[1] أَمَّ أَدَ ࢽُوࢽٜ، دُࢽِیَ دَرْیٜجِیَ، جَمَࢽْ جَوْ ࢻِتْ مبٜجِ؞
[2] أَمْسُو کْلَࢽْجَا کُࢽْغُࢽَا رَوُووُرُو وَلْجَیْ، کُورُو کْلَ ࢻْلٜدُوُ یٜ، رُوکُرَوُ یٜرُو وَلْجَیْ؞ اللَّهَ رَجَیْ، یَࢽْجَا بَوَࢽْجَایٜ مَࢽَ ࢽغُوجَیْوَوُو، کُورُو سٜرْࢽَمْبُوُ یٜ، تَیِرْࢽَمْبُوُ یٜرُو وَلْجَیْ؞
[3] کْرَوُو بَوُووَ، کَرْوُ ثْلْمْبَ، ࢽغَدَرْوُ، کْلَرِوُوࢽَمْبُوُ، کْلَدُووَ، أَوُو ࢽغْلَیٜ کٜمِیَ،
[4] أَمَࢽْ بُووُ، کَرْوُ یٜسْکَدَا، رُوکُرَ ࢽغُووَدَا، کُورُو أَوُو کَرْوُࢽْجَیٜیَ اللَّهَ کُوجْࢽَرُو رَوُووُرُو وَلْجَیْ؞
[5] أَلَمَ ࢽَࢽْمُمِࢽّٜ ࢻْلٜجَیْ، أَمَّ کْࢽْدُوُوࢽْجُ أَࢽْغْرْجَیْ؞ أَمْ أَࢽِࢽْ کُرُوُࢽُّو لٜࢽٜ!
[6] ثُرُوࢽْجَࢽْ لَا ࢻَدُو ࢻَدُورُو ࢽغَسَیٜ کَمُوَ کْسْکٜ بِوُلَࢽْ لَࢻْکَدَ جَرَوَ ࢻِ یَیٜرُو کْلَࢽْجَ ثَسَکّْࢽَدَ جَمْبَجَیْ؞
[7] کَمُوَ أَࢽِ سَوِسُو ثَرِ دُوُوࢽْ، تْمَّرُو رَکْثَࢽٜ جِرٜدَ أَسُجَیْوَوُو؞
[8] جِرِ جَࢽٜسَّ جَمْبَرَا ࢽَوِ مُوسَىٰ غَ وَجَࢽَدْ غَیْ، أَمْ أَࢽِ یٜ جِرٜدَ غَ وَجَیْ، أَمْ دُوُوࢽْ حَࢽْغَلْࢽْجَ یٜ یٜسْکَدَ، کَمْبْرْسٜࢽْجَ یٜ ࢻَیْدَ بَوُووَدْ؞
[9] أَمَّ ࢻُوُ جَوُیْوَوُو، جِرِ أَمْ یِࢽْدِ أَࢽِرُو وَکَّجْغْࢽَدْ غَیْ، وُࢽْدُ یَیٜ حَࢽْغَلْࢽَمْبُࢽْجَدَ ࢻٜدٜرُو أَسُجِ؞
[10] ࢽِدْ، أَلَمْدُࢽِیَ کْࢽْدْغَیْࢽِیَ ࢽِیَࢽِیَ کَمْبْرْسٜࢽِیَ کَࢽَدِࢽِیَ کْرَوُوࢽِیَ ࢽٜتُّࢽِ دَمَ بَوُووَ سَمَّا غَمَّ؞
[11] کُورُو بَسَرِیَ بُوࢽٜیَ بْرْࢽِ أَࢽْتَکِیَا إِکُوࢽِیَا لِسْتْرَایٜࢽْ یَکّْࢽَدَ ࢽُوࢽْمَّ، أَمَّ کْمَࢽْدٜمَ تَیِ سَمَّلَࢽْ وُوَ سْکَّوُو!
[12] لَبُدَّ وُࢽْدُ دُوُوࢽْ عِیسَى أَلْمَسِیوُوَ غَلَࢽْ ࢽَࢻْتُ ࢽَࢽْمُمِࢽّٜ دِیُو ثْرَاࢽَمَدْ بَسَرِ ثَیْ،
[13] کُورُو أَمْ دِوِیَ جَمْبَوُوَ ࢽَࢽْدِوِࢽْ تَسَرْغَیْ: أَمْ غَدٜیَ جَمْبَجَیْ، کُورُو تَیِ کْلَࢽْجَمَا جَمْبَجَیْ؞
[14] أَمَّ ࢽِدْ، ثُرُو أَوُو رِمٜ کَسَدّْمَّدْیٜࢽْ دْغَیْ؞ أَمْ تِیَ ࢽجَسَکّْرَࢽَدَ ࢽُوࢽْمَّ،
[15] کُورُو تْࢽْ غَࢽَࢽْمْلَࢽْ کِتَوُ اللَّهیٜدَ ࢽُوࢽْمَّ، کِتَوُ دُوُوࢽْ رَکْثٜ إِلْمُ ࢽجَدٜ کَمْبْرْسٜ عِیسَى أَلْمَسِیوُیٜࢽْ ࢽجْکَّوُو ࢻَࢽْدْمِدْ؞
[16] أَوُو کِتَوُلَࢽْ رُوُوَدَ سَمَّ سِࢽْدُ اللَّهیٜࢽْ کَدِیُو، کُورُو أَلَمْدُوَ ࢽجْکَّدُووَ سِمُودُوَ ثُرُو جِرٜىٰࢽْ ࢽجَرْغَرُووَ ࢻَیْدَࢽْجُوَ،
[17] ࢽغَیْࢽِࢽْ کَمْ اللَّهیٜ کْࢽْدُو ࢽغْلَ ࢻِ یَیٜیَ دِیُورُو ثُوتُّو دَبَّرْغَدَرُو وَلْجِ؞