[1] ࢻُوُ اللَّهَ عِیسَى أَلْمَسِیوُ تِ دُوُوࢽْ أَمْ رُووَا سَࢽُࢽَارُو شَرَ ثْدِّمَدَیٜࢽْ، کُورُو کْࢽْدٜࢽْجُوَ کْرْمَیْࢽْجُوَ ࢽَࢽْغَرُو ࢽِیَ جَوْرُو لُواْࢽْجْکِّ،
[2] مَࢽَ اللَّهیٜدَ مَوُوࢽٜ، سَࢽْجُ ࢽغْلَ یٜࢽْ کَلْ، سَࢽْجُ ࢽغْلَ غْࢽِ یٜࢽْ کَلْ دَبَّرْدْࢽٜ، أَمْبَ سِمُوࢽٜ، تَیِرُو یِکَّدٜ، ثُرُو کَࢽَدِیَ أَلَمْدُوَیٜࢽْ کَرْوُࢽْجَرُو دُࢽُو یَکّٜ؞
[3] سَࢽْجُ ثْدِیَ، أَمْسُو أَلَمْدُ جِرٜىٰدَ ࢽغُوجَیْوَوُو، أَمَّ کْرِرِمْ سْمُوࢽْجَیٜ ࢽَࢽْغَرُو کْلَࢽْجَرُو مَلْمْبَ مَࢽْغَرْࢽْجَا غَلْدَوُ ثَࢻْثَغَیْ،
[4] کُورُو سُوُورْدَࢽٜ جِرٜدَ کْرْࢽْدُرُو وَجَࢽٜ ࢽیَرِ کَتُّوُیٜ جَغَیْ؞
[5] أَمَّ ࢽِدْ، ثُرُو أَوِ یَیٜࢽْ کْلَࢽْمْ رِوٜ، بُوࢽٜ ࢽجَلَࢽْ ࢽٜدّٜ، کِدَ کَوُرِ کْجِ مَوُودُمَیٜدَ دٜ، کِدَ اللَّه ࢽجِࢽَ سَمَّا کَلْکَلُّو تُمُوغْࢽٜ!
[6] وُدْ، رُوࢽِ بُ ࢻِدَ غَیْرُو کْرْمَ ࢻِجَیْ، وُوتّٜ سَࢽِ دُࢽِیَ أَدَ کُولْدُیٜ دٜلْ کَرْࢽْجْࢽَ؞
[7] مْلْدُ ࢽغْلَࢽْ مْلْدْکّْࢽَ، ࢽغْرْمِّ یٜ تُمُوغْکّْࢽَ، کُورُو کَمْبْرْسٜدْ یٜیَ رُوکّْࢽَ؞
[8] دَرْیٜرَمْبُو أَرِیَوُ کْࢽَّسَرّٜ ࢽَࢽْجِرٜىٰ، أَرِیَوُ دُوُوࢽْ کْمَ تِ شَرَمَ جِرٜىٰ یِمْ أَدْࢽْ وُرُو سِدْ غْࢽَادَ مبٜجِ، کُورُو وُ رُࢽِرُو غْࢽِ، أَمْ دُوُوࢽْ کْࢽْدٜࢽْجُ کَرْوُ کْجِیَرُو غُرٜجَیْ سَمَّ یٜرُو ثِ؞
[9] کُواْرِࢽٜ دُوَࢽْ ࢽَࢽِرُو أَرٜ،
[10] دِمَسْ دُࢽِیَ أَدَ ثْرَاࢽَدْرُو وُوَ کُولْسٜ بْرْࢽِ تَسَلُوࢽِکَیٜرُو لٜجْࢽَ، کَرِشَ یٜ لَرْدُ غَلَتِیَیٜرُو لٜجْࢽَ، کُورُو تِتُسْ یٜ لَرْدُ دَلْمَتِیَیٜرُو لٜجْࢽَ ࢽَࢽْغَرُو؞
[11] لُکَ رُࢽْجُ ࢽَࢽِࢽْ دْغَ؞ مَرْکُسَّ ࢽغُوࢽٜ ࢽَࢽِرُو أَرُواْ، ثُرُو کِدَࢽِیٜࢽْ تِ ࢻَیْدَا ࢽَࢽْغَرُو؞
[12] تِکِکُسَّ بْرْࢽِ أَࢻِسَیٜرُو ࢽُودْکّْࢽَ؞
[13] إِسْمِیَ، بَرْمُسْࢽِ ࢻَدُو کَرْࢻُسّٜࢽْ بْرْࢽِ تَرُوَسّٜࢽْ کُولّْکّْࢽَدَ سُکُّدٜ؞ کِتَوُوَدْ یٜیَ سُکُّدٜ، مَسَمَّࢽُّو کِتَوُوَ کَرَوِیٜدَ؞
[14] أَلٜکْسَࢽْدَ کَغْلْمَدْ وُرُو کُتُّ ࢽغْوُ ࢻْلٜسْغْࢽَ، أَمَّ کْمَدْ کْلَ کْࢽْدُوࢽْجُیٜࢽْ تِ یٜرُو ࢻْلٜجِیے؞
[15] ࢽِ یٜ تِرُو حَࢽْغَلْ غْࢽَࢽٜ، کَوُرِࢽْدٜرُو تَیْ دَجٜ تَکَّلْ ثَکّْࢽَ ࢽَࢽْغَرُو؞
[16] سَ بُرْوُوࢽْ کْلَࢽِ مُواْرُو شَرَرَمْࢽِࢽْ دَکّْࢽَدْࢽْ، وُࢽْدُمَ إِسٜ وُرُو بَࢽَسْغْࢽِّ، تَیِ سَمَّ وُوَ کُولْسٜرَ؞ بَرٜ اللَّه کْلَ أَدْیٜࢽْ تَیِیَ ثُوُورْࢽِّ!
[17] أَمَّ کْمَدْ وُوَ رُوکُّو دَجٜ کَوُرِࢽْجُدَ کْرْدِیَ سَمَّرُو وُلْغْکّٜ ࢻَࢽْجَرُو وُرُو دُࢽُو سٜࢽُو؞ أَدْغَیْمَ وُوَ ثِ ࢽغَمْبٜࢽْ سْمُواْ؞
[18] کْمَدْ وُوَ کْࢽْدُو دِوِ سَمَّࢽْ سْمُویِ، کُورُو کْلٜوَ سَلَیْ ࢽُودُوࢽْجُ بَرْغَا سَمٜىٰرُو وُوَ سَدِ؞ تِرُو حَرْ أَبَدَ أَبَدِࢽُّو دَرَجَ تِیُو! أَمِࢽْ؞
[19] وُرُو یَ بِلْکِسُوَ أَکِلَا أَمْ ࢻَدُو أُوࢽٜسِࢻَرُسّٜیَا لٜوَࢽٜ؞
[20] إٜرَسْتُسْ بْرْࢽِ کُورِࢽْتِیٜࢽْ ࢽَࢻْکٜࢽُو، کُورُو تَرُوࢻِمُسْ دُوࢽْدِدْرُو تِیَ بْرْࢽِ مِلِتُسّٜࢽْ کُولْیٜکُّو؞
[21] کُواْرِࢽٜ کَوُ سَ کَکُیٜ إِسِدْرُو أَرٜ؞ إٜبُلُسَّ ࢻُدٜࢽْسَّ لِࢽُسَّ یَ کُولُودِیَا کْرَمِیَ سَمَّا ࢽِیَ لٜوَࢽْجَیْ؞
[22] کْمَدْ ࢽِیَ رُوکُّو دْغَ، سٜرْࢽْجُ یٜ ࢽَیِ سَمَّلَࢽْ دْغَ!