[1] وُمَ بُلُسْ وُولُودِ اللَّهیٜ یٜ، کْࢽْغَیَمْ عِیسَى أَلْمَسِیوُیٜ یٜ، أَمْ اللَّه کْرٜجْࢽَیٜ کَمْبْرْسٜࢽْجَا ࢽُودُࢽْجَ جِرٜىٰ ࢽَࢽْمُمِࢽْ ثُوُدِدَا دُࢽُووَدُوُرُو وُوَ سِࢽُودُو؞
[2] ࢽغَیْࢽِࢽْ رُو سَوِسُویٜࢽْ تْمَࢽْجَا، رُو دُوُوࢽْ اللَّه تِ کَتُّوُ کَمْجِوَوُو کَوُ دُࢽِیَ أَلَکْتْࢽَمَࢽْ ثِ ثْࢽٜ وَدُ ࢽغُوجْࢽَدْ؞
[3] أَدْغَیْمَ سَࢽْجُ کَلْکَلْ کِدْࢽِّیَ، مَوُودُیٜࢽْ کَوُرِࢽْجُ ࢻْلٜىٰࢽُو؞ اللَّه ࢽجْکَّیِمَࢽْدٜ وَدَࢽْجُࢽْ کِدَ مَوُودُیٜ أَدَ مُکُّوࢽِرُو کٜکُّو؞
[4] تِتُسْ تَدَࢽِ جِرٜىٰ کَمْبْرْسٜࢽْدٜ تِلُووَدْرُو: اللَّه بَوَا عِیسَى أَلْمَسِیوُ ࢽجْکَّیِمَࢽْدٜیَدْ ࢽِرُو سٜرَّ ࢽَࢽْلٜوَا ࢽجَدُو!
[5] دَلِلْ ࢽِیَ ثُکُ کْرٜتّٜلَࢽْ کُولْࢽْجْکّْࢽَدْ تِمَ أَوُو دِیُورُو غَࢻْثْࢽَدَ سَوِࢽْمٜ بْلَ ࢻِࢽْ یَیٜ أَمْبَ أَمْوُرَوَرُو غَلَࢽْمِ ࢽَࢽْغَرُو، وَدَ ࢽِرُو ࢽجِکّْࢽَدْ غَیْ؞
[6] تِ ࢻُوُمَدْ تِلَࢽْ أَوُو وَادَ بَوُورُو وَلْجُو، کوَ کَمُ ࢻَلّٜ، کُورُو یَلَّࢽْجُ یٜ کَمْبْرْسٜیَرُو وَلْجَ، أَمْسُو یٜ تَیِیَ حَلْکُتَّا ࢽَࢽْعَࢽْسِیَرُو ࢽغَدَرْجَیْوَوُو؞
[7] تِ وُولُودِ اللَّهیٜ ࢽَࢽْغَرُو، دُولٜ أَوُو وَادَ تِلَࢽْ بَوُورُو وَلْجُو، بَرٜ رُوکُرَمَ، بِ کَرْوُ جَوْوَ، بِ کْࢽْجَمَ، بِ مُکُّو کَمْبُویْیَ، بِ رِوَ ثُکُّواْࢽَ بُومَرُو وَلْجْࢽِّ؞
[8] أَمَّ تِدْ کُسُوتُّو سُوسَدُمَ، أَوُو ࢽغْلَ رَوُومَ، کَمْ حَࢽْغَلَّ، جِرٜمَ، مُمِࢽْ، کُورُو کْلَ رِوُومَ یٜرُو وَلْجُو؞
[9] مَࢽَ کَمْبْرْسٜىٰ تِرُو أَلَمْجَاࢽَدَ ࢽغْلَرُو ثْدَ؞ ࢽغَیْࢽِࢽْ رَکْثٜ أَلَمْدُ جِرٜىٰࢽْ کَرْوُ أَمْ غَدٜىٰرُو دُࢽُو ثِ، کُورُو أَمْ أَلَمْدُدَ وَجَࢽَ یٜرُو ثْکَّدِ؞
[10] أَمْ تُرُوُ ࢽغْوُ مبٜجِ، مَࢽَ بُووُمَسُو یٜ، جَمْبَوُ یٜ، مَسَمَّࢽُّو تَیِ کْوُ أَمْ کَجَادَدْیٜࢽْ؞
[11] ثِࢽْجَ جَࢽْغٜ، دَلِلْࢽْجُدْ أَمْ ࢻَدُو کَدَیٜ حَࢽْغَلْࢽْجَ ثَسَࢽْغٜ وُرِ جَوَلْ دِوِࢽْ مَدَرُو أَوُو جُسّْࢽِّ أَلَمْجَیْ؞
[12] ثُرُو أَمْ ثُکُ کْرٜتّٜࢽْ ࢽَوِࢽْجَ لَایٜ: «کْرٜتْوُسُودْ تَیِ سَوِسُو کَتُّوُمَسُو، بُࢽْدِ دِوِ غَیْ، لُسُرَّ ثُرُوثُرُووُ،» ثْࢽَّ؞
[13] شٜدَ أَدْ جِرٜ؞ أَدْ ࢽَࢽْغَرُو کَمْبْرْسٜࢽْجَࢽْ دُࢽُووَرُو وَلْجَرُو تَیِرُو تَیْ دَࢽٜ یِکَّدٜ،
[14] بَرٜ ࢽیَرِ یَوْدِیَیٜیَ وَدَ أَمْ جِرٜدَ وَجَࢽَسُویٜیَ جَاࢽِّرُو؞
[15] أَمْ تَیِرْسُودْرُو أَوُو سَمَّ تَیِرْ، أَمَّ أَمْ تَیِرْ غْࢽِ کَمْبْرْسٜࢽَمْبُوُسُودْرُو أَوِمَ تَیِرْ غْࢽِ؞ حَࢽْغَلْࢽْجَ یٜ، کَرْوُࢽْجَ یٜ سَمَّ تَیِرْ غْࢽِ؞
[16] اللَّهَ ࢽُوجَࢽَ ثَࢽِ دُوُوࢽْ، کْࢽْدُوࢽْجَیٜࢽْ تِیَ أَࢽْغْرْجَیْ؞ تَیِدْ حَرَمْغَدَ، غَࢽَمْبُوُ، ࢻَیْدَࢽْجَ کْࢽْدُو ࢽغْلَ ࢻِمَ دِیُویٜ بَوُو؞