[1] ࢽِدْ، تَدَࢽِ، سٜرْ عِیسَى أَلْمَسِیوُلَࢽْ دْغَࢽَدْلَࢽْ دُࢽُو ࢻَࢽْدٜ!
[2] أَوُو ࢻُوُ شٜدَوُ کَدَیٜࢽْ وُلّْکّٜ ࢻَࢽّْمَّدَ مُکُّو أَمْ أَمَࢽَّیٜ رَکْثَࢽٜ أَمْ غَدٜ یٜرُو أَلَمْجَغَیْرُو یَکّٜ؞
[3] وُرُو کْلْدْغْࢽٜ سُوجِ ࢽغْلَ عِیسَى أَلْمَسِیوُیٜ غَیْ بُوࢽٜ یَیْ؞
[4] سُوجِ ࢻِمَ کْرِوُ ثْدِ دُوُوࢽْ حَࢽْغَلْࢽْجُ أَوُووَ دُࢽِیَ أَدْیٜرُو ثَکِّوَوُو، دَلِلْࢽْجُدْ أَرْدِیَ کَجَلَّࢽْجُیٜ مَجِ ࢽَࢽْغَرُو؞
[5] ثُرُو ࢽغْرْمْ سِیٜࢽْ کَمْ وَدَوَ بِکّٜىٰدَ جْغَیْوَوُووَ، أَرِیَوُ کْࢽَّسَرّٜ ثُوَࢽْدِوَوُو؞
[6] کُورُو بَرٜمَ ࢽغْࢽْࢻْتُمَدْ دُولٜ تِمَ بُرْوُوࢽْ ࢽٜمَلَࢽْ ࢽُوَࢽْجُ ثُوَࢽْدِدْ وُو؞
[7] کْلَ أَوُو وُلّْکّْࢽَدْیٜࢽْ ࢽغْلَرُو کْلَࢽْمْ کُورٜ، کْمَدْ ࢽِرُو ࢽُودُ أَوُو سَمَّیٜیَ ࢽجِ؞
[8] عِیسَى أَلْمَسِیوُوَ تَࢽْغٜ، تِ کَرْمُولَࢽْ ثِجْࢽَ یٜ، کَدُوُ مَیْ دَاوُدَیٜ یٜ، ثُرُو کَوُرِ کْجِدْیٜࢽْ وُلّْکّْࢽَدْ غَیْ؞
[9] کُورُو کَوُرِ کْجِ أَدْمَ ࢽَࢽْغَرُو بُوࢽٜ یَکِّ، حَرْ وُ کُوسُومَ غَیْ سَرْغَلَࢽْ سَسَکّٜرْࢽَ، أَمَّ مَࢽَ اللَّهیٜدْ تِکّٜرِوَوُو؞
[10] أَدْ ࢽَࢽْغَرُو ثُرُو أَوُو سَمَّیٜࢽْ کْلَ أَمْ اللَّه کْرٜجْࢽَسُودْیٜࢽْ مْرْࢽْکِّ، ࢽغَیْࢽِࢽْ تَیِ یٜ ࢽجْکَّوُو عِیسَى أَلْمَسِیوُلَࢽْ دْغَࢽَدَ دَرَجَ سَوِسُویٜیَ ثَوَࢽْدِ؞
[11] مَࢽَ أَدْ جَوْرُو کِبُّ: عِیسَىٰ رُوکُّو کَࢽُیْیٜیَ، أَࢽْدِ تِیَ رُوکُّو دْغَیْیٜ؞
[12] مْرْࢽِیٜیَ، أَࢽْدِ تِیَ رُوکُّو کْرْمَیْ دِیٜ؞ تِیَ أَࢽْغْرْࢽِیٜیَ، تِ یٜ أَࢽْدِیَ أَࢽْغْرْسَیْ؞
[13] أَمَّ أَمَࢽْ بَوُووَرُو وَلِّیٜیَ، تِ أَمَࢽَّ دْغَیْ، أَوُووَ تِ رَکْثٜ کْلَࢽْجُوَ أَࢽْغْرْجِوَوُو؞
[14] جَمَدْرُو أَوُو أَࢽِیَ إِسَتَکّْࢽٜ، ࢻُوُ اللَّهیٜࢽْ سْمُوࢽْجَ کَسّٜ، بَرٜ کْلَ کَلْمَوَیٜࢽْ کَمْبِوُ ثَدْࢽِّرُو؞ کَمْبِوُدْ أَوِمَرُو ࢻَیْدَ بَوُو، کُورُو أَمْ تِیَ کْرْࢽْجَࢽَسُودْ ࢻَثَّغَیْ؞
[15] کُواْرِ دٜ کَمْ کِدَ ࢽغْلَ ثْدْࢽَ غَیْ ࢻُوُ اللَّهیٜࢽْ ࢻْلٜدْࢽٜ، کِدَمَ دُوُوࢽْ ࢽَࢽْغُ یٜ تِیَ ثْدَیْوَوُو، مَࢽَ جِرٜىٰ یٜ کَلْکَلُّو أَلَمْجِدْ؞
[16] أَمَّ مَࢽَ بُووُیٜ ࢻَیْدَ بَوُووَرُو کَࢽٜ، أَمْ دُوُوࢽْ مَࢽَوَ أَࢽِرُو کْلَࢽْجَ ثَسَکّْࢽَسُودْ تَیِیَ اللَّهَیٜ کَتّٜࢽْجَ کُرُوُجِ،
[17] کُورُو مَࢽَࢽْجَسُودْ تُࢽُو کُرَ غَیْ ࢽدَرَ یَیٜرُو تَتَرْدِیے؞ ثُرُوࢽْجَࢽْ حِمٜࢽَیُسَّ ࢻِلِتُسَّ مبٜجِ،
[18] تَیِدْ جَوَلْ جِرٜىٰدَ کُولْجَࢽَ، ثِࢽُواْ دُࢽِیَیٜ وَکَّجْࢽَ ثَࢽٜ أَمْسُویٜ کَمْبْرْسٜࢽْجَ سْبَّلْجَیْ؞
[19] أَدْسُوࢽْ ࢻْرْدُ دُࢽُووَ اللَّه غْࢽَجْࢽَدْ ثْکْ دَادَ، تَوَ أَدْ تِرُو بَکَّادَ: «کْمَࢽْدٜ أَمْ کَاࢽجُدَ ࢽُوجْࢽَ،» کُورُو: «کَمْ دُوُوࢽْ ثُ کْمَࢽْدٜىٰ بُواْجْࢽَمَدْ جَوَلْ دِوِلَࢽْ ثُلُوُو!»
[20] ثُرُو ࢻَدُو کُرَیٜࢽْ تَسَ دِࢽَرّٜیَ رِوُلَّیٜیَ بَسْ غْࢽِ، کْسْکَیٜیَ تُلُویٜیَ یٜ مبٜجِ؞ لَاࢽجَ دَرَجَا، لَا یٜ دَرَجَ بَوُووَ؞
[21] کَمْ لَا أَوُو دِوِ أَࢽِ سَمَّࢽْ کْلَࢽْجُ تُلْجِیَ، تَسَ دَرَجَا غَیْ تَیِرُّو وَلْجِ، کُورُو کْمَࢽْجُرُو ࢻَیْدَا یٜ، کْࢽْدُو ࢽغْلَ سَمَّرُو دَبَّرْغَدَ یٜ؞
[22] مَࢽْغَرْ دِوِ دِوِ ࢽَࢽْجَیْرُویٜدْرُو کَدْࢽٜ، أَمْ دُوُوࢽْ کْمَࢽْدٜیَ کَرْوُ تَیِرْࢽِࢽْ بُواْجَیْمَسُودَ رُوکُّو جَوَلْ جِرٜىٰیَ کَمْبْرْسٜىٰیَ کْرَوُویٜیَ ࢽَࢽْلٜوَیٜیَدَ ࢽغْلَرُو غَیْ؞
[23] أَمَّ کَمْبِوُ بُووُیٜ حَࢽْغَلْࢽَمْبُیٜدَ وَࢽٜ، لَوَلَ ثُوُدِرُو ࢽُوࢽْمَّ ࢽَࢽْغَرُو؞
[24] وُولُودِ اللَّهیٜدْ بَرٜ لَوَلَ ثْدْࢽِّ، دُولٜ وُࢽْدُ یَیٜرُو رُوکُرَ بَوُووَا کَࢽَدِیَارُو وَلْجُو، کُورُو کَمْ رَکْثٜ أَلَمْجِ یٜ،
[25] رُوکُرَ بَوُووَلَࢽْ وَدُوُࢽْجُوَ جَوَلُّو ثَکِّ یٜرُو وَلْجُو؞ وَࢽٜىٰ اللَّه تَیِرُو دَمَ تْمْدُیٜ ثٜ ࢽُودُ جِرٜدْیٜیَ ثَوَࢽْدِ؞
[26] أَدْغَیْمَ حَࢽْغَلْࢽْجَ ثَوَࢽْدٜ کٜلْ إِوُلِیسّٜࢽْ ثَلُوِ، أَوُووَ إِوُلِیسْدْ أَوُو ثْرَاࢽَ ثَدُورُو تَیِیَ ثْدَࢽَ؞