَا ࢽغْࢽْࢻْتُوَ بُووُرُو دِکّْࢽِدْرُو؞
[17] وُوَ کْلَ سَدَآ إِبَدَا کَمْبْرْسٜࢽْدُویٜرُو بُ ࢻِدَ غَیْرُو ࢻِسَغَیْ یَیٜ، ࢽَیِ ࢽَࢽْغَرُو کَرْوُࢽِ جَوْمَرُو کْجِجِ؞
[18] جِرِ أَدْغَیْࢽِࢽْ ࢽَیِ یٜ کَرْوُࢽْدُو کْجِجُو، جِرِ کَکّٜ کْجِجِدْ غَیْ؞
[19] کْمَ عِیسَلَࢽْ تْمَࢽْکّٜ تِمُوتِیَ تُسِّوَوُو ࢽَࢽْدُورُو جُوَࢽْجَغَکِّ، وُ یٜ لَوَرْࢽْدُو ࢻَکِّیَ، کَرْوُࢽِ دُࢽُو ثُوَࢽْدِ؞
[20] تِ غْࢽِیَ، کَمْ لَا غَدٜ کَرْوُࢽْجُ تِلُو تِ غَیْ تَکّْࢽِ، کَمْ دُوُوࢽْ ࢽَࢻْتُࢽْدُو جِرٜمَرُو کَرْوُلَࢽْ رُوجِدْ،
[21] دَلِلْࢽْجُدْ تَیِ سَمَّ أَوُووَ عِیسَى أَلْمَسِیوُیٜ غْࢽِ، کَاࢽجَا مَجَیْ ࢽَࢽْغَرُو؞
[22] أَمَّ حَلْ تِمُوتِیٜ ࢽُوࢽُوَّ، تَدَ بَوَࢽْجُوَ رُوکُّو غَیْ، کَلُّو کِدَ کَوُرِ کْجِیٜدَ دِیٜࢽَ؞
[23] أَدْمَ ࢽَࢽْغَرُو، أَوُو وُوَ سُوَࢽْدِدَ رُکِّیَمَ، تِیَ ࢽَیِرُو جُوَࢽْجَغَکِّرُو تْمَکّْࢽَ؞
[24] وُ یٜ کْمَلَࢽْ تْمَکّْࢽَ تُسّْࢽِّࢽْ ࢽَࢽْدُورُو وَلْدْکّٜ إِسْکِّ؞
[25] أَمَّ أَبَرَتُسْ کْرَمِࢽِ، تِ دُوُوࢽْ سَوَࢽِ کِدَیٜ یٜ، مْلْدُیٜ یٜ، کُورُو کْࢽْغَیَمْࢽْدُو ثُرُو مْرَدُࢽِیٜࢽْ بَࢽَ کُدُومَدَ ࢽَیِرُو کَلَکْتُوُرُو ࢽغْلَرُو کِرُکُّو؞
[26] ࢽَیِیَ جَوْمَرُو کُرُورُو ثْرَاࢽَ، تِ دُوࢽْدِ ࢻَࢽُّوَّدْرُو حَࢽْغَلْࢽْجُ ثَا ثِجْࢽَ؞
[27] ࢽغَیْمَ جَوْمَرُو دُوࢽْدِجْࢽَ، حَرْ ࢽُیْ غَیْرُو؞ أَمَّ اللَّه تِیَ ࢽجُࢽُویٜࢽُو، تِ رُࢽْجُمَ غْࢽِ، وُࢽْ کُࢽْدٜࢽُّو، بَرٜ کَرْوُکُتَّࢽِرُو کُتُّ تْرْغَࢽِّرُو؞
[28] دَجِ جْکْتْغْکّٜ تِیَ ࢽَیِرُو کَلَࢽّغٜىٰرَکُّو، کُرُوࢽْجُرُو کَرْوُࢽْدُو جَوْرُو کْجِجُو، وُ یٜ بَرٜ کَرْوُکُتَّ ࢽغْوُ دِکّْࢽِرُو؞
[29] أَدْمَ ࢽَࢽْغَرُو کْمَلَࢽْ تِیَ کَرْوُ کْجِیَرُو مُووُواْ، أَمْ تِ غَیْرُو دَرَجَ یُواْ،
[30] کِدَ أَلْمَسِیوُیٜ ࢽَࢽْغَرُو کَرْمُو کَرْࢽْجْࢽَ، کُورُو بَࢽَ ࢽَیِ وُرُو رَࢽْغُوٜ سُکُّدُوِّدَ سُکُّدُورُو رُوࢽْجُ کِلَدُو؞