[1] Ki-yèn ngài-têu yû án-tô kien-chṳn-ngìn, chhiong yùn vì-tén ngài-têu, chhiu yin-kôi piong-thet kok-chúng ke chhûng-tâm lâu chhàn-tén ngài-têu ke chhui, ngiûn-nai to-tái lòi chéu pài chhai ngài-têu thèu-chhièn ke lu-chhàng.
[2] Ngài-têu oi chu-muk khon Yâ-sû, yîn-vi kì he ngài-têu sin-sîm ke khôi-chhóng-chá lâu vàn-sṳ̀n-chá. Vi-tó pài chhai kì thèu-chhièn ke hí-lo̍k, kì khon-khiâng vú-yu̍k, ngiûn-su sṳ̍p-sṳ-ka ke thung-khú; liá-ha, kì chhô chhai Song-ti pó-chho ke yu-phién.
[3] Ngì-têu oi hó-hó sióng khon-é, kì he ngióng-pân ngiûn-su chhui-ngìn ke yen-hen; án-ngiòng, ngì-têu chang m̀-voi lâng-sîm sṳt-chṳ.
[4] Ngì-têu thùng chhui-ok chan-teu, hàn-màng piang-to sâng-sí ke koân-thèu.
[5] Song-ti ngióng-pân khien-miên ngì-têu, chhiong khien chṳ́-ńg yit-yong, kám-kóng ngì-têu m̀ ki-tet lé he-mò? Kì kóng: Ngài ke lai-é â, m̀-hó khon-khiâng Chú ke kón-kau, pûn Kì chit-phi ke sṳ̀-chiet, m̀-hó sṳt-chṳ;
[6] yîn-vi Chú kón-kau Kì só-siak ke ngìn, piên-tá mî-yit-ke Kì só ngin ke chṳ́-ńg.
[7] Ngì-têu oi ngiûn-su khú-nan chhiong he â-pâ ke kón-kau, yîn-vi liá he péu-sṳ Song-ti tui-thai ngì-têu chhiong chṳ́-ńg yit-yong. Kám yû m̀-sṳ́ su kiâ-pâ kón-kau ke chṳ́-ńg mâ?
[8] Ngì-têu na mò chhiong khì-thâ ke chṳ́-ńg án-ngiòng su kón-kau, ngì-têu chhiu m̀-he chṳ́-ńg, he sṳ̂-sên-chṳ́.
[9] Ngiuk-sṳ̂n ke â-pâ sṳt kón-kau ngài-têu, ngài-têu hàn-he chûn-kin kì-têu. Án-ngiòng, tui lìn-sin ke Â-pâ, ngài-têu kám m̀-he hàn-kha oi sun-fu̍k Kì, chang voi tet-tó sâng-miang mâ?
[10] Ngiuk-sṳ̂n ke â-pâ cheu chhṳ-kâ khon-cho chho̍k ke, chhiam-sṳ̀ kón-kau ngài-têu; chúng-he, Song-ti ke kón-kau he vi-tó ngài-têu ke li-yit, oi pûn ngài-têu yû-fun Kì ke sṳn-kiet.
[11] Ngìn su kón-kau ke sṳ̀, yit-thin voi sông-sîm, m̀ sóng-khoai; chúng-he heu-lòi, ke-têu tui kón-kau lòi su chhâu-lien ke ngìn chhiu voi kiet phìn-ôn ke kó-chṳ́, ko chṳn-chhṳ̍t ke sên-fa̍t.
[12] Só-yî, ngì-têu sú-ngiôn kiok-lài ke, oi chap-chen hí-lòi!
[13] Oi yit-chhṳ̍t hàng chhai pit-chhṳ̍t ke lu-song, sṳ́ khiò-thet ke kiok chang m̀-voi thot-vón, fán-chón voi tet-tó yî-chhṳ.
[14] Ngì-têu oi chhin-li̍t lâu chung-ngìn fò-hó, ya oi chûi-khiù sṳn-kiet; mò sṳn-kiet, mò yit-ke ngìn nèn kien-tó Chú.
[15] Oi kiún-sṳ́m! Miên-tet yû-ngìn sṳt-thet Song-ti ke ên-tién; miên-tet yû-ngìn chhiong yû thu̍k ke kîn thai hí-lòi, hoi-tó chhin-tô ngìn, sṳ́ kì-têu pien-cho vû-ve;
[16] miên-tet yû-ngìn fam yìm-lon, ya-he chhiong Yî-so án khon-chhung sṳ-siu̍k, vi-tó yit-vón sṳ̍t-vu̍t lièn chóng-chṳ́ ke miàng-fun ya nâ-lòi mai-thet.
[17] Ngì-têu tî, heu-lòi kì sióng-oi tet-tó â-pâ ke chuk-fuk, chúng-he su khî-chhie̍t; kì sûi-yèn liù muk-chṳp, pet-chhiet khién-khiù, hàn-he chhìm m̀-tó ván-fì ke phan-fap.
[18] Ngì-têu m̀-he chhiong ke-têu Yî-set-lie̍t-ngìn án-ngiòng, lòi-to ke miâ-tet-tó ke Sî-nai-sân; chhai ke-vi yû fó-yam, vû-yùn, het-am, phau-fûng,
[19] phùn yòng-kok ke sâng, lâu kóng-fa ke sâng. Ngìn-mìn thâng-tó liá-ke fa, chhiu yêu-khiù m̀-hó chai tui kì-têu kóng-fa;
[20] yîn-vi kì-têu tông m̀-hí ke min-lin, kóng: “Miâ liá sân ke, chhiu-son he thèu-sâng ya oi yung sa̍k-thèu te̍p-sí.”
[21] Só khon-tó ke fî-sòng tet-ngìn-kiâng, lièn Mô-sî ya kóng: “Ngài kiâng-to pi̍t-pi̍t-chhat!”
[22] Chúng-he, ngì-têu he lòi-to Siak-ôn-sân; liá he yún-sên Song-ti ke sàng, he thiên-táng ke Yâ-lu-sat-lâng, yû chhiên-chhiên van-van ke thiên-sṳ́.
[23] Ngì-têu he lòi-to Song-ti chung chóng-chṳ́ fôn-hí chhi-fi ke chhòng-só; liá-têu chóng-chṳ́ ke miàng yí-kîn ki chhai thiên-táng. Ngì-têu he lòi-to sṳ́m-phan van-mìn ke Song-ti mien-chhièn, he lòi-to sàng-cho vàn-chhiòn ke ngi-ngìn ke lìn-fùn ke só-chhai.
[24] Ngì-têu he lòi-to sîn-yok ke chûng-pó Yâ-sû mien-chhièn, he lòi-to fin-hiet ke só-chhai; liá-ke hiet yàng-ko Â-pak ke hiet só péu-hien ke.
[25] Só-yî, ngì-têu oi kiún-sṳ́m, m̀-hó khî-chhie̍t ke hiong ngì-têu kóng-fa ke. Ke-têu khî-chhie̍t ke chhai thi-song chiông sṳ̀n-sṳn ke chṳ̂n-tho chhòn pûn kì-têu ke yit-vi, tû mò fap-thu thot-chhui; na-he ngài-têu khî-chhie̍t ke tui thiên-táng hiong ngài-têu kóng-fa ke, ngài-têu chhiu hàn-kha mò khó-nèn thot-chhui ô!
[26] Ke-sṳ̀, Kì ke sâng yèu-thung thi, chúng-he liá-ha, Kì yin-hí kóng: “Hàn-yû yit-pái, Ngài m̀ tân-chhiang oi yèu-thung thi, lièn thiên ya oi yèu-thung.”
[27] “Hàn-yû yit-pái” liá-ki fa mìn-hién péu-sṳ su-chho chṳ̂ vu̍t voi su yèu-thung to sái-chéu, pûn ke-têu m̀-voi yèu-thung ke liù-hâ-lòi.
[28] Án-ngiòng, ki-yèn ngài-têu sṳ̀n-su ke m̀-voi yèu-thung ke koet, ngài-têu chhiu yin-kôi kám-ên. Ngài-têu oi cheu Song-ti só fôn-hí ke, yung khièn-sṳ̀n kin-vi ke sîm lòi sṳ-fung Kì,
[29] yîn-vi ngài-têu ke Song-ti he lie̍t-fó.