[1] Song-ti só sién-seu, só sṳn-phe̍t ke chung hiûng-thi chí-moi â! Ngì-têu oi hó-hó mén-sióng Yâ-sû; kì he Song-ti só chhâi-phai ke, he ngài-têu sin-ngióng só ko-pha̍k ke thai-chi-sṳ̂.
[2] Kì tui sién-seu kì lòi kûng-chok ke Song-ti chhin chûng-sîm, chhiong Mô-sî chhai Song-ti ke chhiòn-kâ chhin-chûng kûng-chok yit-yong.
[3] Chúng-he, Yâ-sû yû chṳ̂-kiet pí Mô-sî sṳ̀n-su kien-thai ke yùng-kông; chhiu-chhiong hí-vuk ke ngìn só tet ke yùng-kông chhêu-ko kì só hí ke vuk yit-yong.
[4] Tak-kiên vuk he ngìn hí-chho ke, chúng-he chhóng-chho van-yû ke he Song-ti.
[5] Mô-sî chhai Song-ti ke chhiòn-kâ cho chûng-sîm ke phu̍k-ngìn, vi-tó Song-ti heu-lòi só-oi kóng ke fa cho-chṳn;
[6] chúng-he, Kî-tuk yung Lai-é ke sṳ̂n-fun chûng-sîm chhṳ-lî Song-ti ke kâ. Ngài-têu na yîn-vi só phan-mong ke, yúng-kám to-tái, khok-sin to-tái, ngài-têu chhiu-he Song-ti ke yit-kâ ngìn lé.
[7] Só-yî, chhiong Sṳn-Lìn só-kóng ke: Kîm-pû-ngit, ngì-têu na thâng-tó Song-ti ke sâng,
[8] chhiu m̀-hó án ngang-kiáng, chhiong thèu-pái án-ngiòng phoi-ngia̍k Song-ti, chhiong tông-sṳ̀ chhai khóng-yâ sṳ-tham Kì.
[9] Song-ti kóng: Si-sṳ̍p ngièn ke tông-chûng, ngì-têu ke chú-siên sûi-yèn khon-tó Ngài só hàng ke, kì-têu hàn-he chhai ke-vi ngiâ Ngài, sṳ-tham Ngài.
[10] Só-yî, Ngài tui ke sṳ̀-thoi ke ngìn fat-khién, kóng: “Kì-têu yit-chhṳ̍t án m̀ chûng-sîm, yu m̀ fu̍k-chhiùng Ngài ke min-lin.”
[11] Ngài chhai nu-hi chûng fat-sṳ: “Kì-têu chhie̍t-tui cho-m̀-tet ngi̍p-hi ke thi-fông hióng-su Ngài só-su ke ôn-sit!”
[12] Ngài ke hiûng-thi chí-moi â, ngì-têu oi se-ngi ô! Kiâng-pha ngì-têu tông-chûng yû ngìn sîm-sṳ̂ phai-fai, m̀-hén siông-sin, lì-khôi yún-sên ke Song-ti.
[13] Chui-hó, kón hàn-yû só-vi “Kîm-pû-ngit” ke sṳ̀-chiet, ngì-têu oi ngit-ngit pí-chhṳ́ khien-miên, miên-tet ngì-têu chûng-kiên yû ngìn pûn chhui mì-fe̍t, pien-cho ngang-kiáng.
[14] Yîn-vi, ngài-têu na kiên-chhṳ̀ tông-chhû ke khok-sin, sṳ́-chûng put-pien, ngài-têu chhiu-he Kî-tuk ke thùng-kûng.
[15] Cheu Sṳn-kîn só-kóng ke: Kîm-pû-ngit, ngì-têu na thâng-tó Song-ti ke sâng, chhiu m̀-hó án ngang-kiáng, chhiong thèu-pái án-ngiòng phoi-ngia̍k Song-ti.
[16] He má-ngìn thâng-tó Song-ti ke sâng yu phoi-ngia̍k Kì nè? Kám m̀-he Mô-sî tui Âi-khi̍p tai-liâng chhut-lòi ke ngìn-mìn mâ?
[17] Ke si-sṳ̍p ngièn ke tông-chûng, Song-ti he tui má-ngìn fat-khién â? Kám m̀-he ke-têu yîn-vi fam-chhui, sṳ̂n-sṳ̂ vang chhai khóng-yâ ke ngìn mâ?
[18] Song-ti fat-sṳ kóng: “Kì-têu chhie̍t-tui cho-m̀-tet ngi̍p-hi ke thi-fông hióng-su Ngài só-su ke ôn-sit!” Liá-ki fa he tui má-ngìn kóng ke â? Kám m̀-he tui ke-têu phoi-ngia̍k ke ngìn mâ?
[19] Tui án-ngiòng lòi khon, kì-têu mò fap-thu ngi̍p-hi ke thi-fông hióng-su ôn-sit he yîn-vi kì-têu m̀-sin.