[1] أَدْ ࢽَࢽْغَرُو، أَلْمَسِیوُوَ رُوکُّو ثِࢽُوَّدْ، أَوُووَ سَمٜىٰ ࢽَ أَلْمَسِیوُ کْمْبُورَمْ اللَّهیٜࢽْ ࢽَࢻْثْࢽَدَ مَࢽُواْ!
[2] أَوُووَ دُࢽِیَ أَدْیٜرُو غْࢽِ، أَوُووَ سَمٜىٰرُو کَرْوُ یَکُّواْ؞
[3] أَوُووَ ࢽُوَّ، کُورُو رُوࢽْدُو یٜ أَلْمَسِیوُوَ رُوکُّو ࢽَ اللَّهیٜࢽْ غْرَادَ؞
[4] سَ أَلْمَسِیوُ تِمَ رُوࢽْدُو جِرٜىٰدْ ࢻْلٜدِییَ، دَجِ ࢽَیِ یٜ دَرَجَالَࢽْ تِیَ رُوکُّو ࢻْلٜدُوِ؞
[5] أَدْ ࢽَࢽْغَرُو حَلْ دُࢽِیَ أَدْیٜ ࢽَیِࢽْ دْغَࢽَ سَمَّا یٜجُواْ: کْࢽْجْࢽَ سُو، تَیِرْࢽَمْبُ سُو، مَࢽْغَرْ دِوِ سُو، ࢽِیَدِوِ سُو، أَرْسِیے لُوَࢻْتُ، وُوتّٜ سْࢽْمْ غَ سُو؞
[6] أَوُو أَࢽِ ࢽَࢽْغَرُو غْرْغَدُ اللَّهیٜ غَࢽَمْبُوُوَ ثُوَࢽْدِ،
[7] کُورُو ࢽَیِ یٜ کْࢽْدْغَیْ جِرِ أَدْغَیْ ثَلَࢽْ سَ ثُرُوࢽْجَࢽْ دْغَوَّدْࢽْ کِدُوْ؞
[8] أَمَّ کْرْمَ ࢽَیِ غْرْغَدُ سُو، حَࢽْغَلْسَࢽْغُو سُو، أَوُو دِوِ سُو، رَدُ سُو، مَࢽَکُتُّ ثِࢽْدُویٜ سُو سَمَّا وَࢽُواْ؞
[9] بَرٜ کَمَࢽْدُورُو کَتُّوُ کَمْغْوِّ، دَلِلْࢽْجُدْ کْࢽْدْغَیْࢽْدُو ثَیٜدَ کْࢽْدُوࢽْجُࢽْ کُࢽْدٜࢽُّو وَࢽُوٜ
[10] کْࢽْدْغَیْ بْرِࢽْدَ لُࢽُوَّ، ࢽَࢻْتُ دُوُوࢽْ ࢽُودُلَࢽْ کْلَ ثَمُࢽُو أَلَکْتُمَࢽْجُیٜࢽْ بْرِࢽُّو وَلْجِدْ؞
[11] أَلْمَسِیوُلَࢽْ یَوْدِ بِ یَوْدِ غْࢽِ بَوُو، کَجَادَ بِ جْمْبْلْمْ بَوُو، سِکُدُو سُو، کَمْ کْلَ کَدْࢽِّ سُو، کَرٜیَ سُو، کَمْبٜ سُو بَوُو، أَمَّ أَلْمَسِیوُدْ تِمَ أَوِ یَیٜ، کُورُو أَوِࢽْ یَیٜ وُو؞
[12] أَدْ ࢽَࢽْغَرُو، ࢽَیِ دُوُوࢽْ أَمْ مُمِࢽَّ ࢽجَرَاࢽَا اللَّه کْرٜࢽْجَࢽَدْ، کَࢽْجِمَرِ سُو، ࢽَࢽّغْلَ سُو، رُوکُرَࢽَمْبُ سُو، ࢽَࢽْلٜوَ سُو، کَࢽَدِ سُو لُࢽُواْ؞
[13] وُࢽْدُࢽْدُو یَیٜ کَمَࢽْجُرُو ࢽٜثُّو؞ کَمْ لَا سُوࢽْجُ کْلَ کَمَࢽْجُیٜࢽْ ثْدَࢽَا، غَوُرْجُو؞ کْمَࢽْدٜ ࢽَیِیَ غَوُرْࢽْجَࢽَدْ غَیْ، ࢽَیِ یٜ ࢽغَیْ دٜوُو؞
[14] کْلَ أَوُو أَࢽِ سَمَّیٜࢽْ کْرَوُو لُࢽُواْ، تِمَ تَیِ سَمَّا کَلْکَلُّو کْلْجُو؞
[15] اللَّه ࢽَیِ یٜیَ تِیے ࢻَلْࢽِࢽْ ࢽَࢽْلٜوَرُو بُواْࢽْجَࢽَدْ غَیْ، ࢽَࢽْلٜوَ أَلْمَسِیوُیٜ کَرْوُࢽْدُووَ ثُࢽُودُو؞ کُورُو سَوِ یَیٜ اللَّهَ وُسٜࢽُواْ؞
[16] مَࢽَ أَلْمَسِیوُیٜ ثُرُو کَرْوُࢽْدُویٜࢽْ ࢽغْوُرُو دْغَ؞ وُࢽْدُ یَیٜ ࢽَࢽْرَشِدُ سَمَّࢽْ کَمَࢽْجُوَ أَلَمْجُو، سْمُوࢽْجُ کَسُّو؞ جَوُرَ سُو، أَیْیَ سُو، ࢽجُࢽْغُورُو رُحُیٜ سُو کَرْوُࢽْدُوࢽْ سٜرَّرُو اللَّهرُو یٜغْࢽُواْ؞
[17] أَوِ دِوِ یَیٜ، مَࢽَࢽْ بِ کْࢽْدُوࢽْ، أَوُو سَمَّا ثُ کْمَࢽْدٜ عِیسَیٜࢽْ دٜوُو، تِیٜࢽْ اللَّه بَوَدَ وُسٜࢽُواْ؞
[18] کَمُوَ، کوَوَࢽْدُووَ غَیْوُو، ࢻُوُ کْمَࢽْدٜىٰࢽْ جُسّْࢽَدْ غَیْ؞
[19] کوَوَ، کَمُوَࢽْدُووَ رَوُواْ، بَرٜ تَیِرُو ࢽَࢽْجَوْ ࢻْلٜغْوِّ؞
[20] یَلَّ، أَوِࢽْ یَیٜ مَࢽَ بَوَࢽْدُووَ یَࢽْدُووَا غَیْوُو، أَدْمَ أَوُو کْمَࢽْدٜ أَرْدِجْࢽَدْ وُو؞
[21] بَوَوَ، بَرٜ حَࢽْغَلْ تَدَوَࢽْدُویٜ سَࢽْغُوِّ، بَرٜ کَرْوُࢽْجَ بَࢽَّدْࢽِّرُو؞
[22] کَرٜیَوَ، أَوُو سَمَّࢽْ کْمَوَࢽْدُو دُࢽِیَ أَدْیٜیَ غَیْوُو، سَ ࢽجَرُیْ رُࢽْجُࢽْ ࢽَیِیَ ࢽجَرَوُو ࢽَࢽْغَرُو غْࢽِ، أَمَّ کَرْوُ تِلُووَࢽْ کْمَࢽْدٜیَ رِدُوَرُو دٜوُو؞
[23] کِدَ ࢻِ دِوِ یَیٜ، أَمْبُو غْࢽِ، کْمَࢽْدٜ غَیْرُو کَرْوُ ࢽغْلَࢽْ دٜوُو؞
[24] ࢽُوࢽُواْ، مُکُّو کْمَࢽْدٜىٰࢽْ وَرَسَدَ مُکُووَرُو ࢻَࢽْدُوِ، أَلْمَسِیوُ کْمَدْمَرُو کِدَ یِدُّوِ ࢽَࢽْغَرُو؞
[25] أَوُووَ کَمْ دِوِ ثْدِمَدْ، تِرُو ࢽَࢽْدِوِࢽْجُدَ کَلَکْثِیے، کُورُو اللَّه أَمْبَ غَیِرْجِوَوُو؞