[1] Thèu-yit-ke yok, yû lî-pai ke li-kûi lâu ngìn chho ke lî-pai chhòng-só.
[2] Só hí ke sṳn-chong-phùng, thèu-yit-chhèn ôn-to sṳn-só, tî-poi yû tên-thòi, chok-è, lâu kin-sṳ̀n ke piáng.
[3] Thi-ngi-liâng pu-liàm heu, yû yit-chhèn sṳn-chong-phùng ôn-to chṳ-sṳn-só,
[4] tî-poi yû sêu-hiông yung ke kîm hiông-thàn lâu pâu-kîm ke yok-khui, khui-tú piong-tén chông mâ-nâ ke kîm kon-é, yu yû Â-lùn ke-kî fat-ko ngà ke koái-kun-é lâu siá-tén sṳ̍p-thiàu-kie ke lióng-te sa̍k-pán.
[5] Yok-khui táng-kô yû kî-lu-pak, péu-sṳ Song-ti ke lìm-chhai; kî-lu-pak ke yi̍t-kap châ-tén sa-chhui ke chho-vi. Koân-he liá-têu, liá-ha mò fap-thu siòng-se sot-mìn.
[6] Liá-têu tûng-sî cheu án-ngiòng ôn-phài hó-se. Ke-têu chi-sṳ̂ chhiu tak-ngit ngi̍p sṳn-chong-phùng ke ngoi-chhèn hi kí-hàng lî-pai ke ngì-sṳt;
[7] chúng-he nui-chhèn ke-kiên, thai-chi-sṳ̂ chang cho-tet ngi̍p-hi, yit-ngièn ya chṳ́-yû yit-pái; vi-tó chhṳ-kâ lâu ngìn-mìn vù-yi só fam ke ko-sṳt, kì tak-pái oi tai-tén hiet ngi̍p-hi hien-pûn Song-ti.
[8] Sṳn-Lìn thûng-ko liá-têu ôn-phài lòi chṳ́-mìn, ngoi-chhèn ke sṳn-chong-phùng na hàn chhôi, theu-ngi̍p chṳ-sṳn-só ke lu chhiu màng khôi.
[9] Ngoi-chhèn sṳn-chong-phùng he to liá-ha vì-chṳ́ ke yit-chúng yi-péu. Liá chhiu-he kóng, hien lî-vu̍t lâu chi-vu̍t pûn Song-ti m̀-voi sṳ́ kin-pai ke ngìn nui-sîm sàng-cho vàn-chhiòn;
[10] liá-têu he yû-koân yím-sṳ̍t lâu kok-yong ke kiet-chhiang ngì-sṳt thin-thin. Liá-chúng ngoi-péu ke li-kûi, to Song-ti kói-chṳn yit-chhiet ke sṳ̀ chhiu sṳt-háu lé.
[11] Liá-ha, Kî-tuk yí-kîn lòi-to; kì cho thai-chi-sṳ̂, yí-kîn sṳ̍t-hien yit-chhiet ke hó-sṳ. Kì ngi̍p-hi ke sṳn-chong-phùng hàn-kha thai, hàn-kha vàn-chhiòn, m̀-he ngìn ke sú hí ke; liá chhiu-he kóng, m̀-he su̍k liá su-chho ke sṳ-kie.
[12] Kî-tuk chin-ngi̍p chṳ-sṳn-só, yit-pái chhiu la; ke-sṳ̀, kì pin mò yung sân-yòng lâu se-ngiù ke hiet cho chi-vu̍t, fán-chón yung kì chhṳ-kâ ke hiet, lòi pûn ngài-têu tet-tó yún-yén ke kiu-su̍k.
[13] Chhai lî-ngì chûng, yung sân-yòng ke hiet, ngiù-kú ke hiet, lâu ngiù-mà ke fôi, fin chhai ke-têu mò chhiang-li ke ngìn sṳ̂n-song, na-he nèn chhîn-thet kì-têu ke lá-sap, pûn kì-têu tet-tó chhiang-li,
[14] án-ngiòng, Kî-tuk ke hiet só-nèn sṳ̀n-chhiu ke kám m̀-he hàn-kha tô mâ? Thûng-ko ke yún-yén ke Lìn, Kî-tuk hien chhṳ-kâ cho mò khiet-tiám ke chi-vu̍t pûn Song-ti. Kì ke hiet voi kiet-chhiang ngài-têu ke liòng-sîm, chhù-thet ngài-têu fú-phai ke hàng-vì, pûn ngài-têu sṳ-fung yún-sên ke Song-ti.
[15] Yîn-vi án-ngiòng, Kî-tuk sàng-cho liá sîn-yok ke chûng-pó, yung sí lòi su̍k ke-têu chhai thèu-yit-ke yok chṳ̂-ha só-fam ke chhui-ko, pûn Song-ti só fû-seu ke ngìn yû-hó liâng-su Kì só yin-hí yún-yén ke fuk-hi.
[16] Vùi-ngièn, yit-thin oi chṳn-mìn li̍p vùi-ngièn ke ngìn yí-kîn sí-thet;
[17] yîn-vi, li̍p vùi-ngièn ke ngìn hàn sâng, vùi-ngièn chhiu mò-háu, kì yit sí, vùi-ngièn chhiu yû háu-li̍t.
[18] Só-yî, lièn thèu-yit-ke yok ya he oi yung hiet lòi sat-li̍p chang yû-háu.
[19] Tông-sṳ̀, Mô-sî cheu fap-li̍t siên chiông só-yû ke kie-min chhòn-pûn ngìn-mìn, yèn-heu kì nâ se-ngiù lâu sân-yòng ke hiet, chhâm têu súi, yung chhṳ̂m-fùng-set ke yùng lâu ngiù-chhit-chhó lòi chiám, fin chhai Fap-li̍t-sû lâu só-yû ngìn-mìn ke sṳ̂n-song.
[20] Kì kóng: “Liá he li̍p-yok ke hiet, he Song-ti lâu ngì-têu li̍p-yok ke ki-ho.”
[21] Khiung-yong, Mô-sî ya yung hiet fin chhai sṳn-chong-phùng, pin lî-pai lâu lî-ngì só yung kok-yong ke hi-mén táng-kô.
[22] Cheu fap-li̍t ke kûi-thin, chhâ-m̀-tô só-yû ke hi-mén chhiòn-phu he yung hiet lòi kiet-chhiang ke; mò liù-hiet, chhiu mò sa-chhui.
[23] Ki-yèn liá-têu cheu thiên-táng ke yong-sṳt só chho ke hi-mén, yit-thin oi yung án-ngiòng lòi kiet-chhiang; thiên-táng ke ngièn-vu̍t chhiu hàn-kha oi yung kien-hó ke chi-vu̍t hi kiet-chhiang.
[24] Kî-tuk pin mò ngi̍p-hi ngìn-sú só hí ke sṳn-só; ke put-ko he chṳ̂n sṳn-só ke yáng-siong thin-thin. Kì he chin-to thiên-táng, chhiu-he chṳ̂n sṳn-só, liá-ha vi-tó ngài-têu ke yèn-ku khî chhai Song-ti ke mien-chhièn.
[25] Yù-thai-ngìn ke thai-chi-sṳ̂ oi tak-ngièn tai-tén thèu-sâng ke hiet ngi̍p-hi chṳ-sṳn-só; chúng-he, Kî-tuk m̀-sṳ́ hien chhṳ-kâ tô-tô pái.
[26] Na m̀-he án-ngiòng, tui chhóng-chho sṳ-kie yî-lòi, kì chhiu oi ngiûn-su khú-nan tô-tô pái lô. Chúng-he liá-ha, Kî-tuk chhai ma̍t-sṳ hién-hien yit-pái, chiông chhṳ-kâ hien-cho chi-vu̍t, lòi chhù-thet chhui.
[27] Cheu só chu-thin ke, sṳ-kiên-ngìn lûng-chúng yû yit-pái ke sí, sí-heu hàn-oi su Song-ti sṳ́m-phan.
[28] Chhiong án-ngiòng, Kî-tuk ya hî-sên yit-pái, lòi tâm-tông chung-ngìn ke chhui. Chiông-lòi, kì hàn-oi hién-hien yit-pái, m̀-he vi-tó tui-fu chhui, he oi chṳ́n-kiu ke-têu pet-chhiet tén-heu kì ke ngìn.