[1] Ngài-têu só thó-lun ke chhung-tiám he: Ngài-têu yû chhiong án-ngiòng ke thai-chi-sṳ̂; kì chhô chhai thiên-táng chṳ-thai Khièn-nèn-chá ke pó-chho yu-phién.
[2] Kì chhai chṳ-sṳn-só tâm-ngim thai-chi-sṳ̂; liá sṳn-só m̀-he ngìn ke sú hí ke, he Chú só hí chṳ̂n ke sṳn-chong-phùng.
[3] Mî-yit-ke thai-chi-sṳ̂ lûng-chúng he vi-tó hien lî-vu̍t lâu chi-vu̍t lòi sat-li̍p ke; só-yî, ngài-têu ke thai-chi-sṳ̂ ya yin-kôi yû-só fung-hien.
[4] Na-he kì chhai thi-song, kì chhiu mò cho chi-sṳ̂, yîn-vi yí-kîn yû cheu Yù-thai fap-li̍t lòi hien lî-vu̍t ke chi-sṳ̂.
[5] Liá-têu chi-sṳ̂ he cheu thiên-táng sṳn-só ke yong-sṳt lâu yáng-siong lòi sṳ-fung. Chhiong Mô-sî oi hí sṳn-chong-phùng ke sṳ̀, Song-ti kín-ko kì, kóng: “Oi kiún-sṳ́m, chhiòn-phu oi cheu Ngài chhai sân-táng chṳ́-sṳ ngì ke yong-sṳt hi chho.”
[6] Chúng-he, Yâ-sû liá-ha só tâm-ngim ke chi-sṳ̂ chṳt-vu chhêu-ye̍t kì-têu ke chhin tô, chhiu-chhiong kì chhai Song-ti lâu ngìn ke chûng-kiên cho chûng-pó ke yok he kha-hó ke, yîn-vi liá-ke yok he cheu ke kha-hó ke yin-hí lòi li̍p ke.
[7] Thi-yit-ke yok na mò khiet-tiám, chhiu m̀-sṳ́ yû thi-ngi-ke yok.
[8] Chúng-he Song-ti chit-phi Kì ke chṳ́-mìn ke sṳ̀, kóng: Chú kóng: Ngit-è voi to, Ngài oi lâu Yî-set-lie̍t ke ngìn-mìn pin Yù-thai ke ngìn-mìn nang-ngoi li̍p sîn ke yok.
[9] Liá yok m̀ chhiong thèu-pái Ngài lâu kì-têu ke chú-siên só-li̍p ke yok; chhai ke-têu ngit-è Ngài khiên-tén kì-têu ke sú, tai-liâng kì-têu chhut Âi-khi̍p. Chúng-he kì-têu mò chûn-sú Ngài lâu kì-têu só-li̍p ke yok. Só-yî Chú kóng: Ngài ya mò-oi tap kì-têu.
[10] Chú yu kóng: Chhai chiông-lòi ke-têu ngit-è, Ngài oi lâu Yî-set-lie̍t ngìn-mìn li̍p liá-chúng ke yok: Ngài oi chiông Ngài ke fap-li̍t piong-ngi̍p kì-têu ke thèu-nó, siá chhai kì-têu ke sîm-song. Ngài oi cho kì-têu ke Song-ti, kì-têu oi cho Ngài ke chṳ́-mìn.
[11] Kì-têu m̀-voi chai kâu thùng-pâu, ya m̀-sṳ́ lâu chhṳ-kâ ke hiûng-thi kóng: “Oi ngin-sṳt Chú”; yîn-vi tui chui-se ke to chui-thai ke, kì-têu lûng-chúng voi ngin-sṳt Ngài.
[12] Ngài oi sa-miên kì-têu ke ko-fam, mò-oi chai ki-tet kì-têu ke chhui-ok.
[13] Ki-yèn Song-ti thì-tó “sîn ke yok”, khó-kien Kì yí-kîn chiông thèu-yit-ke yok khon-cho khiu ke. Kín khiu kín ló ke, chhiu voi chhin kiak sêu-me̍t-thet.