[1] Donk, men sa m ap deklare w: Devan Bondye ak devan Senyè Jezi Kris ki pral jije ni vivan ni mò lè li parèt epi li tabli wayòm li an:
[2] Preche pawòl la. Pèsevere, kit bon tan, kit move tan. Ak tout pasyans ou, epi nan ansèyman w, konvenk moun, fè yo obsèvasyon, egzòte yo.
[3] Paske, yon tan ap vini kote moun p ap sipòte doktrin ki kòrèk la. Okontrè, zòrèy yo ap grate yo daprè pwòp dezi yo, epi y a anpile pwofesè pa yo.
[4] Yon bò, y ap detounen zòrèy yo sou verite a, epi yon lòt bò, y ap vire yo sou lejann.
[5] Men, ou menm, ou dwe modere nan tout bagay. Andire soufrans. Fè travay evanjelis. Akonpli ministè ou byen.
[6] Paske, mwen menm, mwen deja yon ofrann likid. E, tan pou m pati a ap pwoche.
[7] Mwen mennen yon bon batay. Mwen fini kous la. Mwen kenbe nan lafwa.
[8] Finalman, kouwòn jistis la ap tann mwen. Senyè a, ki se jij ki jis la, ap ban mwen li nan jou sa a. E, se pa mwen menm sèlman l ap bay li, men tou, se tout moun k ap renmen retou li.
[9] Fè dilijans pou w vini kote m tousuit.
[10] Paske, Demas abandone mwen, epi li pati Tesalonik, tèlman li renmen monn ki la kounye a. Kresan al Galasi. Tit al Dalmasi.
[11] Se Lik sèl ki la avè m. Pran Mak, mennen l vini avèk ou, paske li itil mwen nan ministè a.
[12] Mwen voye Tichik Efèz.
[13] Manto mwen te kite Twowas, kay Kapis la, lè w ap vini, pote l pou mwen ansanm ak liv yo, sitou pachemen yo.
[14] Aleksann, bòs fòjon an, fè m anpil mal. Senyè a va peye l travay li fè m yo.
[15] Pran prekosyon w avè l, paske li te fè pawòl nou yo anpil opozisyon.
[16] Premye fwa m t ap defann tèt mwen an, pèsonn pa t soutni mwen. Okontrè, tout moun te abandone m. Se pou Bondye pa met sa sou kont yo.
[17] Men, Senyè a te ede m, li te ban m fòs pou mwen ka fin pwoklame mesaj la epi pou tout moun lòt nasyon yo ka tande l. E, li te delivre m anba bouch lyon an.
[18] E, Senyè a ap delivre m anba tout move travay, epi l ap sove m pou mwen ka nan wayòm syèl la. Glwa pou li, pou le tan e letènite! Amèn.
[19] Salye Priska avèk Akilas ansanm ak moun kay Onezifò yo.
[20] Eras rete Korent. Men, mwen te kite Twofim malad Milè.
[21] Fè dilijans pou w vini anvan ivè. Ebilis, Pidens, Linis, Klodya ansanm ak tout frè yo voye salye w.
[22] Senyè Jezi Kris avèk lespri ou! Gras Bondye avèk nou! Amèn!