[1] جِرِ جَوْرُو ࢽَیِیَ أَمْ بْرْࢽِ لَوُدِکِیَیٜیَ أَمْ ࢽغَلْتٜمَ تُرُیْیٜࢽْدٜیَرُو مْلْدْکِّدْرُو ࢽُوࢽُوِیَ، رَاکُّو؞
[2] مْلْدُࢽِدْ کَرْوُࢽْجَ دُࢽُو ثُوَࢽْدُو، کْلَࢽْجَ یٜ ثُرُو کْرَوُویٜࢽْ کْلْجَ، کُورُو أَرْسِیے تْرْمْ ࢽُودُ تَبَّتّٜ یٜیَ ࢽَجَارُو، ࢽغَیْࢽِࢽْ أَسْرْ اللَّهیٜ أَسُجَیْ، وُوتّٜ أَلْمَسِیوُ،
[3] تِلَࢽْ أَرْسِیے ࢽَࢽْرَشِدُیٜیَ ࢽُودُ اللَّهیٜیَ سَمَّ غْرَادَدْ؞
[4] أَدَ وُلْدُࢽِدْ بَرٜ وُࢽْدُمَ ࢽَیِیَ مَࢽَ کْجِࢽْ جَمْبَࢽْجَࢽِّرُو؞
[5] وُدْ تِیلَࢽْ ࢽَࢽْدُوࢽْ غْࢽِ یَیٜ، کَرْوُلَࢽْ ࢽَیِیَ رُوکُّو، ࢽَࢻْتُࢽْدُو سَوِیَدَ یٜ، أَلْمَسِیوُوَ غَࢽْدُوࢽْ ࢽغْلَرُو دَࢽُوَّ یٜدَ رُکّٜ کَرْوُࢽِ کْجِجْࢽَ؞
[6] أَدْ ࢽَࢽْغَرُو، کْمَࢽْدٜ عِیسَى أَلْمَسِیوُوَ کَسَدُّوَّدْ، تِلَࢽْ دْغَیْوُو،
[7] ࢽَیِرُو أَلَمْࢽْجَاࢽَدْ غَیْ، تِلَࢽْ ࢻْرْدُࢽْدُو غْࢽَࢽُواْ دُࢽُووَدْࢽُواْ، کَرْوُࢽْدُو ثُرُو کَمْبْرْسٜىٰࢽْ کِبَّجُو، کُورُو جَوْرُو اللَّهَ وُسٜࢽُواْ؞
[8] حَࢽْغَلْ غْࢽَࢽُواْ، بَرٜ وُࢽْدُمَ کْلَ أَدَ أَمْبٜ سُو، کْࢽْدُوُووَ دُࢽِیَ أَدْیٜ سُویٜࢽْ ࢽَیِیَ ࢽَࢽْرَشِدُ أَدَمْغْࢽَیٜیَ مَࢽَ بُووُیٜیَلَࢽْ جَمْبَࢽْجَࢽِّ، کُورُو أَدْ کْلَ أَلْمَسِیوُیٜࢽْ غْࢽِ؞
[9] أَوُووَ ࢽَࢻْتُ اللَّهیٜ ࢽغَ تِیے أَلْمَسِیوُیٜࢽْ کْرْغَ،
[10] کُورُو تِ أَلْمَسِیوُدْ ࢽَیِیَ ثَࢻُّو ࢽجَسَمْبْرْࢽَ، تِمَ ࢻُوُمَ کْلَ کْرْمَیْ سُو، کْࢽْدُوُو سُو سَمَّیٜدْ وُو؞
[11] تِلَࢽْ ࢽَیِ یٜیَ کَجَࢽْجَࢽَ، کَجَ مُکُّو کَمْبٜࢽْ غْࢽِ، کَجَ أَلْمَسِیوُیٜࢽْ حَلْࢽْدٜ بِوُیٜیَ ثُتُّلُوِلَࢽْ تْدْࢽَ؞
[12] کَسَلَلَࢽْ تِیَ رُوکُّو ࢽَیِیَ سِتّْرَࢽْغٜرَ، کُورُو تِیَ رُوکُّو رُووَرُو ثِیٜوْ، کْࢽْدُوُو اللَّهیٜ تِیَ کَرْمُولَࢽْ ثْسَࢽْغْࢽَدَ مْرْسَࢽُوَّ ࢽَࢽْغَرُو؞
[13] ࢽَیِ بِوُوَا کَجَࢽَمْبُ تِیࢽْدُویٜیَ ࢽَࢽْغَرُو ࢽُوَّدْ، اللَّه ࢽَیِیَ تِیَ رُوکُّو رُووَرُو کَلَࢽّجَࢽٜ بِوُوَࢽْدٜ سَمَّا غَوُرْیٜࢽُو؞
[14] کَکَّدُ کَسُیٜ وَدَوَࢽْجُوَ کَلُّو أَࢽْدِیَ وَسَࢽَدَ ثِࢽْجٜ کْسْکَ کَرْمُویٜرُو جَجِیٜ بَوُورُو کِدُو؞
[15] ࢽغَیْࢽِࢽْ ࢻُوُوُدَ کْࢽْدُوُووَدَا رِࢽْجٜ ࢽَࢽْغُ ࢻَࢽْجَࢽٜ کْسْکَدْلَࢽْ کْلَࢽْجَࢽْ کْࢽَّسَرْ کِوَࢽْدُو؞
[16] أَدْ ࢽَࢽْغَرُو بَرٜ وُࢽْدُمَ ࢽَیِیَ کْلَ أَوُو بُوِ سُو، یَوِ سُو، بِ لَمَرْ ࢽغْمْرِیٜ، بِ کْࢽْدَوُ بْرِࢽْمِ، بِ یِمْ تُسْتُیٜࢽْ شَرَࢽْجَࢽِّ؞
[17] أَوُو أَࢽِ کَوْدِ أَوُووَ ࢻُوُࢽْ إِسَیْدْیٜ بَسْ، أَمَّ جِرٜدْ تِمَ أَلْمَسِیوُدْ وُو؞
[18] بَرٜ أَمْ دُوُوࢽْ رُوکُرَࢽَمْبُ کَتُّوُیٜ جَغَیْمَ سُو، مَلَیْیَوَرُو أَمْبْثَّغَیْمَ سُو، کُرُوࢽْجَ وُوُلْجَیْمَ سُو، حَࢽْغَلْࢽْجَ أَدَمْغْࢽَیٜ ࢻَیْدَ بَوُووَ ثَرَیِمَ سُودْ مُکُووَࢽْدُو ثَتُّلُوُࢽِّ؞
[19] تَیِدْ أَلْمَسِیوُ ࢻُوُمَ تِییٜدْرُو کْلْدَغَࢽٜ دَسَاࢽِّ؞ تِلَࢽْ تِیے سْرَمْدْ جَرْࢽْجُوَ کُوُࢽْجُوَیٜࢽْ ࢽغْلَرُو کْلْدِ، کُورُو اللَّه تِیَ ثَکّٜ وُرَجِ؞
[20] أَلْمَسِیوُوَ رُوکُّو کْࢽْدُوُووَ دُࢽِیَ أَدْیٜرُو ࢽُوَّدْ، أَوِرُو غْلٜ دُࢽِیَ أَدْࢽْ دْغَوِ غَیْرُو وَدَࢽْجُ غَوِدْ؟
[21] «بَرٜ ࢽغُوࢽْمِّ! بَرٜ تَمْبْمِّ! بَرٜ لٜࢽْمِّ!»
[22] وَدَ أَࢽِ سَمَّ أَوُووَ ࢻَیْدَدَࢽٜ ࢻَثَّغَیْدَ وُجَ، تَیِدْ وَدَا أَلَمْدُوَ کَمْبٜ؞
[23] جِرٜمَرُو وَدَ أَࢽِ أَدِࢽْ کَمْبٜ سُو، رُوکُرَࢽَمْبُ سُو، تِیرُو جَوْلَࢽْ کِسْتُوُ سُولَࢽْ أَلَمَࢽْجَ ࢽَࢽْرَشِدُیٜیَ، أَمَّ ࢻَیْدَࢽْجَ مْرَدُ تِییٜ دَࢻْتُوُیٜ سُلَتْ بَوُو؞